289. De sancto Lupo.
Ad Processionem.

1. Praesulis, ecce, Lupi reboant praeconia sancti,
Alma dies colitur praesulis, ecce, Lupi.

2. Candida turba sonat coelorum regna per alta,

Christicolae jubilant, candida turba sonat.
3. Euge, beate nimis arcem qui scandis Olympi,

Regna tenens superum, euge, beate nimis.
4. Urbs redimita satis, germen quae nobile prodis,

Tullo, diu gaude, urbs redimita satis.
5. Funera ne dubites, cum sis puer ipse parentis,

Christus adest genitor, funera ne dubites.
6. Excipe discipulum supplex quem spiritus almus

Doctor Alistichi, excipe discipulum.
7. Corda benigna rigat, cernit quae Christus honesta,

Nectare mellifluo corda benigna rigat.
8. O venerande puer, socios qui praevenis omnes,

Coelitus instructus, o venerande puer.
9. Piminiola tibi policis stat compta lapillis

Intemerata manet Piminiola tibi.
10. Spernis amore Dei, mundus quod mandat honoris,

Cuncta caduca, pater, spernis amore Dei.
11. Fratribus adde Lupum, monachum de milite factum,

Dulcis Amande pater, fratribus adde Lupum.

12. Culmen ad egregium refugis cur scandere, pater,
Plebs te cuncta petit culmen ad egregium.

13. Contulit alma fides varios sufferre labores
Ire per alta freta contulit alma fides.

14. Indue, sponsa Dei, sacro velamine Christi,
Gausape virgineo indue, sponsa Dei.

15. Aequora, arva silent, pelagi depelle timorem,
Imperio Christi aequora, arva silent.

16. Evome pestiferum verbi de corpore virus,
Eloquio victus evome pestiferum.

17. Lumina caeca diu radiarunt fronte puellae,
Sermo patris reserat lumina caeca diu.

18. Ardua castra movent Saxones moenia circum,
Invicti populi ardua castra movent.

19. Viribus imparibus bellum cavere Britones,
Diffidunt acie viribus imparibus.

20. Undique turba fluens pueri juvenesque senesque,
Moesta petit sanctos undique turba fluens.

21. Admonuit populos sanctus baptismatis undam,
Credere quippe Deum, admonuit populos.

22. Vocibus altisonis patrum nemus omne remugit,

Prosequitur populus vocibus altisonis.
23. Gens inimica ruit caeca formidine mentis,

Gurgitis ima taetri gens inimica ruit.
24. Cantica mox resonant lyricis permixta choreis,

Sidera pulsantur, cantica mox resonant,
25. Turba sonora sui conscendit limina tecti,

Culminis alta petit turba sonora sui.

26. Fulgidus auricomis mox intonat angelus astris,

Nuntius arva legit fulgidus auricomis.
27. Solve metum, patria, nulli datur urere flamma,

Tuta manes precibus, solve metum, patria.
28. Turba ferit gladio sanctorum dira catervas,

Corpora tironum turba ferit gladio.
29. Te via Tartarei, te fert Acherontis in undas

Suscipit hos Christus, te via Tartarei.
30. Frigus abesse dedit, calor immensusque recessit,

Saucia membra fovens frigus abesse dedit.
31. Viscera clara patent, taetris infecta venenis,

Lingua reformatur, viscera clara patent.
32. Liniamenta suis animantur languida nervis,

Officiis dantur liniamenta suis.

33. Sospes adest genitus patris virtute redemptus,
Congaudet genitor, sospes adest genitus.

34. Laeta suis mulier gaudet concurrere plantis,
Gressibus assurgit laeta suis mulier.

35. Quis tua signa, pater, doctorum promere callet?
Pangere rite queat quis tua signa, pater?

36. Nullus in orbe tuis signorum maximus actis,
Praefulsit meritis nullus in orbe tuis.

37. Mortis acerba tuo subiisti viscere fracto,
Plura refers animo mortis acerba tuo.

38. O venerande pater, retines qui sideris arcem,
Da veniam famulis, o venerande pater !

39. Esto tuis gregibus verus pastorque benignus,
Arma, salus, requies esto tuis gregibus.

40. Sit procul bostis atrox, manibus simul ore cruentus,
Ne discerprat oves, sit procul hostis atrox.

41. Cantibus harmonicis fratrum te concio promit,
En, cuncti recinunt cantibus harmonicis.