378. In ss. Philippi et Jacobi.

1. Refulget jam solemnitas
Apostolorum annua,
Adsit nobis laetitia
Et spiritalis gloria.

2. Quorum unus est Jacobus,
Alter Philippus dicitur,
Coelestis regis milites,
In passione nobiles.

3. Dei dilectus Jacobus
Ordinatur episcopus,
Hierusalem ecclesiam
Primus rexit catholicam.

4. Apellatus a gentibus
Oblias et sanctissimus,
In omnibus laudabilis,
In doctrina mirabilis.

5. Nunquam est usus balneis
Nec mundanis deliciis,
Non est perunctus oleo,
Indutus neque laneo.

6. Soli licebat ingredi

Sancta sanctorum in populis,
Orans pro indulgentia
Cunctorum negligentia.

7. Perstabat in ecclesia
Flectendo semper genua,
Ut callum sibi jugiter,
Instar cameli cresceret.

8. In fide Christi positus
Amabatur ab omnibus
Nocteque die praedicans
Et multos Christo consecrans.

9. Supra templum sanctissimum
Jussum amore populum
Judeorum consilio
Dejicitur pinnaculo.

10. Mox per fullonis perticam
Suscepit mortis gloriam,
Percussus est in cerebro,
Conjunctus Christo Domino.

11.Alme patrone Jacobe,
Nostros reatus dilue,
Ad coelum servos subleva
Dans nobis vitae praemia.

12. Philippe, te cum Jacobo
Deprecamur apostolo,
Ut paradisi gaudiis
Nos jungas tuis meritis.

13. Te, Christe, fili altithrone,
Collaudamus assidue,
Tuorum preces suscipe
Et nos colloca in aethere.