Tertia Quinquagena.

1. Iesu, cuius intime

populus adventum
Exspectavit faciens

orando lamentum,
Qui misertus miseris

compassus es vere,
Da per paenitentiam

peccata deflere.
2. Iesu, ad cuius laudem

utraque natura
Humana et angelica

et omnis creatura
A David hic inducitur,

da, ut te amemus
Teque pro beneficiis

semper collaudemus.

3. Iesu, ad cuius laudem
se ipsum hortatur
Propheta, ut reddere

non obliviscatur
Nunc vel ullo tempore

gratias pro donis,
Nos illustra cumulo
benedictionis.
4. Iesu, qui vis gratias
tibi, Deo almo,
Hoc alleluiatico
tibi dici psalmo

Propter beneficia,

quae praestitisti, plura,
Ut sit nobis, tribue,

te laudandi cura.
5. Iesu, qui in hoc psalmo

solaris paenitentes
Veniam dans arguis

atque neglegentes,
Nobis quaeso, tribue,

qui te confitemur,
Ut in tui nominis

laude gloriemur.
6. Iesu, in periculis

a te liberatos
Secundum quod iustum est

iubens esse gratos,
Da, ut nunquam aliquam

committamus fraudem,
Sed nos semper promptos fac

ad utramque laudem.

7. Iesu, quem laudat David

pro malorum repressa
Voluntate pessima

victoria concessa
De cunctis tuis hostibus

coactis ad tributum,
Nos in tua laude fac

habere cor non mutum.

8. Iesu, qui hic increpas

Iudam et Iudaeos,
Quos tua manifestum est

in passione reos,
Converte incredulos,

converte, quos plasmasti,
Pro quibus cruce positus

patrem exorasti.

9. Iesu, David dominus

per divinitatem,
Patre minor etiam

per humanitatem,
Qui olim de restibus

feceras flagellum,
Pone, qui nos tribulant,

pedum sub scabellum.

10. Iesu, qui a propheta

ceterisque gnaris
Pro dono eucharistiae

et aliis laudaris,
Salva nos per gratiam

et aeternitatis
Adipisci facias

regnum cum beatis.

11. Iesu, qui per prophetam

de praemio bonorum
De afflictioneque

hic tractas impiorum,
In misericordiae

operibus nos ire
Fac, post vitae terminum

ad te pervenire.

12. Iesu, dator optime,

per quem vita datur,
Cuius laus a pueris

digne praedicatur,
In praesenti, quaesumus,

da nobis laudare,
Post cum sanctis omnibus

te glorificare.

13. Iesu, sicut Israel

Aegyptum exeundo
Laudare te satagit
cordis ex profundo,

Nos immundos mundos fac

in confessione,
Mare nobis consecrans

merso Pharaone.

14. Iesu, a periculis

qui David liberasti,
Pro quo hic ad gratias

eum provocasti,
Nos a malis eripe,

quos a via morum
Decurvare satagit

trames vitiorum.

15. Iesu, peccantem David

per deceptionem
Patienter ferre dans

persecutionem,
Mala da, quae patimur,

ferre patienter
Et liberans nos agere

grates reverenter.

16. Iesu, qui a gentibus

Iudaeisque laudari
Pro tuo adventu vis

et magnus praedicari,
Te laudare iugiter

cantu fac psalmorum,
Donec nos suscipiat

chorus angelorum.

17. Iesu, qui ecclesiam

una ex Iudaeis
Facis et gentilibus,

ut penitus in eis
Nulla sit discordia,

a nobis laudaris
Digne tu, qui verus es

lapis angularis.

18. Iesu, iubens currere

viam mandatorum
De beatitudine

tractans viatorum,
Ad quam contemplatio

ratioque spectat,
Contemplationem da,

quae tibi nos conectat.

19. Iesu, qui in cantici

huius gradu primo,
Quod ad te recurrendum sit

vis ex cordis imo,
Ut cesset tribulatio,

noster incolatus
Transeat in gloriam

melioris status.

20. Iesu, ut de vitiis

possimus triumphare,
Nos in montem doceas

oculos levare,
Ad te Deum scilicet

et caelestes cives,
Qui a te hoc obtinet,

satis erit dives.

21. Iesu, qui Ierusalem

aedificatione
Laetum David faciens

et consummatione,
Caritatem facias

tenere fraternam
Nos, per quam Ierusalem

scandimus supernam.

22. Iesu, in angustiis

iubens elevare
Ad te mentis oculos,

promptus adiuvare
Esto, quando patimur

iniuriam malorum,
Quod nos gravat, amovens

pondus peccatorum.

23. Iesu, quem et Israel

Davidque cum eis,
Dum ipsis victoriam

das de Philistaeis,
Laudant, muni fortiter

pedes nostrae mentis,
Ut torrentem transeant

aquae vehementis.

24. Iesu, da fiduciam
in te nos habere,
Caelestem Ierusalem
tandem possidere,

Omni quoque tempore
stabiliens in bonis

Hos, qui tui filii
sunt adoptionis.

25. Iesu, qui Iudaicam

dum de Babylone
Plebem redit gaudio

reples, Iesu bone,
Qui es consolatio

plebis captivatae,
Nos ad portum applica

pacis praeoptatae.

26. Iesu, quia Salomon

in vanum laboraret,
Dum templum aedificat,

nisi adiuvaret
Tua providentia,

adaedificare
Domum cordis, volumus,

digneris iuvare.

27. Iesu, qui timentibus

te hic tribuisti
Bona temporalia,

aeterna promisisti
In futura patria,

fac nos te timere
Et aeterna gaudia

tecum possidere.

28. Iesu, qui punis eos,

qui Israel expugnant,
Idem fac et omnibus,

qui male nos impugnant,
Da, ut fiant viribus

suis destituti,
Ut sic simus iugiter

te tuente tuti.

29. Iesu, paenitentibus

parcens succurendo,
Hic misericordiam

eis promittendo,
Iuvamen humiliter

tuum imploramus,
Ut misericorditer

audias, clamamus.

30. Iesu, sicut David rex

se humiliatum
Dicit, quia eius cor

non est exaltatum,
Dona, ut nos humiles

semper maneamus
Et post vitae terminum

caelos conscendamus.

31. Iesu, quia David rex

pro templi complemento
Habet desiderium

maximum, memento,
Quod ei promiseras

prolem successuram,
Et domum nobis deputa

semper permansuram.

32. Iesu, sicut Israel

in unum habitare
Facis atque sub uno

rege militare,
Nos unitos mutuam

per dilectionem
Fac et tuam consequi

benedictionem.

33. Iesu, qui ecclesiae

ministros, adorare
Ut devote debeant

te atque laudare,
In hoc psalmo incitas,

nostrae spes salutis,
Fac nos caelum scandere

gradibus virtutis.

34. Iesu, qui hic singulos

ad laudationem
Tuam generaliter

invitas rationem
Assignans multiplicem,

ita te laudare
Da, ut id, quod facimus,

fiat salutare.

35. Iesu, vere fateor,
iure collaudans
Tu a nobis omnibus,
quia operaris

Solus mirabilia,
per te liberatur

Israel, et Pharao
persequens necatur.

36. Iesu, quando principem

punis Babylonis,
Tantum sumit Israel

iubilationis,
Per veram paenitentiam

tua maiestate
Libera nos daemonis

a captivitate.

37. Iesu, cui David rex

hic regratiatur,
Reges atque alios

ad id adhortatur,
Quod eum ab Absalom

et Siba salvasti,
Grates tibi agimus

nos, quos liberasti.

38. Iesu, qui voce tua

et voce aliorum
Patrem hic adloqueris,

nos in viam morum
Nostrae, quaeso, dirigens

prospice saluti,
Ut fiamus iugiter

te tuente tuti.

39. Iesu, sicut David rex

petit liberari,
Dum eum persequitur

Saul, ita dari
Pacem nobis petimus,

ut nunquam vincamur
A daemone aut homine,

a quo molestamur.

40. Iesu, ad quem David rex

clamavit orando
Pro linguae custodia

petens, ut non fando
Peccet, dona, exeant

ut a nobis boni
Sermones, non alii,

ad quos sumus proni.

41. Iesu, sicut David rex,

dum est anxiatus
In spelunca ad ollam,

a te consolatus
Redditur, sic et nos

in anxietate
Positos exaudias

tua pietate.

42. Iesu, qui regem David

faciendo tutum
A filio Absalom

salvas persecutum,
A persequente daemone

salva paenitentes,
In peccatis excitans

diu dormientes.

43. Iesu, sicut David te

benedicit Deum,
Goliam in proelio

dum vincit Philistaeum,
Ita, quando vincimus

hostes, quos videmus,
Sicut invisibiles,

da, ut te laudemus.

44. Iesu, quem hic David rex

laudat exaltando,
Omnes atque alios

ad idem hortando,
Te laudare tribue,

rex universorum,
Cuius regnum omnium

regnum saeculorum.

45. Iesu, quem propheta hic

iubet collaudare
Nobis, ne in aliis,

qui salutem dare
Nequeunt, confidamus,

tu solus adiutor
Verus, dicens: ego sum

Deus et non mutor.

46. Iesu, cuius laudibus
laus est delectari,
Dona nobis, qui per te
cupimus salvari,

Ut iucunda plurima
per te omni hora

Nostra sit laudatio
semperque decora.

47. Iesu, quem Ierusalem

laudat spiritalis.
Scilicet ecclesia,

protege sub alis
Semperque celerius

perduc nos ituros
Caelestem in Jerusalem

semper permansuros.

48. Iesu, qui creaturas

hic superiores
Te laudandum inducis

et inferiores,
Laudes, quas offerimus,

acceptare cura
Nos beatitudine

ditans permansura.

49. Iesu, cui canticum

novum corde mundo
Hic decantant fideles

pro adventu secundo
Tuo ad iudicium,

quia in aeternum
Vivent, quando pessimi

tradentur in infernum.

50. Iesu, qui ab omnibus

sanctis vis laudari
Ab eis perpetuo

et glorificari,
Iure nos laudabimus

tuum sanctum nomen,
Quia omnis spiritus

te collaudat, Amen.

51, Amen dicit colligens

hic petens solamen.
Amen dicit iterum

postulans levamen.
Amen dicit tertio

poscens adiuvamen,
Suae, Iesu, animae

miserere. Amen,