451. De sancta Theodosia.
Ad Nocturnum.

1. Plaudat turba coelestium
In virginis victoria,
Quam praesidis flagitium
Per dira probat crucia.

2. Distendi nervis virginem
Jubet Urbanus affici
Et corporis compaginem
Insaniens carnifici.

3. Feruntur multiplicium
Martyriorum machinae,
Fit et concursus gentium
In tam miro certamine.

4. Virgo perstat immobilis
Furente nequam judice,
Exsultat cordis jubilis
Suae mortis opifice.

5. Suscipiunt in oleum

Frigendam Christi famulam,
Suspendunt in equuleum
Ministri Deo sedulam.

6. Discerpunt corpus ungulis,
Torquent, appendunt crinibus,
Et spernitur jam credulis
Satan Christum credentibus.

7. Doctores cum fidelibus
Ac virgines cum virgine
Haerent Christum laudantibus
In vero mentis lumine.

8. Projicitur in pelagus
Ligata saxi pondere,
Eripitur et coclitus
Divino sacro munere.

9. Lassantur ferocissimae
Ferae sacratae virgini,
Fuit post hanc mitissimae
Sanctitatis indagini.

10. Percussa collo gladio
Scandit coeli cacumina,
Consumptaque martyrio,
Patent divina limina.

11. Per hanc pater cum filio.