CAPUT I.

Quae libri intentio, et quis dicendorum in libro isto sit ordo.

Nos autem jam in praehabitis diximus de coelo quod est primum inter corpora simplicia, et determinavimus de ipso secundum totum, et determinatione acquisita quoad ea quae in naturis quaeri habent de ipso et de partibus ejus, diximus quae partes sunt stellae et orbes tangendo ex quibus substantiis sunt materialiter, et quae vere sunt secundum formam : diximus enim quod non sunt ex aliquo quatuor elementorum, sicut nec ipsum coelum, nec est alicujus elementi : et ostendimus quod nec ipsum coelum neque partes ejus cadunt sub corruptione, eo quod sunt ingenerabiles : et haec omnia cum sibi conjunctis in duobus praecedentibus libris quam nobis sufficere videbatur determinavimus. Nunc autem intendimus de mobili secundum rectum motum, quod est grave vel leve : et ideo ad sequentium tractandorum scientiam dicemus, quod rerum naturalium quaedam sunt substantiae, et quaedam quae sunt ex actione vel impressione substantiarum naturalium. Dico autem substantias naturales inter mobilia recto motu corpora simplicia, et ex his composita : corpora enim simplicia sunt ignis et terra, quorum unum est simpliciter leve, et alterum simpliciter grave : et reliqua corpora quae sunt media istorum, composita

autem ex his, sunt lapides, et animalia, et plantae, et similia istis. Actiones autem voco motus horum simplicium corporum, et eorum corporum quae causantur materialiter ex istis, quae sunt corpora composita, ut diximus. Impressiones autem voco alterationes ipsorum ad invicem, et permutationes in quantitate, et formas secundum quas fiunt alterationes et permutationes eorum. Ex his autem facile constare potest cuilibet, quod omnis quaestio physica est de corporibus physicis : quod probatur ex hoc quod substantia naturalis, aut est corpus, aut est in corpore : probatur autem et hoc his quae diximus in primo Physicorum, ubi locuti sumus de primis principiis, quae sunt principia primorum corporum transmutabili um, quae sunt elementa, ubi etiam ostendimus ostensione exquisita dividendo eam per omnes naturae intentiones in secundo Physicorum : cum enim loqueremur de principiis naturae, ostendimus quod principia corporis transmutabilis secundum quod est permuta. bile, sunt ingenerabilia et incorruptibilia, et hoc expresse probavimus de natura quae est materia, et diximus etiam de natura quae est forma, per hoc quod diximus quod ipsa est divinum et optimum in quod est naturae desiderium, sicut quilibet legere et advertere de plano poterit in his quae scripsimus in fine primi Physicorum. Ex quo ergo de principiis horum corporum transmutabilium dictum est, est intentio nostra dicere de ipsis corporibus mutabilibus : et quia simplicium est motus rectus localis in ipsis, ideo dicere de his secundum quod sunt mobilia motu recto : secundum enim quod mobilia sunt motu alterationis et transmutationis eorum ad invicem, loquemur de ipsis in libro Peri geneseos, Domino concedente. Haec autem corpora de quibus loqui habemus in genere secundum formas locales motus in eis facientes, duo sunt corpora, grave scilicet et leve : et gravia iterum duo, scilicet terra et aqua : et levia duo, scilicet ignis et aer . Dicemus ergo post hoc generationem et corruptionem : eo quod omnibus generabilibus accidit generari et corrumpi ex his duobus corporibus quae diximus esse grave et leve : et ideo in esse generationis debet esse utrorumque istorum rememoratorum.

Et per ista oportet nos dicere in quibus est generatio : et quia in omnibus illis est generatio physica, quae sunt composita ex gravi et levi, et sunt gravia et levia simplicia : aut enim generatio omnino non est, aut si est, tunc stans et radicata in corporibus dictis, quatuor scilicet elementis, et in his quae componuntur ex eis : sed tamen antequam loquamur de istis corporibus, oportet nos quaerere propter doctrinae bonitatem, an sit generatio omnino, an non : quia licet hic loqui de generatione non intendimus, tamen ea corpora de quibus loquemur, sunt generabilia, et sunt gravitas et levitas de quibus nos loqui oportebit in isto nostro libro.