590 Acta Apostolicae Sedis - Commentarium Officiale

comperit laborari: nam, mense Martii anno 1929, ita ardentissimis febribus

iactata est, ut mortem eidem impendere censeretur. Novitiatum, verumta-

men, adiit. Quibus in adiunctis, proinde, Serva Dei victimam misericordis

amoris sese obtulit et gradatim ita in contemplationem mysterii Sanctissi-

mae Trinitatis mersit, ut nomen suum in Mariam a Trinitate immutaret.

Anno 1933, vota religiosa perpetua oblatae in Monasterio Sancti Pau-

li extra Muros in Urbe professa est, quibus operis semper perfectissimi

persequendi et praesertim veritatis inhabitationis Sanctissimae Trinitatis

in anima christifidelium vivendae ac pervulgandae etiam adiecit promis-

sum. Trinitaria inhabitatio sic eius vitae et missionis in Ecclesia facta est

cardo.

Vocatione ad fidem percepta, Serva Dei vitam caritate et humilitate

summopere degit praeditam. Mens et viscera eius, noctu dieque sive in

negotiis sive in otiis pariter et diutinis in horis orationis semper ad Patrem

et Filium et Spiritum Sanctum Deum tetenderunt, qui cellae una et animae

eius perquam potitus erat. Divinam voluntatem perficere iugiter enisa est,

per quam ad universum mundum dilatato corde spectavit amplectendum.

Haec omnia vero praecipuis rationibus ac magnae spiritualitati innitebantur,

Dei scilicet primatui usu rerum asseverato et oratione pasto filialique erga

Beatam Mariam Virginem pietati summaeque doctrinae Ecclesiae adhaesioni

et absolutae eiusdem Pastorum fiduciae.

Servae Dei nihil aerumnarum conflictationumque ac discordiarum de-

fuerunt, quibus coram autem viam perfectionis in caritate semper invenire

valuit. Vita eius itaque in verum mutavit altare, e quo Christo divinitus

coniuncta suipsius sacrificium aeterno Patri cotidie offerebat, et anima facta

est divinae caritatis flamma omnino exarsa. Sollicitudo proximi habitum

eius omnem et omne verbum cohonestabat, cum aures porrigebat vel con-

firmationem solaciumve dicebat vel consilium subiciebat vel praeceptum

denotabat. Primaevus spiritus animum eius stupore semper affectum et

divinae novitati gratiae reseratum servavit.

Consequentibus annis, pluribus spiritualibus commerciis ditata est mi-

rabilibus, quorum culmen mysticae nuptiae eius fuerunt, et infestam dae-

monii praesentiam animadvertit. Anno 1937, magisterium reliquit et postea

Memoriale ab ipsa conscriptum Summo Pontifici Pio Papae XII perhibuit

recognoscendum, qui approbationem concessit. Ianuae, die 29 mensis Aprilis

anno 1957, in Domino quievit.