28.

1. Virgo mater salvatoris
Legem sequens hodie
Fert ad templum Dei verbum
sub humana specie.

2. Quem cum senis Simeonis
accepissent brachia,
Sunt impleta justi viri
larga desideria.

3. Hic jam senex hoc responsum
accepit divinitus,
Se non mori, nisi Deum
sic videret primitus.

4. Ut praedictum erat ei
a divinis nuntiis,
Sic accepit benedictum
portandum in brachiis.

5. Ergo coetus noster laetus
nunc et sine termino,
Sicut ille benedixit,
benedicat Domino.

6. Quia Deus incarnatus
pauper esse voluit,
Non spernendae paupertatis
nobis formam tribuit.

7. Cujus ortus universis
exstitit creatio,
Columbarum turturumque
eguit obsequio.

8. Offeruntur hae pro illo
juxta morem pauperum,
Cum sit Deus atque dives
et creator omnium.

9. Offeramus et nos ei
gratiarum munera,
Ut regnare nos concedat
semper super aethera.