CAPUT X.

De gustu.

Gustus objectum est sapor, qui in re saporifera est. Res autem saporifera quando conjungitur humiditati salivari,

immutatur ab ea, et mediante carne spongiosa quae est in superficie linguae, quae est medium intrinsecum, reddit saporem suum in spiritum qui est in nervo interiori. Inde fit quod si humiditas salivaris fuerit infecta amaritudine cholerae, judicat gustus cibum esse amarum : et si sit dulcis, judicat cibum dulcem : et in hoc non fallitur gustus, quod judicat amarum, in veritate enim amaritudo est, sed fallitur, quod ponit eam ubi non est. Medium ergo gustus est quasi duplex, scilicet interius et exterius : intrinsecum est caro spongiosa, extrinsecum est humiditas salivae. Organum autem gustus est nervus descendens a cerebro ad linguam, qui in quibusdam animalibus divisus est, et ob hoc duas habent linguas, ut serpens : in quibusdam vero unicus est, et ob hoc tantum unam habent linguam.