103. De Beata Maria V.

I.

1. Alma, serena, pia, praecelsa, beata Maria,
Tu fons hortorum, tu certa salus miserorum.
Lumen caecorum, requies optata laborum ,
Da mihi te care, carissima, semper amare,
Te mihi da clare clara cum laude vocare.

2. Alma, serena, pia, praecelsa, beata Maria,
Dulcior es melle, te laudant quaeque puellae,
Mirantur stellae, fugiunt metuendo procellae;
Sis mihi solamen, sis aeternale levamen,
Sis et tutamen, bis et per cuncta iuvamen.

3. Alma, serena, pia, praecelsa, beata Maria,
Tu delictorum veniam mihi posce meorum
Et fac me morum vernare decore proborum ;
Sis mihi salvatrix, sis, obsecro, semper amatrix,
Sis consolatrix, sis mater et auxiliatrix.

4. Alma, serena, pia, praecelsa, beata Maria,
Tu perpulchra genis, oculis tu grata serenis,
Tu dulcis, lenis, cunctis tu mater egenis,
Me tam ferventer clamantem tamque frequenter,
Respice clementer mihi subveniendo libenter.

II.

1. Diva parens, maerore carens, dilecta Maria,
Sponsa Dei, memor esto mei, miserere dolenti;
Sum fragilis, non sum stabilis, succurre cadenti.
Quid faciam, quid deveniam, quid ero miserandus?
Te rogitans, ad te fugitans venio recreandus.

2. Diva parens, maerore carens, dilecta Maria,
Te precibus, te carminibus rogo, semper adesto,
Iam venias, iam subvenias, pia, tu mihi praesto;
Culpa premit, mens pressa gemit, tormento gravatur
Da baculum, releva tremulum, te sustineatur.

3. Diva parens, maerore carens, dilecta Maria,
Si pereunt, si praetereunt, quaecumque videmus,
Nos, teneri vestri pueri, quonam fugiemus?
Stella maris, quos ipsa paris, solita pietate,
Ipsa tua nos dulciflua salva bonitate.

4. Diva parens, maerore carens, dilecta Maria,
Te lacrimis precor, oro nimis, flos optime florum,
Sis requies, sis laeta dies, sis cura tuorum;
Mire decor, te, virgo, precor, digneris adesse,
Nosque polo pereunte solo fac semper inesse.

III.

1. Clara pudicitia, pulcherrima prole Maria,
Tu vitae portus, tu delectabilis hortus,
Dulcior es manna, te felix edidit Anna;
Hortum virtutis, portum largire salutis
Et mannam vitae mihi da sine fine cupitae.

2. Clara pudicitia, pulcherrima prole Maria,
Caelorum porta, mundo feliciter orta,
Eruat a portis tua me clementia mortis,
Lacta me mamma, dulcissima mater et amma,
Lacta languentem, lacta, rogo te, sitientem.

3. Clara pudicitia, pulcherrima prole Maria,
Omnes tu flores, omnes tu vincis odores;
Flos honestatis, sit odor mihi virginitatis ;
Pulchrior es luna, sublimior omnibus una,
Fac sim sublimis, mea vita levetur ab imis.

4. Clara pudicitia, pulcherrima prole Maria,
Tu vitae pomum, tu mellifluum cinamomum,
Purpureis violis radiisque simillima solis;
Da mihi, quod quaero, quod per te cernere spero,
Regnum caelorum veniam scelerumque meorum.

IV.

1. Pulchra Maria, serena Maria, benigna Maria,
Dulcis alumna, superna columna decusque perenne,
Tela maligna repelle, benigna, metumque gehennae;
Nostra mamilla Deique papilla, mei miserere,
Quem fugienda nimisque cavenda diu tenuere.

2. Pulchra Maria, serena Maria, benigna Maria,
Dira cupido, caeca libido regnat ubique,
Quisque malorum quemque bonorum truncat inique
Casta virago, sancto propago, corrige vanos,
Aula pudoris, mater amoris, protege sanos.

3. Pulchra Maria, serena Maria, benigna Maria,
Lux orborum, dux claudorum, dirige iustos,
Os mutorum, spes cunctorum, sis mihi custos;
Sis dilectrix, sis protectrix, sis mihi mater ;
Pulcher Iesus, dulcis Iesus, sis mihi frater.

4. Pulchra Maria, serena Maria, benigna Maria,
Dia puella, venusta puella, puella colenda,
Virgo iucunda Deoque secunda nimisque stupenda,
Tolle timorem, pelle dolorem perpetualem,
Fac me fortem vincere mortem spiritualem.

V.

1. Mater casta, pia, clarissima virgo Maria,

Fac mihi, quae posco, melius, quam poscere nosco,
Et, quae corde peto, tribuas mihi munere laeto;
Fac me mundari, mundatum iustificari.
Iustum firmari, firmatum salvificari.

2. Mater casta, pia, clarissima virgo Maria,
Sit mihi, oro, pater carus tibi caraque mater,
Fratrum nostrorum memor esto simulque sororum
Et fac gaudentes notosque meosque parentes,
Consolans cunctos in amore pio mihi iunctos.

3. Mater casta, pia, clarissima virgo Maria,
Fac nostros reges iustas componere leges,
Principibus praesta dominari mente modesta,
Divitibus praebe cum Christi vivere plebe,
Pauperibus dona vitae gaudere corona.

4. Mater casta, pia, clarissima virgo Maria,
Ecclesiae patres concordi, protege matres,
Dilige catholicos fidei reprimens inimicos
Et non credentes fac Christo credere gentes.

VI.

1. Virgo puerpera, sis mihi prospera, sancta Maria,
O venerabilis, O memorabilis, O generosa,
Mater amabilis, inviolabilis, imperiosa,
Suscipe carmina, dilue crimina, suscipe vota,
Funde precamina, ferto iuvamina, spes mea tota.

2. Virgo puerpera, sis mihi prospera, sancta Maria,
Tu violaria tuque rosaria vincis odore,
Lactea lilia, pulchra monilia vincis amore ;
Te modulamine, te iubilamine vocis honoro,
Te quoque pectore, te quoque corpore totus adoro.

3. Virgo puerpera, sis milii prospera, sancta Maria,
Te, carissima, te clarissima gloria caeli,
Oro supplico, laudo, praedico mente fideli;
Tu pulcherrima, tu celeberrima, tu decus orbis,
Tu nostris pia ac ad omnia consule morbis.

4. Virgo puerpera, sis mihi prospera, sancta Maria,
Splendida moribus, altior omnibus, optima victrix,
Me, rogo, dirige, me, pia, dilige, sis mihi tutrix:
Iam mea cantica, spes precor unica, dulcius audi,
Iam mea tympana, iam, precor, organa praecipe claudi.

VII.

1. O flos egregia nascens de stirpe, Maria,
Sancta tua dextra benedic nos intus et extra,
Per te vivamus, per te Christo placeamus;
Fac nostras animas meritis, oramus, opimas,
Corpora purifica, virgo sacra, virgo pudica.

2. O flos egregia nascens de stirpe, Maria,
Assis oraclis, assis nostris habitaclis,
Assis et rebus cunctis, benedicta, diebus,
Non has flamma voret, non hos ardere laboret,
Non sit tempestas, non saeviat ulla potestas.

3. O flos egregia nascens de stirpe, Maria,
Terrae fecundae, plenae sint piscibus undae,
Conserva fructus, undarum comprime fluctus,
Ventos refrena, caelum pluviale serena,
Fulminis ardorem, tonitrus depelle fragorem.

4. O flos egregia nascens de stirpe, Maria,
Magnos algores, nimios moderare calores,
Pestis tollatur, bellum non inveniatur,
Crimina linquantur, cuncti veniam mereantur,
Christus adoretur, Christus, rex verus, ametur.