QUAESTIO CXLII.

Qualiter illud privilegium quod est mater et virgo, ponatur infer privilegia gratiae, cum non videatur esse gratuitum ?

Sequitur videre de illo privilegio quod est mater et virgo, de quo quaeritur primo, qualiter ponatur inter privilegia gratiae, cum non videatur esse gratuitum ?

Quod sic probatur :

1. Utrumque potest esse cum peccato, scilicet esse virginem et esse matrem : ergo neutrum potest esse gratuitum.

2. Item, Quaelibet pars compatitur secundum se peccatum mortale : ergo et totum.

3. Item, Ex duobus indifferentibus non fit unum gratuitum. Ex his videtur, quod illa particula non debeat poni pro privilegio.

4. Item, Quod non conveniat ipsi soli, videtur : quia Philosophus dicit, quod sexus est in plantis, et est planta mascula et planta foemina : et una planta generat aliam plantam sine corruptione, sine commixtione : ergo ibi simul est mater et virgo.

5. Item, Ecclesia est simul mater et virgo : ergo non solum beata Virgo. Si dicatur, quod Ecclesia dicitur mater et virgo spiritualiter, et beata Virgo corporaliter. Inde sic : Nobilior et verior et perfectior est maternitas et virginitas spiritualis quam corporalis : ergo Ecclesia verius et nobilius et perfectius dicitur mater virgo quam beata Virgo.

6. Item, Virgo nubens in charitate, nullam perdit virtutem : ergo si prius habuit virtuosam virginitatem, adhuc habet : et fit mater : ergo habet et maternitatem et virginitatem simul : ergo est mater virgo.

7. Item, Quidquid est in inferioribus pertinens ad dignitatem, est in superioribus : sed Angelus non generat Angelum: ergo hoc non pertinet ad dignitatem : ergo etiam hoc non debuit esse privilegium.

Contra :

1. Homo est dignissima creaturarum : ergo generatio hominis est nobilissimus effectus naturalis : ergo generatio nobilissimi cujusdam hominis est effectus nobilissimus : sed. effectus nobilissimus non est nisi nobilissimae substantiae, juxta illud Lucae,VI, 44 : Unaquaeque arbor de fructu suo cognoscitur : ergo generatio nobilissimi hominis erit nobilissimus effectus generantis hominis : sed unus solus est homo nobilissimus : ergo uni soli convenit esse matrem illius : ergo ejus maternitas est privilegium unius solius.

2. Item, Effectus hujusmodi generationis fuit perfectus in summo : sed perfectior generatio est ubi unus de uno, quam ubi unus de duobus : ergo in ista generatione debuit esse unus de una : ergo illa fuit mater virgo.

3. Item, Ad perfectam generationem sequitur secundum naturam perfectissima maternitas : sed perfectior et nobilior est maternitas cum incorruptione quam cum corruptione : sed ista fuit perfectissima : ergo debuit esse cum virginitate : ergo debuit esse mater virgo.

4. Item, Quidquid est in arte exemplari divina, totum debet esse exemplatum et declaratum in exemplo creato : ergo generatio divina debet aliquod habere exemplum in natura : sed ibi unus est de uno sine corruptione, divisione, vel mixtione : ergo et hic unus de una sine corruptione : ergo erit mater virgo.

5. Item, Prima dignitas in divinis quae est communicabilis creaturis, est a quo alius per generationem : ergo et haec prima et summa dignitas naturalis : ergo et in hoc potest esse dignitas et privilegium gloriosae Virginis super omnia.

6. Item, Homo est minor mundus : creare autem mundum majorem est privilegium Dei : ergo generare mundum minorem privilegium potest esse hominis.

7. Item, Deus melior mundo est : ergo plus est Deum generare, quam creare mundum.

8. Item, Virginitas prout fuit in beatissima Virgine, fuit recessus ab omni malo : maternitas fuit ei collatio omnis boni : ergo omne eligendum et appetendum intelligitur in hoc privilegio.

9. Item, Quod hoc soli conveniat beatissimae Virgini, probatur hoc modo : Isa. lxvi, 7 : Antequam parturiret, peperit : antequam veniret partus ejus, peperit masculum. Et infra, v. 8 : Quis audivit umquam tale ? etc. Item, Ecclesia cantat : " Nec primam similem habere visa est, nec habere sequentem. " Item, Dionysius dicit, quod hoc erat omnium novorum novissimum.

Ad hoc dicimus, quod privilegium beatissimae Virginis est, quod sit mater Virgo, et quod nec sua virginitas nec sua maternitas fuit indifferens, sed utrumque meritorium. Ejus enim virginitas fuit perfectissima corporis integritas et cordis, ex radice summae charitatis. Ejus quoque maternitas sibi fuit in meritum: quia ipsa cum congruo merito fidei, spei, et charitatis et suae excellentissimae humilitatis meruit fieri mater Dei.

Item, Ex his patet solutio ad objecta de Ecclesia et de planta, Ecclesia enim non habet in omnibus membris integritatem carnis et mentis, et in nullo habet integritatem cordis et carnis cum summa foecunditate spiritus et corporis, excepta perfectissima virginitate beatae Virginis et foecunditate. Sed et illam spiritualem virginitatem et foecunditatem quam habet Ecclesia in aliis membris, habet beata Virgo in se excellentissime cum aliis communem, et insuper istam privilegia-

tam singularitatem. Sed nec etiam planta suo modo habet virginitatem et foecunditatem. Et quidem suo modo virginitas et maternitas dici posset, si simul virorem floritionis cum partu fructificationis reservaret, ut dicere posset: Flores mei fructus honoris ei honestatis . Sicut amygdalus illa quae virginis matris fuit figura, et eam quodammodo sub umbra et aenigmate quodam futurae ostensionis conamine repraesentavit.