20.

1. Ortum floris

Concinat laus oris,

Vas dulcoris,

Miri flos odoris,
Flos aestatis,
Novitatis,

Radius splendoris,
De beatis
Coeli pratis

Vernans in his oris.
Odor thymiamatis,
Vas plenum aromatis,
Fontismatis,
Baptismatis

Unda purioris,
Firma ratis
Naufragatis

Fluctibus erroris,
Datur natis
Evae gratis

Ortus redemptoris.

2. Exardescit

Rubus nec tabescit,

Virga crescit

Aaron et frondescit,
Alathia
Canit, quia

Sensus obmutescit,
Dum Maria,
Mater pia,

Partu parem nescit.
Patrem parit filia,
Naturae contraria
Sunt talia,
Sed gratia

Caecitas decrescit ;
Homilia,
Prophetia

Praesenti patescit,
Isaia
Teste via

Legis innotescit.

3. Radix Jesse

Pullulat in messe,

Messem esse

Novimus expresse,
Non delevit,
Sed explevit,

Quod erat necesse,
Venter gerit,
Quod mox erit

Manifestans res se.
Caro Deum operit,
Nec pudorem deserit
Sed asserit,
Nil interit

Virginis ob esse,
Mortem terit,
Mortem ferit,

Legem sic implesse,
Jam non erit
Timor, perit

Evae mors transgressae.

4. Plebs fidelis

Careat quaerelis,

Mors crudelis

Fugit plenis velis;
Non invitus
Est unitus

Nostris parentelis,
Per quem strictus
Mortis ictus

Est sub suis telis.
Patris unigenitus
Sumpsit carnis habitus.
Divinitus,
Dam inclitus

Sermo Gabrielis
Est auditus,
Redimitus

Salutis medelis,
Sic sopitus
Culpae ritus,

Deo laus in caelis.