Secunda Quinquagena.

1. Ave, qui non gloriaris,
Iesu Christe, nec laetaris

Morte pereuntium,
Fac nos tibi oboedire,
Ut possimus pervenire

Ad tuum consortium.

2. Ave, Iesu, qui deseris
Superbos, nobis miseris

Fac opem celeriter,
Te Dominum invocamus,
Pro peccatis exoramus

Te Deum humiliter.

3. Ave, Iesu, nos eripe
Ab hostibus et suscipe

In aeterna requie,
Laudes audi cum precibus,
Quas tuae praesens auribus

Offero clementiae.

4. Ave, Iesu, qui parasti
Tibi pennas et volasti

Caeli petens gloriam,
Tu daemonum temptamenta
Superasti fraudulenta

Per assumptum hominem.

5. Ave, lucis altitudo,
Quem inspicit multitudo
Virtatum caelestium,
Tu puerorum puritas,
Te peperit virginitas
Ad salutem omnium.

6. Ave, Iesu, rex caelorum
Pia prece supernorum

Emunda nos a vitio,
Dum recordor tuam necem
Pone, precor, meam precem

In caeli sacrario.

7. Ave, Iesu, cuius nomen
In Israel velut omen

Primitus est cognitum,
Illic arma confregisti
Et de caelis transmisisti

Spiritum paraclitum.

8. Ave, tu, cuius oculi
Pro remedio populi

Tulere vigilias,
Tuam plebem traduxisti
Per mare, quo demersisti

Phalangas Aegyptias.

9. Ave, Iesu, vitae pastus,
Cuius sapor pellit fastus

Et cruores criminis,
Panem caeli contulisti
Populo, quem eduxisti

De terra caliginis.

10. Ave, nostra professio,
Quam acquirit oratio
Puraque confessio,
Hanc hi digne mercati sunt,
Qui te Deum secuti sunt
Corporis martyrio.

11. Ave, Iesu, qui milibus
Caeli praees virtutibus

Per summam potentiam,
Per te vitam aetheream
Humanam regi vineam

Oramus per gratiam.

12. Ave, granum triticeum,
Quod comprimit aculeum

Famis et infamiae,
Hoc frumento reparatur,
Qui te Deum veneratur

Cum cultu iustitiae.

13. Ave, Iesu, doctus scriba,
Tua lege tuos ciba

Iudex factus pauperis,
Hominibus, quos plasmasti,
Qui pro nobis decertasti,

Miserere miseris.

14. Ave, cui non est similis,
Licet ad tempus flebilis

Et ferens convicia,
Adversum te sonuerunt,
Qui te clavis confixerunt

Furentes insania.

15. Ave, Iesu, quam beati
Sunt, qui purae castitati

Serviunt attentius,
Te turturem imitantur
Et columbam venerantur,

Qui es Dei filius.

16. Ave, per quem iniquitas
Aboletur et veritas

Nostras replet animas,
Iram tuam, quam meremur
Pro peccatis, quis tenemur,

Oramus, ut comprimas.

17. Ave, Iesu, nos custodi,
Ne permittas nos corrodi

Peccatorum vermibus,
Qui te suum refugium
Statuunt et praesidium

Continuis precibus.

18. Ave, per quem est creata
Super caelos exaltata

Caeli terrae domina,
Quae pro nobis preces fundat
Tibi et in caelis condat
Nos et nostra crimina.

19. Ave, Iesu, cuius noti
A te mecum sunt remoti

Prope mortis terminum,
Illic matrem commendasti
Discipulo, quem amasti

Supra natos hominum.

20. Ave, Iesu specialis,
Deo patri coaequalis

Et sancto spiritui,
Te peperit virgo mater,
Tibi dixit Deus pater:

Hodie te genui.

21. Ave, Iesu, flos de spina,
Stirpe natus ex canina,

Iudaeorum populo,
Qui venturum te noverant,
Incarnatum contempserunt

Locantes in tumulo.

22. Ave, lapsi reparator,
Arcanorum reserator,

Cognitor consilii,
Hic scapulis nos adumbra,
Deposita carnis umbra
Te das in ius praemii.

23. Ave, Iesu, qui sanctior
Omnibus et humilior

In nostra substantia,
In arborem ascendisti,
Fructum eius collegisti,

De quo manat venia.

24. Ave, Iesu, rex decore,
Qui tuorum ex amore,

Subintrasti virginem,
Carne tectus qua prodisti,
Ut dilectum, quem fecisti,

Reciperes hominem.

25. Ave, Iesu, qui de caelo
Descendisti carnis velo

Trabeatus paupere,
Creaturam, quam formasti,
Pietate visitasti

Sedentem in pulvere.

26. Ave, Iesu, leo fortis,
Qui destructa lege mortis

Caeli portas aperis,
Tu virtutem potentium,
Fastus superbientium

Dissipas et conteris.

27. Ave, Iesu, rex Israel,
Qui Tobiae per Raphael

Illuminas oculos,
Per te ipsum descendisti,
Pretiosa redemisti

Passione populos.

28. Ave, Iesu, qui commoves
Terram, cum vis, et amoves

Principes de solio,
Nos pro vino vinearum
Imbre riga lacrimarum,

Ut purgemur vitiis.

29. Ave, Iesu, quem reclamo,
Ut liberes me, ne hamo

Capiar venantium,
Tu pharetra, tu clipeus,
Tu gladius argenteus,

Turris te timentium.

30. Ave, Iesu, cui subditur,
Quidquid fine concluditur

Viventi perenniter,
Mea nimis infirmatur
Mens, nam a te separatur

Delinquendo iugiter.

31. Ave, Iesu, quem sitio,
Iram pelle cum iurgio,

Nostra serva corpora,
Dulcedine castitatis
Et fraternae caritatis

Nostra reple pectora.

32. Ave, Iesu, ne terrore
Terreamur vel livore

Subruamur hominum,
Nos custodi venatoris
A sagitta deceptoris,

Rumpe nexus criminum.

33. Ave, Iesu, lux dierum,
Qui temperas vices rerum

Accinctus potentia,
Imbre terram inebrias,
Hominibus delicias
Praeparas ex gratia.

34. Ave, Iesu laudabilis,
Consilio terribilis

Super natos hominum,
Te laudamus iubilando,
Confitentes venerando

Caeli terrae Dominum.

35. Ave, Iesu, miserere,
Nostri quoque recordare,

Benedic et dirige,
Ut te Deum diligamus
Et post mortem convivamus

Tecum, tu nos erige.

36. Ave, pater orphanorum,
Consolator miserorum,
Miserator pauperum,
Tu, Iesu, es mons montium,
Humilitas humilium,
Relaxator scelerum.

37. Ave, Iesu, qui cibatus
Es pro nobis et potatus

In amaritudine,
Non avertas a pueris
Vultum tuum, cum videris

Nudatos velamine.

38. Ave, Iesu convertantur,
Erubescant, conterantur,

Qui me quaerunt perdere,
Ego dolens et egenus,
Quem inquinat carnis Venus,

Ne me libem libere.

39. Ave, Iesu, cui canimus,
Cuius opem expetimus

Devotis carminibus,
Purga mentes et labia
Sonis tibi praeconia,

Ut reddamus dulcibus.

40. Ave, cuius potentiam
Reges et sapientiam

Venerantur supplices,
Te magnates contremiscunt,
Vultum tuum concupiscunt

Caeli terrae supplices.

41. Ave, Iesu, qui bonus es,
Deus homo qui factus es,

Ut salvares omnia,
Cor a nobis lapideum
Aufer et da cor carneum

Pro tua clementia.

42. Ave, Iesu, memor esto
Tuae gentis, mihi maesto

Da caeleste praemium,
Leva manum contra gentes
Adversum nos erigentes

Linguae suae gladium.

43. Ave, Iesu, qui populum
Caeleste donans poculum

Instruis humiliter,
Ni me clemens respexeris
Et iuvamen intuleris,

Labens cadam graviter.

44. Ave, Iesu, qui omnibus
Praees diis ac gentibus,

Rex clemens, amabilis,
Quidquid caelo continetur
Vel in terris possidetur,

Factor es laudabilis.

45. Ave, cuis principatus

Comprehendit mundi status

Sui magnitudine,
Ad te tui cum amore
Perveniunt et honore

Colorati sanguine.

46. Ave, Iesu, cuius regnum,
Non caducum sed aeternum

Creditur ab omnibus,
Qui te toto corde credunt
Deum regem nec discredunt

Praeesse caelestibus.

47. Ave, Iesu, cui cantica
Nova dulci cum musica

Decantat ecclesia,
Nam laudes et praeconia
Solemnisque laetitia

Decantat per omnia.

48. Ave, verbum mirabile,
Nomen inenarrabile,

Sanctum et terribile,
Per quod mundus stabilitur,
Porta caeli aperitur

Potens et laudabile.

49. Ave, qui cordis iubilo
Mentem emundas nubilo

Noctis et invidiae,
Caeli patefac aditum,
Ut post carnis depositum

Luce fruamur gloriae.

50. Ave, Iesu, qui timorem,
Superbiam et livorem

Detestaris hominis,
Purga me ab illecebris,
Ut actu, mente, palpebris,

Paveam viam criminis.