CAPUT VI.

De modo generationis impressionum humidarum.

Nunc autem transeundum est ad eas quae generantur a vapore humido tantum, sicut ros, pruina, pluvia, nix, grando, stillae sive guttae magnae quae cadunt quandoque in aestate. Sciendum autem quod vapor humidus cum sit aqueus, non est inflammabilis, propter hoc quod in duabus qualitatibus igni contrariatur, scilicet in frigido potentia, et humido potentia, licet in actu sit calidus et siccus temperate. Ad hujus vero scientiam praeexigitur ut sciatur quid sit convertens et convertere potens vaporem in aquam, et quid constringens et constringere potens vaporem in glaciem. Convertere igitur vaporem in aquam, est inspissando ad naturam aquae redigere. Cum autem frigoris sit inspissare, sicut calidi disgregare, patet quod omnis conversio vaporis fit per frigus : congelatio autem fit per idem frigus magis confortatum et constringens aquam quae conversa est. Item nota, quod aliqua nubes est conversa in partibus suis, quae scilicet est aqua facta, et aliqua est in via conversionis, quae scilicet est in aquam fieri. Dicendum igitur est quod nihil eorum quae generantur ex humido vapore, est inflammabile. Item quia aqua est elementum magis tenue quam terra, propter hoc calor solis attrahens tales vapores, non multum retinetur ab ipsis vaporibus, sed est exhalabilis per frigus constringens vaporem ipsum : et ideo nullus talium vaporum pertingit per regionem frigoris ad regionem aestus, sed elevatur plus et plus in regionem frigoris excellentis vel

temperati, secundum quod sunt calidiores et minus calidi.