177. De Omnibus Sanctis.

1. Michael cum Gabriele,

caeli cives incliti,
Qui astatis coram Deo

laudibus assidui,
Proclamate: "Sancte Deus,

parce tuo supplici."

2. In Iordane qui tinxisti
agnum sine macula,

Non ut sua, sed ut nostra
solverentur crimina,

Tu, Iohannes, tua prece
reduc me ad supera.

3. Petre, pastor, cui praecepit
Christus oves pascere,

Quem ad vocem ter negasti
unius ancillulae,

Parce mihi, ut per culpam
didicisti parcere.

4. Paule doctor, mentem meam
tu doctrinis instrue,

Quibus iram Dei mei
valeam evadere

Et de culpis ad virtutem
cito queam currere.

5. Iesu Christi coheredes,

ceteri apostoli,
Illum pro me supplicate

voce consolabili,
Quo pellatur a me mortis

formido periculi.

6. Innocentes, qui pro Christo
inter matrum ubera

Ab Herode necis dira
suscepistis vulnera,

Per haec in me abluatis
scelerum contagia.

7. Gloriose Dei serve,

protomartyr Stephane,

Qui primus haberis sacro
martyrum in ordine,

Me per preces tuas turmae
socia caeligenae.

8. O makari Dionysi,

mea dele scelera,
Qui Francorum Deo colla

subiugasti pinguia,
Dehinc rubro rore tinctus

penetrasti aethera.

9. Christi piscis, o Laurenti,
te nunc supplex adeo,

Quem assavit Daciana
fervens persecutio,

Ut ab omni vitiorum
me mundes contagio.

10. Fortis mecum sta, Vincenti,
contra trucem viperam,

Ut hac vita te iuvante
consequar victoriam

Et in caelis praeparatam
victoribus gloriam.

11. O Thebaea sublevata

super astra legio,
Quae draconem durum claro

superasti proelio,
Hunc eundem mihi subde,

te nunc pie flagito.

12. Bellatores gloriosi

invictique martyres,

Quos produxit ex se mater
velut vitis palmites,

Me vobiscum hinc transferte
supra caeli cardines.

13. Pastor alme, Nicolae,

poli civis inclite,
Caeli regem in decore

fac me tecum cernere,
Cuius mira claritate

fungeris assidue.

14. Meritorum luce falgens
Martine sacerrime,

Quem diversae gentes laudant
per orbem magnifice,

Me nitentes iugulare
potenter persequere.

15. Monachorum, Benedicte,
doctor insignissime,
Venenata dirae lupae

flammas in me destrue
Et da mihi tuae sanctae
iugum ferre regulae.

16. Sancte pater, dux, Ebrulfe,
monachorum inclite,

In extremo mens esto
defensor examine

Et me prece fac solaris
civem Ierosolymae.

17. Sempiterni regis miles,

Aegidi clarissime,
Incursantes me demerge

Acherontis carcere,
Ut excelsum ad Olympum

laetus possim tendere.

18. Confessores, quos munivit

fidei confessio
Nec a Deo separavit

carnis titillatio,
Vestra prece mihi sitis

semper in auxilio.

19. Monachorum sacer chorus

et cultores eremi,
Quibus pastum praebuere

panes cinericii,
Illum pro me supplicate,

in quo gloriamini.

20. Iam, Maria Magdalena,

mihi sis piissima
Et arcentes me culparum

nexus prece disliga,
Qui te nitor sequi mea

lugendo flagitia.

21. Generosa Katherina,

Christi sponsa fulgida,
Ipsum pro me interpella

prece constantissima,
Ut ab ipso vehar post hanc
vitam super aethera.

22. Virgines electae Dei,

Fides, Spes et Charitas,

Quas nequivit superare
Adriana feritas,

Me servate, ne malorum
me laedat perversitas.

23. Iam a Deo coronatae
virgines et viduae,

Quae nocivos ignes docte
meruistis vincere,

Saevientis in me flammas
Veneris extinguite.

24. Omnes sancti, apud Deum
pro me intercedite,

Quatenus inferni poenas
valeam evadere

Et a culpis liberatus
caeli regna scandere.

25. Laus et virtus et potestas
patri sit ingenito,
In eodem permanenti

honor unigenito,
Ab utrisque procedenti
gloria paraclito.