342 Acta Apostolicae Sedis - Commentarium Officiale

II

Venerabilibus Servis Dei Friderico de Berga et XXV sociis, ex Ordine Fratrum Minorum Capuccinorum martyribus, Beatorum honores decernuntur.

FRANCISCUS PP.

Ad perpetuam rei memoriam. - « Id enim, quod in praesenti est, leve

tribulationis nostrae supra modum in sublimitatem aeternum gloriae pondus

operatur nobis, non contemplantibus nobis, quae videntur, sed quae non

videntur; quae enim videntur, temporalia sunt, quae autem non videntur,

aeterna sunt » ( 2 Cor 4, 17-18).

Effatum hoc Apostoli, quo attentius fragilitatem mundi praecellentia

inspiciantur, in Hispania prima dimidia parte vicesimi saeculi peculiari

studio expletum videtur, cum plures religiosi ac religiosae, persecutione

contra Ecclesiam grassante, primum ex conventibus pulsi sunt et denique

cumulata crudelitate interempti.

Ex numero eorum, qui pro fidelitate erga Dominum Iesum servanda

sanguinem suum morte fundere non dubitarunt, religiosi nonnulli ex Ordi-

ne Fratrum Minorum Capuccinorum Provinciae Cataloniensis consistunt,

a quibus, feriis eiusdem Provinciae Capitulo protinus coniunctis in loco

Sancta Anna de Sarrià prope Barcinonem inter dies XIV et XVI mensis Iulii

anno MCMXXXVI celebrato, Patres Guardiani petierant, ut oboedientiae ob-

sequentes communitates desererent et apud domicilia privata se abderent

iniurias fugientes, quae usque in veram tunc processerant persecutionem.

Inter dies XX et XXIV mensis Iulii eodem anno octo conventus ex novem

Provinciae Cataloniensis iam desertis direpti exustique sunt.

Triginta et sex Fratres Provinciae mortem occubuerunt, quorum viginti

et sex inter diem XXVIII mensis Iulii anni MCMXXXVI et diem XXIV mensis

Februarii anni MCMXXXVII trucidati sunt et in hoc Brevi Apostolico adscripti

inveniuntur.

Servus Dei Fridericus de Berga (in saeculo: Martinus Tarrés Puigpelat)

eiusque XXV socii martyres, presbyteri et religiosi ex Ordine Fratrum Mi-

norum Capuccinorum, testimonium summum amoris erga Christum usque

ad effusionem sanguinis perhibuerunt et coram Ecclesia et mundo nunc

sempiterna collustrati gloria laetantur.