54.

1. Pater noster commiserans

Filiorum excessibus,
Eos falli considerans

In peccati contractibus,
Tutorem sibi dirigit,
Qui pro pupillis transigit

Vitam morte mercatur,
In poena culpam destruit,
Scelus in nece diluit,

Vincit, cum judicatur.

2. Quicunque vult salvus esse

Attendat subtilius,
Quod velut nequit obesse

Vitro solis radius,
Sic servantur primitiae
Carnis matris et filiae,

Nec stupeat natura,
Ejus enim destruere,
Cujus fuit et condere

Fragilitatis jura.

3. Ergo credo in Deum,

Cujus misericordia
Conciliavit reum

In sera poenitentia,
Raptus raptorem rapuit,

Metit in messe stipulam,
Quod signat, cum fel renuit

Gustans, et tradit regulam,
Ne desperet in sceleris

Quatriduanus tumulo,
Finalis enim operis

Causa servatur calculo.