Acta Apostolicae Sedis - Commentarium Officiale430

ROMANA

Beatificationis et canonizationis Servae Dei Tarsillae a Crucifixo Osti (in saec.:

Annae) Religiosae professae Congregationis Missionariarum a SS. Cordibus Iesu et

Mariae (1895-1958)

DECRETUM SUPER VIRTUTIBUS

« In manu Domini sum; quae autem Ipse concedit, iis gaudere placet. (...)

Meis ipsa rebus contenta sum. (...) Eo enim laetitia perfundor, quod usque ad

extremum operam dedi, adeo ut in terram caderem. Sic omnia haec evadant

ad gloriam SS. Cordium, ad salutem meam, pro bono Instituti, pro universo

mundo » (Ex Epistula ad Summam Moderatricem, die 3 Septembris 1958 data).

Haec, quae Soror Tarsilla a Crucifixo Osti (in saec.: Anna) scripsit, tam-

quam eius vitae breviarium necnon spirituale, uti aiunt, testamentum haberi

possunt.

Serva Dei die 6 mensis Decembris, anno 1895, Pietate Iulia (Pola), quae

urbs tunc intra fines Austrohungarici Imperii continebatur, christiano,

quamvis haud multum ferventi, genere nata est; cuius primum nomen, quod

Host, deinceps ad Italicum sermonem ita conformatum est, ut Osti audiret.

Infantula vero, dum septimum mensem agit, rite abluta est - quod quidem

pro eius temporis moribus sane inauditum erat - eique nomen Anna imposi-

tum est. Cum autem in ludum litterarum dumtaxat ire ei liceret, primis

tantummodo rudimentis, tam pietatis, quam humanitatis, puella instituta

est; ideoque, quod ipsa exigua doctrina imbueretur, perpetuae eidem sollici-

tudini fuit. Attamen iam inde ab infante ostendit semet facile aliorum ne-

cessitatibus moveri posse, animo suavi pollere, officiorum praestandorum

studio flagrare; quandoque etiam placuit Deo, quantum praeter ceteros dili-

geret, eidem significare. Anna autem, ne suorum moribus adversaretur, ad

caelicam mensam, quamvis id cuperet, haud saepe accedebat; quin immo ipsa

timiditas ipsaque verecundia, qua puella parentes prosequebatur, moram

atque impedimentum, diu quidem, ei attulerunt, ne ad sacra inclinatam

voluntatem, quam ipsa adulescens intellexit, orientem indicaret.

Exardescente autem priore populorum conflictu, cum Pietas Iulia magna

ex parte desereretur, Servae Dei familia in campum profugis recipiendis, in