Prima Quinquagena.

1. Ave Iesu, Iesu ave,

Lumen vivum, lumen suave,

Luminis meridies,
Quo in luce sex dierum
Res informis, hyle rerum,

Prodiit in species.

2. Ave, Iesu, lux serena,

Summe bonus, summe plena,

Veritatis speculum,
Tu imago, tu figura,
Patri unum in natura,

Quo subsistit saeculum.

3. Ave, Iesu, tu plasmasti,
Tu bis binas concreasti

Creaturas primitus,
Ignem caeli, tempus, hyle,
Sine forma quoddam vile,
Angelorum spiritus.

4. Ave, Iesu, factor mundi,
Per te solum tanta fundi

Massa rerum potuit,
Distinguenda sex diebus,
Ideanda speciebus,

Ut revera decuit.

5. Ave, Iesu, Dei verbum,
Tu rebellem, tu superbum

Deiecisti merito.
Corruerunt pari sorte
In aeterna trusi morte

Adhaerentes perdito.

6. Ave, Iesu, rex caelestis,
Quem caelorum illa pestis

Malo sprevit omine,
Qui dum petit aquilonem,
Lucis perdit regionem;

Sic decebat, Domine.

7. Ave, Iesu, ave, Christe,
Fit mutatus Seraph iste,

Perdit sapientiam,
Dum fit miser ex beato,
Voluntate, non ex fato

Versus ad malitiam.

8. Ave, Iesu, sic nimirum
Vindicasti scelus dirum,

Iusto dum iudicio
Petitorem alti throni,
Contemptorem summi boni
Subvertit aversio.

9. Ave, Iesu, magne Deus,
Cum ruendo iste reus

Ad has umbras transiit,
Terrenorum nova gente
Te, creator, disponente

Genus nostrum prodiit.

10. Ave, Iesu, sicut nosti,
Sic deiecto datur hosti

Fomentum invidiae,
Dum de limo procreatos
Scit futuros et beatos

Angelorum gloriae.

11. Ave, Iesu, primus homo,
Cum deceptus vili pomo

Paradiso pellitur,
Mundi sine causa tali
Huius tanti causa mali

Sanguis tuus funditur.

12. Ave, Iesu, lumen verum,
Talis erat ordo rerum,
Ut captivos solveres,
Lux de caelo descendisti,
Velo carnis latuisti,
Carnem ut redimeres.

13. Ave, Iesu, quem de caelis
Suavis fatus Gabrielis

Nuntiavit virgini,
Illud ille tulit ave,
Verbum bonum et suave,

Vitam ferens homini.

14. Ave, Iesu, rex o talis,
Dum secreti virginalis

Subintrares viscera,
Paranymphus tulit ille
Salutare, plus quam mille

Gratiarum munera.

15. Ave, Iesu, lux immensa,
Umbris lux incomprehensa,

Castis in visceribus
Virgo verbo quam conceptam,
Carne munda circumsaeptam
Novem tulit mensibus.

16. Ave, Iesu, inquietum
Unicornem et insuetum

Te Maria tenuit,
Metuendum et invictum
Vi amoris te astrictum

Illa virgo domuit.

17. Ave, Iesu, sensus Dei,
Per quem mirae speciei

Hoc effulsit saeculum,
Dum Mariam elegisti,
Clarum prorsus subiisti

Solis tabernaculum.

18. Ave, Iesu salutaris,

Quem concepit stella maris

Sine mare penitus,
Vivae lumen veritatis,
Vivae flamma caritatis

Cum spiraret caelitus.

19. Ave, Iesu, rex caelorum,
In supernis angelorum

Vita, pax et iubilus,
De supernis descendisti,
Deus carne latuisti,

Carnis nube nubilus.

20. Ave, Iesu, flos divine,

Quem non laesit vis pruinae,

Omni pulchro pulchrior,
Flos in horto virginali
Austro flante speciali,

Balsamo flagrantior.

21. Ave, Iesu, qui es primus
Factus homo, caro, limus,

Honor nostri generis,
De Maria sine viro
Induisti modo miro

Massam nostri pulveris.

22. Ave, Iesu, voce laeta
Protestatur ut propheta

Linguae dulcis calamo,
Homo forma speciosus
Processisti amorosus

Sponsus ut de thalamo.

23. Ave, Iesu, fons dulcoris,
Quem profudit flos pudoris,

Castitatis lilium,
Lumen puram, splendor clare,
Talis talem generare

Merebatur filium.

24. Ave, Iesu, flos vernalis,
Pulchritudo aestivalis,

Omni dulci dulcior,
Quem plantavit grandi cura
Virgo dulcis, virgo pura,

Sole luminosior.

25. Ave, Iesu speciose,
Tibi cedit rubor rosae,

Cedit candor lilii;
Quantum gaudes, o Maria,
Mater felix, mater pia,

Vultu talis filii!

26. Ave, Iesu, clara proles,
Vultus tuus mille soles

Claritate superat,
Felix homo, cuius mentem
Vultum illum sitientem

Fortis amor vulnerat.

27. Ave, Iesu, cuius ore
Mel amoris ut e flore
Virgo suxit osculis,
Matutino velut apes
Dulces sugunt mellis dapes
Variis ex flosculis.

28. Ave, Iesu, flos vitalis ;
Gaude, mater nati talis,

Veris ut rosaria,
Sic, O dulcis, speciosas
Oris risu spargis rosas,
Nutu fundis lilia.

29. Ave, Iesu, O flos verne,
Claritatis flos aeternae,
Flos immarcessibilis ;
Gaude, mater floris huius,
Lux divinitatis cuius
Est inaccessibilis.

30. Ave, Iesu, cum prodisses,
Sol in mundo effulsisses,

Umbra mortis vanuit
Tactu lucis speciosae,
Tibi flori, tibi rosae

Fides mundi paruit.

31. Ave, Iesu, quam decora
Illa tui partus hora,

Cum te virgo genuit
Nostrae carnis ex natura!
Vere tunc, non in figura,

Virga Iesse floruit.

32. Ave, Iesu, lux mentalis,
Quam mens plena virginalis

Lucem mundo peperit,
Solis dandam mundis corde,
Inquinatis nulla sorde,
Felix, qui acceperit.

33. Ave, Iesu, amor meus,
Verus homo, verus Deus,

Vita, lumen, veritas,
Virginali casta domo
Nascereris velut homo,

Mira fecit caritas.

34. Ave, Iesu, expers paris,
Cum iam magni nascebaris

Angelus consilii,
Reclinando tibi nato
Non patebat orbe lato
Locus diversorii.

35. Ave, Iesu, caeli heres,
Lecto foeni dum iaceres

Stipularum medio,
Deum pannis involutum
Admiratur pecus brutum

Flentem in praesaepio.

36. Ave, Iesu, flos in foeno,
Deitatis iure pleno

Regnas super sidera,
Membra pannis mater ligat,
Parvum sitis dum fatigat,

Fletu petis ubera.

37. Ave, Iesu, quam stupendum,
Quam devote recolendum,

Quod tu ab initio
Angelorum cibus, vita
Parvo lacte pastus ita

Vagis in praesaepio.

38. Ave, Iesu, rex sublimis,
Factus pro me parvus nimis

Sub pannis infantiae,
Concinentes quem loquuntur,
Non loquenti obsequuntur

Caelestes militiae.

39. Ave, Iesu, puer mitis,
Fili clarae Sunamitis,

Cuius ad crepundia
Te laudando voto, more
Assistebant cum honore

Angelorum milia.

40. Ave, Iesu, quem clamabat,
Magis tribus quem signabat

Splendor novi sideris,
Ad praesaepe contra morem
Cum adorant salvatorem

Dono terni muneris.

41. Ave, Iesu, flos candoris,
Longe spargens vim odoris

Orientis finibus,
Sidus novum ostendisti,
Novus homo cum lusisti
Maternis in sinibus.

42. Ave, Iesu, non loquentes
Quem loquuntur morientes

Voce fusi sanguinis,
O quam miro tunc dolore,
Virgo mater, pro te flore

Vim pavebat hominis.

43. Ave, Iesu, flos aestive,
In aeternum vale, vive,
Flos decore nimium,
Aevo ludis puerili,
Morte demum dandus vili
Crucis per opprobrium.

44. Ave, Iesu adorande,
Veritatis revelandae

Tempus cum accederet,
Turbae comes popularis
A Iohanne baptizaris,

Cum baptista tremeret.

45. Ave, Iesu, doctor veri,
Ab aeterno, nunc et heri

Dei sapientia,
Lux in mundo splenduisti,
Verbo, signis claruisti,
Omni plenus gratia.

46. Ave, Iesu, grande mirum,
Quod te talem, tantum virum

ludaea persequitur,
Exoptandus dulcor cuius,
Omne dulce mundi huius

Vincit et non vincitur.

47. Ave, Iesu, lux et dies,
Electorum una quies,

Sola spes et gaudium,
Te invictum amor fregit,
Vitam mori dum coegit

Crucis per supplicium.

48. Ave, Iesu Galilaee,
Sola spes salutis meae,

Dum instaret passio,
Vita mortem sitivisti,
Mortem ultro appetisti

Mortis pro remedio.

49. Ave, Iesu, lumen mundi,
Corpus tuum flagris tundi

Non decebat, Domine,
Sed nimirum, agne lenis,
In hunc mundum homo venis

Pati sic pro homine.

50. Ave, Iesu, amor vive,
Corpus tuum munda nive,

Nive, inquam, clarius,
Flagris, ecce, laceratur
Et cruore purpuratur

Rosa rubicondius.