6.

De Nativitate regis gloriae.

1. Rutilat hodie
Dies laetitiae,
Dat sol justitiae
Radios gratiae,
Adest in specie
Nostra rex gloriae.

2. Modo mirabili
In carne fragili
Agit rex saeculi
Salutem populi.

3. Fit virgo tenera
Mater puerpera,
Pendet ad ubera,
Qui regit aethera.

4. Fit pater ipsius
Filiae filius,
Deus non alius,
Quid mirabilius?

5. O generatio
Plena mysterio,
Quam nec ingenio
Nec ullo studio
Explicat ratio
Quovis eloquio.

6. Erant in medio
Cuncta silentio,
Agebat spatio
Nec cursum devio
Alto consilio
Dei dignatio.

7. A throno regio
Videns propitio
Miseros radio,
In hoc exsilio
Nobis in proprio
Subvenit filio.

8. Ergo de patrio
Descendit solio
In matris gremio
Sub carnis pallio
Fortis in proelio.

9. Latet in fictili
Dignitas figuli,
Summus in humili,
Fortis in debili.
10. Tali commercio
Dat se pro pretio
Nostra redemptio,
Et nos hoc termino
Cantemus Domino.