Secunda Quinquagena.

1. Ave, mitis

oliva gratiae,
Lenis mater

misericordiae,
Tu fomentum,

tu salus populi,
Tu lucerna
totius saeculi,
O virgo serena.

2. Ave, parens
unius filii,
Quem non tinxit
faex ulla vitii;
Omnis vivens

peccato paruit,
Solus iste
reatu caruit,
O mater amoena.

3. Ave, sacra

verbi puerpera,
Me in Christi

virtute libera,
Deum placa

sacro precamine,
Ut me salvet
in suo nomine,
O virgo sacrata.

4. Ave, virgo,

quae degens caelitus
Elongasti

mundanos strepitus,
Domi sanctum

agebas otium,
Cum caelestem
vidisti nuntium,
O sponsa beata.

5. Ave, virgo,

per cuius meritum
Dirae mortis

ius est abolitum,
Ut attingam

lumen viventium,
Pedis mei

rege vestigium,
O iustitiae dux.

6. Ave, virgo,

nos Christo praepara,
Qui factus est

in ligno cithara,
Qui tormentis

attritus sonuit,
Donec surgens,
quis esset, claruit,
O laetitiae lux.

7. Ave, cuius

carnis substantia
Tulit arcum,

qui fregit omnia,
Ne nos tangat

hic arcus, impetra,
Cuius arcus
fuisti paretra,

O blanda precanti.

8. Ave, per quam

suscepi Dominum,
Qui suscepit

naturam hominum,
Cuius lenis

misericordia,
Me suscepit
concessa venia,
O dulcis amanti.

9. Ave, per quam
fit Deo subdita
Gens aeterno

tormento dedita,
Per te gentes

salvavit perditas
Calceata

carne divinitas,
O vas deitatis.

10. Ave, cordis

medela saucii,
Preces audi

clamantis anxii,
Nos in petra

Christo corrobora,
Ne peccando
vacillent pectora,
O fons pietatis.

11. Ave, per quam

invenit pretium,
Qui redemit

peccata gentium,
Cum id a se

Iudaeus repulit,
Se redemptor

ad gentes transtulit,
O dura malignis.

12. Ave, Christi

quae sinu recubas,
Quae precando

pro nobis excubas,
Cuius Deum

sitivit anima,
Caro tulit

amara plurima,
O blanda benignis.

13. Ave, sacro

dicata flamini,
Quae coniungis

cor altum homini,
Absque matre

de patre proditus
Sine patre

est de te genitus,
O sancta propago.

14. Ave, mater,

quae plena gaudio
In caelesti

coruscas atrio,
Ante mundum

cuius electio,
Super omnes
cuius assumptio,
O lucis imago.

15. Ave, parens,

per cuius viscera
Mira fecit

creator opera,
Mundi huius

siccavit pelagus,
Ut respiret
peccator naufragus,
O virgo decoris.

16. Ave, terra

dulcis et fertilis,
De qua fructus

processit nobilis,
De se terram

et caelos reficit,
Omnes pascit

nec unquam deficit,
O fructus honoris.

17. Ave, sponsa,

cuius in thalamum
Distillavit

caelestem balsamum,
Cum ros sanctus

perfudit uterum,
Concepisti

credendo puerum,
O cellula mellis.

18. Ave, Christus

cuius in gremio
Se velavit

carnis cilicio,
Cui gustandum

acetum miscuit,
Qui fel semper
Iudaeis sapuit,
O nescia fellis.

19. Ave, virgo,

roga pro paupere
Christum, qui me
venit redimere,
Pro me placa

datorem munerum,
Ne moretur
solari miserum,
O virgo benigna.

20. Ave, per quam

extendit brachium
Pater, ad nos

cum misit filium,
Hostem ille

contrivit fortiter
Et nos sibi

constrinxit leniter,
O femina digna.

21. Ave, cuius

in vellus floridum
Eos descendit

nec fecit madidum,
Vellus roris

non laedit passio,
Carnem tuam
nulla corruptio,
O virgo pudica.

22. Ave, cuius

tenendo dexteram
Rex levavit

in sedem superam,
Te deduxit

cum pompa gaudii,
Te suscepit
in partem solii,
O regis amica.

23. Ave, solis

aurora nuntia,
Veri stella

fulgoris praevia,
Exclusisti

noctem nequitiae,
Produxisti
solem iustitiae,
O ianua solis.

24. Ave, per quam

Christus nos approbat,
Cum Iudaeos

expellens reprobat,
Nostrum nobis

emolli iudicem,
Ne furoris

effundat calicem,
O filia prolis.

25. Ave, nostrae

tutela patriae,
Locus pacis,

palma victoriae,
Per te Deus

cunctis est agnitus,
Solis notus

Iudaeis primitus,
O lucida stella.

26. Ave, mater,

quae paris filium,
Nec apparet

partus vestigium,
Nulla via

patet in aequore,
Nulla labes
in tuo corpore,
O pura puella.

27. Ave, per quam

patris clementia
Misit mundo

caeli cibaria,
Per te pluit

panem angelicum,
Suavem gustu,
fructu mirificium,
O sancta sanctarum.

28. Ave, cuius

pro partu regio
Sunt fideles

dati martyrio,
Templum Dei

pro eius nomine
Purpuratur

sanctorum sanguine,
O dux animarum.

29. Ave, per quam
summa dilectio
Nos respexit

de caeli solio,
Per te suam

mundavit vineam,
Quae dedisti
vitam aetheream,
O fructificans mons.

30. Ave, petra

mirae dulcedinis,
Mel producens

cor pascis hominis,
Mel tam dulce

est tuus filius,
Qui tam dulcis,
quod nihil dulcius,
O mellificans fons.

31. Ave, quondam

pauper et humilis,
Cunctis per hoc

exemplum utilis,
Hinc paupertas

et hinc humilitas
Duas monstrant
ad caelum semitas,
O praevia iuris.

32. Ave, per quam

pro certo novimus,
Quod sit homo

dictus altissimus,
Quod sit nullus

par ei dominus,
Quem locorum

non claudit terminus,
O virgula turis.

33. Ave, grata

latori gratiae,
Bonum bonis

addens quotidie,
Quem in Sion

vidisti terrea.
Nunc in Sion
vides aetherea,

O lux tenebrarum.

34. Ave, terra

carens agricola,
De qua prodit

caelestis incola,
De te surgit

exorta veritas,
Floret fructus,
datur benignitas,
O pulchra rosarum.

35. Ave, regis

ancilla libera,
Servitutis

me iugo libera,
Per te meae

parcat miseriae,
Qui se texit
servili specie,

O flos sine spina.

36. Ave, de qua

per ora populi
Gloriosi

volvuntur tituli,
De te tuus

natus est conditor,
Sol de stella,
de nata genitor,
O stella marina.

37. Ave, virgo,

quam servo virgini
Commendavit

dulcedo Domini,
Cum ad crucem

Christi accederes,
Notos eius

dispergi cerneres,
O pax odiorum.

38. Ave, nata

David de germine,
Germen habens,

sed absque semine,
Paris illum,

cui patris unctio
Regnum dedit
cum sacerdotio,
O meta laborum.

39, Ave, per quam

super nos claruit
Splendor ille,

quem pater genuit,
Roga Christum,

ut eius dextera
Plebis suae
regantur opera,
O consilii ros.

40. Ave, pudor,

quem dena millies
Angelorum

vallavit acies,
Qui timores

nocturnos pellerent,
Hostes tuis

a dextris caderent,
O munditiae flos.

41. Ave, palma,

signum victoriae,
Quae vicisti

signa malitiae,
Silvae lignis

stat cedrus altior,
Sanctis caeli
tu sola sanctior,
O cedrus odora.

42. Ave, de qua

decorem induit
Rex decorus,

quem nil dedecuit,
Qui te fecit

ex dono gratiae
Speciosam

de sua specie,
O gemma decora.

43. Ave, felix

Dei domestica,
Verba Christi

conservans mystica,
Quam de novae
legis mysterio
Erudivit

caelestis unctio,
O regula morum.

44. Ave, cuius

sermo mellifluus
In psallendo

fuit assiduus,
Deum laudans

non oris sibilo,
Sed affectu

et cordis iubilo,
O forma bonorum.

45. Ave, quae nunc

in laude iubilas,
Coram Deo

prae cunctis rutilas,
Pulchra carne

sed magis spiritu,
In caelesti

vernas exercitu,
O vera lucerna.

46. Ave, per quam

se mundo reserat
Lux aeterna,

quae lucem fecerat,
Orta iusto

lux noctis nescia
Rectis corde
refudit gaudia,
O porta superna.

47.Ave, Christi

scabellum nobile,
Manu Dei

factum mirabile,
In quo pedem

maiestas posuit,
Cum se membris
humanis induit,
O summa columna.

48. Ave, novi

repertrix cantici,
Canens ortu

caelestis medici,
Lingua foris

Deum magnificat,
Et se Deus
intus mirificat,
O pacis alumna.

49. Ave, porta,

per cuius aditum
Portae caeli

patent post obitum,
Confitentes

excusa servulos,
Qui divinos

frequentant titulos,
O caelica clavis.

50. Ave, cunctis

carens illecebris,
Semper Dei

servata palpebris,
Nunc regina

cum rege resides,
Dona tuis

ministris provides,
O virgo suavis.