Tertia Quinquagena.

1. Ave, Iesu, qui in aeternum permanes,
Tu nos dirige actusque nostros omnes,
Ne quando exprobrent nobis inimici,
Uti foenum si nos viderint confici.

2. Ave, qui Moysi notas vias fecisti,
Filiis Israel mare aperuisti,
Tu ne in perpetuam nobis irascaris,
Qui sperantium in te semper misereris.

3. Ave, qui es vera solidaque petra,
Tu nobis a patre veniam impetra
Et, qui in nos potes creare cor mundum,
Fac tibi nostrum eloquium iucundum.

4. Ave, qui in Aegypto signa ostendisti
Et plagis multis Aegyptios affecisti,
Da nobis, hac de Aegypto ut liberati
Ad te pertingamus virtute onerati.

5. Ave, quem offendimus nostris cum patribus,
Misertus nostri parce iniquitatibus,
Nomini sancto tuo ut confiteamur
Tuaque gloria perfrui mereamur.

6. Ave, Iesu, qui animas satias bonis
Eas servans, ne adhaereant rebus vanis,
Tu nos sedentes in tenebris illumina,
Tua eloquia ut sint nobis amoena.

7. Ave, in quo credentes fecere virtutem,
In quo tyranni devicerunt potestatem,
In tuam deduc nos munitam civitatem,
In qua habebimus omnem felicitatem.

8. Ave, Iesu, quo operimur, vestimentum,
Nostrarum esto immemor iniquitatum,
Induantur, qui detrahunt nobis, pudore,
Tibi nostro ut confiteamur in ore.

9. Ave, cuius iuramenti non paenituit,
In ore cuius nil nisi veritas fuit,
Tuo de torrente nobis tribue potum
Nosque hinc transfer in tabernaculum sanctum.

10. Ave, cuius nomen sanctum et terribile,
Da tuum servare testamentum fidele,
Escam, quaesumus, tribue te timentibus,
De qua sancti epulantur in caelestibus.

11. Ave, qui te das in cibum pauperibus,
iustitia tua in terrae finibus,
In saeculum saeculi manet omnibus
In Dei veritate te quaerentibus.

12. Ave, quem in templo pueri laudaverunt,
Nomen cuius tunc laetantes benedixerunt,
Principes avari audire nequiverunt,
Sed de eius morte inter se tractaverunt.

13. Ave, Iesu, cuius est caelum caeli,
Quem non laudabunt mortui mali,
Sed nos, bone Iesu, qui vivimus,
Fac, te benedicere possimus.

14. Ave, Iesu, qui custodis parvulos,
Nos, quaeso, respice tuos misellos,
Ut in regione tibi vivorum
Placeamus domino dominorum.

15. Ave, Iesu, cuius ego sum servus,
Matris Evae miserrimus filius,
Rumpe, quaeso, peccatorum vincula,
Tibi ut sacrificem in saecula,

16. Ave, Iesu, qui tua misericordia
Gentes salvasti a tyranni miseria,
Tu cum sis veritas permanens in aeternum,
Tuae clementiae nobis porrige manum.

17. Ave, quem principes vallaverunt ut apes,
Strophas contra eum quaesierunt ut vulpes,
Sed castigans castigavit eos Dominus,
Devinctos cum relegavit Vspasianus.

18. Ave, lumen fidelium atque lucerna,

Sic tu gressus nostros mentesque illumina.
Tuam legem da nobis digne perscrutari,
Ut per te tandem possimus illuminari.

19. Ave, Iesu, meosque respice gemitus,

Quos nunc fundo in terra huius incolatus,
In qua me paenitet tamdiu peregrinari,
Qui tibi summe cupio associari.

20. Ave, Iesu, qui non dormis neque dormitas,
Nos custodi nostrasque dirige semitas,
Nequando per diem prosperum sol nos urat,
Neu adversam per noctem nos luna atterat.

21. Ave, Iesu, pax de caelo manifestata,

Hac tua pace, fac, non sint corda frustrata,
Quam tu apostolis quondam tuis dedisti,
Quando eis Pax vobis totiens dixisti.

22. Ave, Iesu, despectorum qui misereris,
Respice, quaesumus, tuis super miseris
Et fac, ut ad te suos dirigant oculos,
Qui se semper hic aestimaverant misellos.

23. Ave, Iesu, tua qui passione
Daemoniorum a venatione
Nostri misertus nos eripuisti,
Nostra in cruce peccata tulisti.

24. Ave, qui non relinques virgam peccatorum
Omnium, ut. praevaleat sorti iustorum,
Sed si extendant suas ad te iusti manus,
Tuae largitatis offeres eis munus.

25. Ave, cuius apostoli inter gentes
Ibant evangelium annuntiantes
Et Domino manipulos reportantes
Multos reddebant fidei audientes.

26. Ave, Iesu, cuius permanet aeternitas,
Electorum omnium qui es hereditas,
A nobis potentium repelle sagittas,
Ut non praevaleat eorum iniquitas.

27. Ave, Iesu, quem qui timent, suut beati,
Ambulantes in viis eius ditati,
In viis tuis sic nos fac ambulare,
Labores nostros ut possimus edere.

28. Ave, peccatorum qui concidis cervices,

Uti meremur, nostra tu ne peccata vindices,
Sed querentibus spatium paenitentiae,
Fac, quaeso, non desit largitas veniae.

29. Ave, apud quem est propitiatio,

Per quem nostra est perfecta redemptio,
Fac, ut nos in custodia matutina
In te spem collocemus et vespertina.

30. Ave, Iesu, qui ab angelis minoratus
Atque a virgine matre es ablactatus,
Da nobis cum Israele in te sperare,
Mare hoc quo possimus tuti pertransire.

31. Ave, Iesu, sanctum cuius tabernaculum
Angeli videntes lactantur in saeculum,
Concede, tuum ut servemus testamentum,
Quod patribus promisisti per iuramentum.

32. Ave, cuius descendit in barbam unguentum,
Aaron scilicet eiusque vestimentum,
Sic nos, o bone Iesu, omnes fac uniri,
Quo tuo unguento possimus illiniri.

33. Ave, ad quem in noctibus extollo manus,
Ne dum hic curro, tandem appaream vanus,
Benedic me, quaeso, qui in Sion habitas,
Et fac, ne me premat malorum iniquitas.

34. Ave, qui populo tuo hereditatem

Dedisti fugans hinc sectantes vanitatem,
Praebe te nobis nunc, Christe, exorabilem,
Qui Cananaeae vocem audisti flebilem.

35. Ave, qui nostrae memor es humilitatis,
Vide, quod premat nos procella tempestatis,
In profundum statim forsitan demergendi,
Tibi si desit voluntas nos liberandi.

36. Ave, Iesu, qui es vera petra angularis,
Illidens inimicos nunquam confringens,
Malos cogitatus da ad te allidere,
Solus qui potes utraque unum facere.

37. Ave, qui solus, cum sis Dominus excelsus,
Non despexisti nos miseriis compassus,
Sed carnem nostram homo factus induisti,
Dexteram patris qui nunquam dereliquisti.

38. Ave, Iesu, solus qui cuncta vides,
Si ascendero in caelum, ibi ades,
Sed etsi in infernum ego descendero,
Manus tuas effugere non potero.

09. Ave, Iesu, iudex inopis et pauperum,
De manu omnium salva nos peccatorum
Atque eripe hominibus ab iniquis,
Qui impiis iudicium facis et aequis.

40. Ave, qui a laqueo potes custodire,

Scis, quod peccatores laqueum paravere,
Quem nunquam sine te potero evadere,
Qui in retiaculo non potes cadere.

41. Ave, cuius dexteram si timuero,
In via hac quamdiu ambulavero,
Laqueos effugiam inimicorum,
Quia per te manus evadam illorum.

42. Ave, cuius spiritus est anxiatus,

Vide, quaeso, ego quod sim conturbatus
Et fac, ut sim tuis mandatis attentus,
Quo me ad te deducat spiritus sanctus.

43. Ave, Iesu, qui das salutem regibus,
David salvasti periculis ab omnibus,
Erue nos de manibus alienorum
Nosque tandem hinc transfer ad regna caelorum.

44. Ave, qui iustus es tuis in operibus,
Prope esto omnibus te invocantibus,
Timentium te qui voluntatem perficis
Tuaeque gloriae participes efficis.

45. Ave, Iesu, solus qui solvis compeditos,
Caecis qui reddis oculos illuminatos,
Erige, quaeso, a diabolo elisos,
Pupillos qui custodis advenasque laesos.

46. Ave, qui producis in montibus foenum
Et qui das herbam servituti hominum,
Concede tibi digne posse servire,
Ut pro datis grates possimus reddere.

47. Ave, Iesu, ecclesiam qui confortasti
Et fines eius pacem ipse posuisti,
Da nobis sic in ea hic perseverare,
Quo frumenti adipem possimus edere.

48. Ave, cui omnes bestiae cunctaque pecora,
Serpentes volucresque, pura et impura,
Omnis sane te laudat tua creatura,
Tibi namque omnis creaturae est cura.

49. Ave, quem angelorum ordines laudare
Non cessant eumque iugiter adorare
Sanctus, sanctus canendo nosque gubernare,
Actusque nostros semper velit dirigere.

50. Ave, Iesu in sanctis tuis laudandus,
In firmamento ab omnibus colendus,
Da, ut in psalterio et in cithara
Te laudare valeamus mente pura.