1. De sanctissima Trinitate.

In 1. Vesperis.
Antiphonae.
1, Sedenti super solium
Congratulans trishagium

Seraphici clamoris
Cum patre laudat filium
Indifferens principium
Reciproca amoris.
2. Sequamur per suspirium
Quod geritur et gaudium
In sanctis coeli choris,
Levemus cordis studium
In trinum lucis radium
Splendoris et amoris.
3. Si nosse vis haec gemina,
Non semina sed lumina

Consideret Indago,
Lux Deus est Intermina,
De qua res manat gemina,
Tam amor quam Imago.
4. Lux non decisa radium
Diffundens per hoc medium

Multiplicat ardorem,
Sic pater gignit filium
Cum Ipso spirans tertium
Concorditer amorem.
5. Aeterno patri gloria,
Ex quo subsistunt omnia
Per verbum In amore,
Cujus signavit gratia
Nostra suae praecordia
Imaginis splendore.

Ad Magnificat.
A. O Seraphim jucunditas
Et Cherubim limpiditas,
Thronorum robur, Trinitas,
Fac digne te laudemus;

Memoriae sis unitas
Notitiaeque veritas,
Te utriusque bonitas
Perenniter amemus.

Ad Matutinum.
Invitatorium.

Regem trinum et simplicem

venite adoremus,
Trinumque mentis apicem

Ter-uni praesentemus.

In 1. Nocturno.

Antiphonae.

1. Coelum terramque digitis
Qui tribus appendisti,
Praeposuisti conditis
Humanitatem Christi.

2. De Deo Deus prodiens
Se fecit viatorem
Scanditque cursum finiens
Distribuens calorem.

3. Leventur cordis ostia:
Memoria gignenti,
Nato Intelligentia,
Voluntas procedenti.

Eesponsoria.

1. Confirmat hoc mysterium
Sacrarium scripturae,
Nam dixit auctor omnium,

Ut essent creaturae,

Verbum dedit Initium

Vertibili naturae.

V. Hoc, summae lucis radium,

Hoc verbum dico filium

Aeternae geniturae.

2. Qui coeli fecit ambitum
Molisque non fecundae
Supertulisse spiritum

Informi fertur undae,
Eundem hic paraclitum
In nos fudit abunde.
V. Per hunc donatur caritas,
Per hunc mentis vacuitas
Impletur gemebundae.

3. Arcani dat Indaginem
In opere finali,
Qui plasmans ait hominem

Sermone numerali:
Ad nostram sit Imaginem
In apice mentali;
V. Cum simplex esset operans,
Sic tamen ait numerans
Re sola personali.

2. Aeterna mundi serie
Conceptum sapientiae

Fert Salomon praeisse,
Paris efficientiae
Communisque laetitiae
Cum Domino fuisse ;
V. Tres sunt In throno gloriae
Parens, proles, laetitiae
Per natum nobis missae.

3. Quis aquis vestem tribuit,
Quis spiritum continuit
In manu more doni?
Judaei juris Inscii,
Quod nomen ejus filii,
Hoc dicant Salomoni.
V. Jesus, quem, Qui Est, genuit,
Per donum qui nos Induit,
Subjectus lotioni.

In 2. Nocturno.

Antiphonae.

1. Excelso regi gloriae
Psallamus sapienter,
Concordet vox memoriae
Notitiae gaudenter.

2. O paucis quondam Trinitas
Sion nota colonis,
Quam laudat grandis civitas
Ad fines aquilonis.

3. Descendit Dei filius

Ad pauperis honorem
Manavit coeli fluvius
Amoris rigans florem.

In 3. Nocturno.
Antiphonae.

1. A coeli, terrae termino
Laus judici venturo,
Levetur trino Domino
Vox, manus corde puro.

2. Supernae lucis radius
In nube fulguravit
Et Ignis regi praevius
Contraria purgavit.

3. Cor cantet, vox et opera,
Concordet psalmo lyra,
Nam brachio cum dextera
Rex coeli fecit mira.

Eesponsoria.

1. Quod Abraham ad ostium
Per trium contubernium

Virorum speculatur,
Dum trium differentium
Indifferens dominium
Adorans protestatur ;
V. In his vidit Indicium
Trium, quorum fastigium
In nullo separatur.

Eesponsoria.

1. Candor lucis, perpurum spe-
culum,
Patris splendor perlustrans

saeculum,
Nubis levis Intrans umbraculum
In Aegypti venit ergastulum.
V. Virgo circumdedit virum
Mel mandentem et butyrum.

2. A veterani facie

Manavit ardens fluvius,
Antiquus est Ingenitus

Et facies est filius,
Ardoris fluxus spiritus.

Duorum amor medius;
V. Sic olim multifarie

Prophetis luxit Trinitas,
Quam post pandit ecclesiae

In carne fulgens veritas.
3. Sequamur testimonium,
Quod patri super filium

Complacuit effari,
Cui spiritus solatium
Columbae per prodigium

Ostendit Immorari;
V. Hoc probat turba testium,

Qui signis lucent clari,
Nec haeresis mendacium

His potest refragari.

Ad Laudes.
Antiphonae.
1. Quam clara testimonia
Nimisque credibilia

Praecelsae Trinitatis
Oracula, miracula,
Imagines et specula,
Quae lucent In creatis.
2. Cum laudibus et jubilis
Colatur Increabilis

Patronus populorum,
Quo generata veritas
Donataque suavitas
Sunt pascua coelorum.

3. In te, fons vitae, sitiunt
Te trinum panem cupiunt

In Invio vexati ;
Dum benedici supplicant,
Ter nomen Dei replicant
Intenti Trinitati.

4. Tres In fornacis medio
Cum quarto quasi filio

Coelestis geniturae
Trino rerum principio
Psallerunt In vestigio

Totius creaturae.

5. "Laudet factura Dominum.
Imponit laudi termimum

In copia sermonum ;
In te sit finis carminum,
Per natum, pater luminum,

Et par utrisque donum.

Ad Benedictus.

A. Quam felix coeli civitas,
Cui splendet trina claritas,
Quamque jucunda visio.
Lustrari trino radio
Mulcebris ardoris!
Illustra, Deus oriens,
His, qui sedent In tenebris,
Ne tendat grex caecutiens
Circumdatus Illecebris
In viam erroris.

In 2. Vesperis.

Ad Magnificat.

A. Aeterna mens, dum flectitur
In se, par proles nascitur

Notitiae mentalis,
Simplicitatis ratio
Concludit, ut distinctio

Personae sit aequalis.
Jucundaque germanitas
Requirit, ut par caritas

Sit duum niedialis;
Hic sanctus exstat spiritus,
Quem donet nobis coelitus

Cum nato principalis.