17.

1. Si Deus est animus,

Dii nostri sunt animi,
Menti quod imprimimus,

Faciamus imprimi
Divinis operibus;
Sit in actibus,

Quod mens concipit,

Si quod recipit.

Fides praecipit;
Nam ut lucis munere

Caret lampas vacua,
Sic et sine opere

Fides jacet mortua.

2. Notum fecit Dominus

In conspectu gentium,
Angelis paulominus

Coronavit socium
Suae carnis hominem,
Qui per virginem

Et in virgine

Et pro homine

Sine semine
Nostram carnem induit,

Sui formam capiens,
Quod erat, non exuit,

Quod non erat, vestiens.

3. Angelus consilii

Nobis sit consilio,
Incarnati filii

Nova incarnatio
Innovans nos renovet,
Carnis refovet

Titillatio

Nos in vitio,

Quos conceptio
Sic matris quod filiae

Suo partu foveat,
Flore pudicitiae

Caro nostra floreat.

4. O felix commercium,
Descendit ut pluvia

Virginis in gremium,
Qui creavit omnia ;

Ex compluto vellere

Grato foedere
Agnus nascitur,
Natus pascitur,
Passus moritur,

Morte mortem destruit
Die surgens tertia,

Et Golias corruit
Sua perdens spolia.

5. Nihil est incertius

Rebus in ambiguis
Hora mortis, certius

Nihil mori adstruis;
Ergo mori cogites,
Mortem dubites,

Ne sit impia,

Vita vitia,

Christi gratia
Ne sit vita vacua,

Constans sis ut azimus,
Fides non est mortua,

Si Deus est animus.