QUAESTIO CXXXII.

Utrum statim in corpore et anima assumpta fuerit ?

Postea quaeritur, si statim in anima et corpore assumpta fuerit?

Et videtur, quod non.

1. Primo per sermonem Hieronymi: " Cogitis me, o Paula, " etc. ubi dicit: " Multi nostrorum dubitant. "

2. Item, Augustinus : " Vera de ejus assumptione sententia haec esse probatur, ut secundum Apostolum sive in corpore, sive extra corpus, ignorantes, assumptam super Angelos eam esse credamus . " Item, Hieronymus : " Humanum judicium non apponat manifestum, quod Deus voluit esse occultum.

3, Item, Quidquid non separatur a culpa, nec a paena : sed omnes in Adam peccaverunt: ergo omnes in suo peccato vel pro suo peccato puniri debent: sed ei imponitur paena, Genes, iii, 19 : Pulvis es, et in pulverem reverteris, etc. : ergo omnes in peccato nati corporaliter debent incinerari.

Contra :

1. Gregorius in Collecta : " Nec tamen mortis nexibus deprimi potuit, quae Dominum nostrum Jesum. Christum de se genuit incarnatum. " Modo quaero, quid appellatur nexus mortis? vel est bonum, vel est malum. Non bonum : quia omnis boni capax fuit. Item., bonum non deprimit, sed elevat. Ergo nexus non nominat ibi aliquid boni. Si autem est malum, aut est malum culpae, aut malum poenae. Non culpae: quia mors non est nexus ad culpam : quia post mortem non est status culpae, sed paenae. Item, nihil dictum esset, quod post mortem non posset peccare, quia esset.mater Dei, cum post mortem nullus peccet. Si autem est malum paenae, quaero quam paenam importat ? Non gehennae : quia ad illam non nectit mors : quia multi moriuntur, qui non vadunt ad gehennam. Eadem ratione nec ad purgatorium : quia multi moriuntur, qui non vadunt ad purgatorium. Nec etiam potest dicere paenam temporalem : quia ad. illam non nectit mors, sed absolvit ab illa. Item, non potest dicere paenam mortis : quia beatissima Virgo vere mortua fuit. Ergo relinquitur, quod non potest significare nisi incinerationem : ergo erit sensus: Non potuit nexibus mortis deprimi, id est, non potuit incinerari. Et nisi statim resurrexit

set, fuisset incinerata ut alia corpora, Ergo vere surrexit,

2. Item, Quod non fuerit incinerata, intelligitur manifeste in figura de arca loederis Domini, per quam significabatur Maria, quae quidem arca constructa fuit de lignis setim, quorum natura talis est, quod numquam a vermibus roduntur nec perforantur, nec in aquis submersa umquam putrescunt, sicut solent alia ligna facere : ergo sine omni putrefactione surrexit.

3. Hoc idem etiam et clara luce praevidens Psalmista, clamat cum audacia, Psal. CXXXI, 8 : Surge, Domine, in requiem tuam. Et statim subinfert: Tu et arca sanctificationis tuae. Quae manifeste dicta creduntur et in figura de Maria, cujus corpus fuit arca corporis Christi : sed coelum nulla figura, sed solum rei veritas possidet

4. Item, Augustinus: " Maria quadam speciali praerogativa honoratur a Filio, possidens in Christo corpus suum quod genuit: quare non et corpus per quod genuit? Nisi obviaverit auctoritas nondum perspecta, vere credo quod et per quod genuit . " Item, Idem in eodem : ( Thronum Dei, thalamum Domini, domum atque tabernaculum Christi dignum est ibi esse ubi ipse est. Tam pretiosum enim thesaurum dignius est coelum servare quam terra. " Item, Augustinus in eodem : " Videtur laetari Maria laetitia inenarrabili, anima et corpore . " Et infra : " Sit integraliter vivens, quae. omnium integram perfectamque genuit vitam. "

5. Item, Dionysius in libro de Divinis nominibus : " Quoniam, et apud ipsos Deo acceptos nostros hierarchas , quando et nos, ut nosti, et ipse et multi sanctorum nostrorum fratrum convenimus ad visionem corporis, vitae principis, et quod Deum susceperat. Aderat autem et frater Domini Jacobus et Petrus summa et provectissima Theologorum summitas " Super hunc locum Glossa Maximi vult, quod in dormitione nostrae Dominae fuerunt Apostoli et beatus Dionysius et magister suus Ierotheus, et post assumptionem corporis fecerunt collationem, et Ierotheus raptus fuit. Et sic videtur approbare iste textus Dionysii cum suisGlossis illud quod invenitur de assumptione beatae Mariae Virginis corporali.

6. Item, Bernardus : " Non decuit ut carnem matris sine honore in terra relinqueret, qui honorem parentum sub praecepti districtione posuit. " Item, Bernardus : " Si anima parvuli nondum nati liquefacta est ut Maria locuta est, quid putas quaenam illa fuerit exsultatio coelestium civium, qui vocem audire et faciem videre et beata pjus praesentia frui meruerunt ? " Item, Bernardus: " Nec in terris locus dignior virginali templo in quo Filium Dei Maria suscepit, nec in coelis regali solio in quo Mariani Mariae Filius sublimavit . " Item, Bernardus : " Tempus loquendi est omni carni cum assumitur incarnati Verbi mater in coelum : nec cessare debet a laudibus humana mortalitas, cum hominis sola natura super immortales spiritus exaltatur in Virgine Maria . "

7. item, Augustinus : " Tantam integritatem merito incorruptibilitas, non aliqua resolutio putredinis sequitur . " Item, Augustinus : " Qui in vita prae caeteris illam gratia sui conceptus honoravit, pium est credere singulari salvatione eam in morte et speciali gratia honorasse. Item, " Si merito vivens prae omnibus dotata est gratia, cur mortua non erit honoranda? " Item, Idem in eodem : " Quid aestimandum est de matre ubi digna sit haberi, nisi in praesentia Filii? "

Item, Quaecumque sunt ejusdem naturae, eumdem locum occupant. Si igitur mater et Filius sunt ejusdem naturae, necesse est ut sit cum Filio mater.

Item, Si quis diceret, quod bene posset esse opinio et non manifesta veritas. Contra: Dicit, Bernardus: " Sane ibi unusquisque in suo sensu abundat, ubi vel certae rationi, aut non contemnendae auctoritati quod sentitur non obviat . " Item, Augustinus ad idem : " Quaerendum est ratione quod conveniat veritati: fiatque ipsa veritas auctoritas, sine qua nec est, nec valet auctoritas. Si ergo voluit servare integrum Mariae virginitatis pudorem, cur non velit incorruptam a putredinis servare faetore? " Item, Augustinus: " Si vera sunt quae scripsi, tibi gratias ago, Christe, quia de sancta Virgine matre tua, nisi quod pium est ac dignum visum, sentire non potui . "

Ecce testimonio ipsius Papae Gregorii et duorum Episcoporum, Augustini et Dionysii, et unius abbatis Bernardi, imo ipsorum Apostolorum Petri et Jacobi, probatum est beatam Virginem in corpore et anima gloriosissime esse assumptam.

8. Quod et rationibus perspicuum est. In peccato enim duo sunt, scilicet aversio a bono incommutabili, et conversio ad bonum commutabile. Istis respondent duo in poena : quia anima avertit se a sua vita, incidit in necessitatem aversionis a corpore cujus anima est vita: ex conversione ad nihilum, incidit in necessitatem redeundi in quasi nihilum, id est, in pulverem. Sed beatissima Virgo aversa fuit per originale, unde debuit mori : sed numquam fuit conversa actualiter ad aliquod nihilum : ergo non debuit incinerari.

9. Item, Anselmus: " Ad omne conve- niens Deo cui major ratio non repugnat, sequitur necessarium : istud est tale : ergo istud necessarium. "

10. Item, A nullo illustrium vincitur: sed dicit Evangelium, Matth. XXVII, 52: Multa corpora sanctorum qui dormierant surrexerunt, scilicet cum Jesu, etc. Ergo et ipsa hoc accepit.

11. Item, Dionysius dicit: " Omnes proprietates inferiorum habent superiores cum excellentia : " ergo cum illud datum est sanctis inferioribus, ut dicit Evangelium, ergo et supremae omnium in patria.

12. Item, Ecclesiae argumentum est illud : Jonnes sanctificatus est in utero : ergo et beata Virgo : sed Ecclesia conclusionem concedit et celebrat ejus nativitatem : ergo hoc modo arguo a simili: multa corpora sanctorum surrexerunt : ergo et beatissimae Virginis corpus surrexit .

His rationibus et auctoritatibus et multis aliis manifestum est, quod beatissima Dei mater in corpore et anima super choros Angelorum est assumpta. Et hoc modis omnibus credimus esse verum.

Satis ergo patet qualiter beatissima Virgo habuit omnes gratias speciales mortem circumstantes.

Solutio objectorum.

Ad illud autem quod objectum est de ejus morte, credimus quod mortua est prae amore sine dolore. Et non est etiam eadem ratio de morte Domini : quia cum illa debuit esse satisfactoria in summo, conveniebat et oportebat, quod esset poenalis in summo, et etiam voluntaria in summo : unde ita fuit spiritu permit- tente carni impropria, ut ibi simul in summo fuerit motus naturalis et rationalis : unde summum gaudium et summus dolor : et unum fuit materia alterius : quia summe gaudebat, quod per summum dolorem humanum genus redimebat : hic autem, scilicet in Maria, motus rationalis gratia informatus motum naturalem sopiebat et vincebat, ita ut cum esset charitate vulnerata in summo, et in sursum trahebatur, et vinculum impediens, scilicet alligantiam corporis, dissolvebat.

Ad auctoritates quae oppositae sunt ad carnalem assumptionem Virginis Mariae, respondemus quod quatuor sunt genera supponibilium.

Primum est quod ex sacra Scriptura ita expresse est determinatum, quod nec dubitatio nec opinio potest circa contrarium. De hoc dicit Damascenus : " Omnia quae tradita sunt per legem, per Prophetas, per Apostolos, et Evangelistas, suscipimus et veneramur et cognoscimus, nihil ultra requirentes. "

Alterum genus per oppositum ad hoc est, quod est omnino incertum et quantum ad sententiam et auctoritatem, et hoc est simpliciter apocryphum : vel est incertum quantum ad auctoritatem, sed non quantum ad sententiam, et hoc est apocryphum secundum quid, et illud ponitur dubium. Inter haec duo sunt duo media.

Tertium igitur et primum medium est, quando aliquid non est determinatum ex

Scriptura, nec per rationem necessariam potest probari, nec etiam patet ex. evidentia sui, sed ex consequentiis Scripturarum et apparentiis rationum potest et ipsum et suum oppositum aequaliter videri et persuaderi, et hoc proprie potest vocari opinabile, ut sunt quaedam opiniones sanctorum, ut est illa, utrum omnia simul sunt creata? et illa, utrum Angeli sunt in gratuitis creati?et similia.

Quartum genus et secundum medium est, quod quidem in Scriptura Bibliae non est expresse determinatum, nec ex evidentia sui manifestum, tamen ex consequentia Scripturae et apparentia rationum ita est probabile, quod nulla Scriptura et nulla ratio habet aliud opponere in contrarium, et illud est pie credendum.

Unde primum est expresse determinatum, secundum est pie credendum, tertium opinatum, quartum apocryphum. Hieronymus igitur qui fuit interpres Bibliae, loquitur ut interpres, nihil volens interserere nisi quod per Bibliam est expressum. Augustinus autem ut expositor et investigator, non tantum ponit vel supponit ea quae sunt principia scientiae, sed ea quae necessario consequuntur, nulla ratione vel auctoritate repugnante.

Et sic manifestum est qualiter beatissima Virgo habuit gratias omnium communes et speciales.