78. De s. Valeria Lemovicensi.

In 1. Vesperis.
Ad Magnificat.

A. Magnus es, rex Christe, sponse

Valeriae virginis,
Quam illustras et hic signis

et in caelo praemiis,
Sonet tibi, sonet illi

laus et honor celebris.

Ad Matutinum.
Invitatorium.

Virginalis palmae Christum
adoremus praevium,

Pro quo caesa Valeria
vexit caput proprium.

In 1. Nocturno.
Antiphonae.

1. Natalibus egregia
Et moribus Valeria
De genere gentilium,
De spinis fulsit lilium.

2. Haec et in ipsis ritibus
Non gentilis gentilibus,
Iam Christo Christi nescia
Vivebat horrens vitia.

3. Mente praesaga caelitus,
Dono praeventa spiritus,
Carne mansit virginea
Rosa de stirpe spinea.

4. Idola cernens deici
Ex viri apostolici
Martialis sermonibus,
Lavatur sacris fontibus.

5. Stephano, duci Galliae,
Sponsata dotes gratiae
Sponso terreno praetulit,
Hinc dura mortis pertulit.

6. Die noctuque Domino

Supplex pro sponso Stephano

Ei vitam obtinuit,

Per quem caesa occubuit.

In 2. Nocturno.
Antiphonae.

1. Dux fremit ira Stephanus,
Intus ardens ut clibanus,
Dum se sperni considerat,
Sanctam punire properat.

2. Occurrit imperterrita
Nec auditur dans monita,
Sed ferit illam impiger
Mox feriendus armiger.

3. Caput caesum fert brachiis
Ad sanctum sancta propriis,
Durities marmorea
Plantis cedens fit cerea.

4. Illator mortis moritur,
Sed sancti prece redditur,
Sic dux ad fidem ducitur,
Stupet, credit, abluitur.

5. Caelum scandit aethereum
Per globum martyr igneum,
Concentus tunc angelicus,
Clangor auditur caelicus.

6. Vale, valens Valeria,
Tempore primiceria
Postpassum Christum Dominum
Agonizantum virginum.

In 3. Nocturno.
Ad Cantica.

A. O Valeria, lilium,

O lux, o rosa caelica,
Quae nos tibi offerimus,
Offer Deo tu cantica.

Ad Laudes.
Antiphonae.

1. Laudes decent Valeriam,
Domum tuam, rex, regiam,
Haec parata sedes tua
Visat nos ad festa sua.

2. Conhibilemus Domino,
Qui sponsam suam gemino
Coronat diademate
Suo signatam stigmate.

3. Adhaesit post te anima
Et caro mea victima,
Tuaque, Deus, dextera
Me suscepit in aetbera.

4. Deo sit benedictio,

Qui sponsam de incendio

Babylonis eripuit,

Dum sponsnm virgo respuit.

5. Auctorem unum omnia
Collaudent laude socia,
Valeriae qui gloriam
Dedit sicut victoriam.

Ad Benedictus.

A. Hodie sponsa regia
Sponsum petit Valeria,
Hodie ab angelicis
Fertur choris hymnidicis,
Hodie thronum roseum
Per globum scandit igneum.

Haec sedentes in tenebris
Illustret lampas celebris,
In viam pacis dirigat,
Ad regnum lucis adligat.

In 2. Vesperis.
Ad Magnificat.

A. O Domini pietas,

o Christi summa potestas,
Morte petit roseas

Valeria virgo choreas,
Magnificat Dominum,

cum virgineum canit hym-
num ;
Impetret haec nobis
aeternae gaudia lucis.