196.

I.

1. Imperatrix

angelorum eximia,
Tu me dignare
Te laudare,

Dulcis virgo Maria,
Gabrielis affatu,

virgo regia,
Dum salutaris,
Deum paris,

Christi mater pia.

2. Tu lux coelestis curiae,
Speculum innocentiae,

Munditiae exemplum,
Tu plenitudo gratiae.
Tu celsitudo gloriae,

Tu caritatis templum.

3. Imperialis

aula, summus thalamus,
Quem pietatis

irroravit balsamus,
Tu lex, tu vera

legis expositio,
Tu testamenti series,

Tu prophetarum provisio.

II.

1. Tu cedrus altitudinis

in Libano,
Tu flos odoris
Et decoris,

Tu sine spina rosa,
Tu cypressus in Sion

juncta platano,
Tu es oliva
Fructu viva,

Fronde speciosa.

2. Tu gemma pudicitiae,
Mater misericordiae,

Tu verbi Dei cella,
Tu pacis et concordiae
Munimentum, vas gratiae,

Tu claritatis stella.

3. Nardus odoris,

frutex aromatica,
Tu virgo Jesse,

soboles Davidica,
Tu es virtutis

omnis receptaculum,
Tu castitatis thalamus,

Tu pacis habitaculum.

III.

1. Tu finis mortis,

tu vitae principium,
Tu mater Dei,
Mater spei,

Tu virtus, tu sophia,
Tu salutis portus,

tu spes fidelium,
Tu stella maris,
Lux lunaris,

Veritatis via.
2. Tu turris fortitudinis,
Tu vera mater luminis,

Tu rutilans aurora,
Tu fons beatitudinis,
Tu sacri cella numinis,

Securitatis prora.
3. Tu firmamenti

splendor, tu lux siderum,
Tu exsuperans

caritas luciferum,
Tu coeli porta,

tu coelorum ambitus,
Tu thronus regis omnium,

Tu sanctitatis aditus.

IV.

1. Tu angelorum

laus et exsultatio,
Tu es cunctorum
Electorum

Claritas amoena,
Tu orphanorum

pia consolatio.
Mater benigna,
Laude digna,

Tu virgo serena.
2. Tu via viris invia,
Tu parens paris nescia,

Tu salus sine mora,
Tu sol illustrans omnia,
Tu sola plena gratia,

Tu filium exora.
3. Poenitentiae

ut mihi det spatium
Et patienti

tribuat solatium,
Ut post hanc vitam

in coelesti curia
Conregnem sanctis omnibus,

Amen, amen, in gloria.