344. De sancto Mercurio.
In Laudibus.

1. Laudes Mercurii dicere martyris,
Virtutum titulis cogimur arduis,
Christi militiae belliger inclitus
Terris enituit quibus.
2. Bellator validus, providus hostium
Calcavit cuneos visibiles prius,
Mox invisibiles sustinuit globos,
Munitus stabili fide.
3. Nec flecti monitis nec potuit minis,
Nec poenis variis et cruciatibus,
Victor corporei spiritus aggeris
Liber sidera prospicit.
4. Poenae multiplicant multiplices bona,
Et tormenta parant plurima gaudia,
Servat propositum purus et integer,
Per quod sidera possidet.

5. Sectus non timuit, dum caro finditur,
Nec dum scissa cutis traditur ignibus,
Nec possunt lapidis claudere pondera
Christum labra vocantia.

6. Christum lingua sonat, mens bene conscia
Nil praeter Dominum postulat et rogat,
Defixis oculis aethera respicit,
Promissam requiem sitit.

7. Cervix carnifici lactea traditur
Et sanctum gladio subjicitur caput,
Miles signiferi dona capit sui
Nunquam deficientia.

8. Nunc coelo residens ad Dominum preces
Nostras cum lacrimis votaque conferat,
Ut commissa Deus crimina deleat,
Concedat sua gaudia.

9. Qui firmas animos, rex pie, martyrum
Et justis tribuis praemia largius,
Peccantum lacrimas respice, poscimus,
Clemens esto rogantibus.

10. Sit patri Domino gloria, laus, honor,
Semper sit Domino gloria filio,
Sancto spiritui gloria sit simul
Et laus saecla per omnia.