34.

1. Isaias cecinit
Synagoga meminit,
Jesse radix exeret
Virgam, virga proferet
Florem, flos amygdala,
Synagogae scandala.

Aridula

Virguncula
Vivificat, fortificat,

Fructificat,
Ecce ministerium,
Virgo verbo peperit
Verum Dei filium.
2. Haec est illa virgula,
Moysis miracula,
Colubros percutiens,
Sibi se reficiens.
Haec divisit maria,
Nota ministeria,

Cum lavimur,

Renascimur,
Colligimur, in vipera

Mens extera
Et in forma baculi
Veri vera legitur
Figura signaculi.

3. Tityre, tu patulae
Largitatis sedule,
In honore baculi
Psallunt nugigeruli;
Omnes gentes plaudite,
Diem festum agite

Cum tympanis,

Cum organis,
Cum vocibus multisonis,

Mirisonis:
Ecce dies inclitus,
Totus ludis deditus,
Omnis ludat spiritus.
4. Ludite, si sapitis,
Nemo sani capitis
Hunc ludum redarguat,
Si persona congruat,
Quae sit digna baculo,
Quae non parcat loculo.

Sint omnia

Communia
Habentibus, egentibus

Et omnibus
Esto procul, parcitas,
Erit baec solemnitas
Largitatum largitas.