410 Acta Apostolicae Sedis - Commentarium Officiale

esse diligebat, quo citius linguam acciperet et Evangelium nuntiare valeret,

doctrinamque christianam edocebat, familias visitabat et infirmos, qui ad

dispensarium missionis sese conferrent, recipiebat.

Aliquibus mensibus Paksanii, qui parvus est vicus ad ripas fluminis

Mecongi, transactis, ultimis hebdomadis anni 1958 ad missionem Kiukatiani

translatus est, ubi iuvenem catechistam cognovit Paulum Thoj Xyooj, ex

gente vulgo hmong nuncupata, hominem mira sinceritate morum praeditum

et christiana pietate admodum informatum, cuius gratia variae eiusdem

gentis familiae ad fidem pervenerant.

Praeter navam apostolicam alacritatem, cotidiana Servorum Dei conver-

satio insignibus etiam enotabatur angustiis, locorum scilicet salubritatisque

adiunctis, infirmitatibus, itinerum molestia necessitudinumque aerumniis et

anxia rei politicae tumultuosam propter bellatorum asseclarum partis com-

munistarum operam aegritudine. Vices enim incursionum belli in Laosio,

quae contra religiones et praesertim Christi fidem saevo impetu incesserant,

ad incepta fautorum omnium honorum aequationis singulorumque proprieta-

tis destitutionis summa cum rei publicae licentia ex integro pertinebant, qui

veras non modo hac in terra Asiae, sed multas in alias quoque totius orbis

nationes excutiebant immanitates. Hoc sub averso caelo, igitur, advenarum

exacerbato fastidio patriae studii vaniloquentia prolato, passio Servorum

Dei consummata est.

Die 25 mensis Aprilis anno 1960, Pater Marius cum Paulo ad vicum

vulgo Ban Pha Shoua nuncupatum in meridiana nationis regione profectus

est. Pluries eundem apud populum licet huius pauperis desertique territorii

iam missus fuerit, hoc tamen ab itinere numquam rediit. Patris enim Marii

eiusque catechistae nulla exinde tenta sunt vestigia ac de exitu eorum utrum

sceleris an accidentis raptusve vel insidiarum causa occubuerint diu coniec-

tum est. Haud vero praetereundum quod illis annis missionariis saepius

necis iactatae sunt minae multique eorum et interempti sunt.

Deinde autem testes quidam res panderunt gestas: Servi Dei, enim, in

vico vulgo Pha Sua ministerio expleto pastorali, ad missionem Kiukatiani

repetendam egressi erant, cum, fortasse die 1 mensis Maii anno I960, a

manipulo bellatorum communistarum sectae cui nomen vulgo Pathet Lao

in silva apprehensi sunt ac dire interfecti. Iuvenis catechista, qui, cum

laosianus esset, morte eripi potuisset, Patrem Marium iuxta consistere ad

sacrificii ultimum maluit.