416. De sancto Satyro.

1. Nunc gestis ex veteribus
Novum resultet canticum
Et confessoris incliti
Summum ferat praeconium.

2. Laudandus iste Satyrus
Coelesti jure praeditus,
Pompa clarus Romulea,
Christi sed fide clarior.

3. Ingressus auditorium

Jussu praefertur principum,
Sed huc divertit animum
Fratrem sequens Ambrosium.

4. Ille jam mundi fascibus
Liber sublimem cathedram
Divino tractus numine
Pastor insignis sederat.

5. Cui beatus Satyrus

Promptis parens obsequiis,
Vultu gestaque corporis
Effectus est assimilis.

6. Necdum renatus aequoris
Duras procellas pertulit,
Quas sacramentum Domini
Collo suspendens transiit.

7. Requirens mox ecclesiam
Deo rependit gratiam
Sanctoque lotus lavacro,
Quid possit fides, didicit.

8. Sic admirandus juvenis,
Germani doctus monitis,
Cultu virtutum claruit
In multis exercitiis.