Prima Quinquagena.

1. Ave, Iesu, lignum mite,
Lignum, inquam, vitis vitae,

Quae salutem edidit,
Ligno mundus est peremptus,
Ligno rursus est redemptus,

Cum Iudas te vendidit.
2. Ave, Iesu, miserere
Pecatoris et medere

Meae mentis intima,
Qui pro nobis es benigne
A Iudaeis sed indigne

Probra passus plurima.
3. Ave, Iesu, vox amoena,
Vox suavis, vox serena

Vox plena laetitiae,
Sana, precor, sauciatum,
Serva tibi Deo datum

Ab hoste malitiae.
4. Ave, Iesu, qui dormisti,
Qui sepultus iacuisti

Terrae sub umbraculo,
Felix miles te potavit,
Semel latus perforavit

Crucis in patibulo.
5. Ave, Iesu, quem adorant
Omnes gentes et exorant

Dicentes: salvifica;
Igne sancto meos ure
Renes et cor, ut te pure

Laudem laude caelica.
6. Ave, Iesu, in furore
Non me tuo vel ardore

Igni tradas hostium,
Paenitentis mentem sana,
Mala cordis, oris vana,

Carnis dele vitium.

7. Ave, Iesu, iudex iustus,
Ira cares, vindex pius,

Mitis atque patiens,
Oro, ne nostras rapiat
Animas vel inficiat

Adversator saeviens.
8. Ave, Iesu, splendor patris,
Qui beasti ventrem matris,

De qua carnem sumeres,
Sub qua Deus latitasti
Sicque eos provocasti,

Ut hostes deciperes.
9. Ave, Iesu, legis lator,
Esto meus gubernator

Nunc semper et ubique,
Ut fidei sim amator
Atque legis conservator

Mariae matris opere.

10. Ave, Iesu, verbum patris,
Vitae via, vas virtutis,

Per beata viscera,
Cuius carnem induisti
Emisso ave caelesti,

Sana nos et libera.

11. Ave, Iesu, summum bonum,
A quo venit summum donum,

Corpus sumens fragile,
Tu veritatis abyssus,
Te respuit omnis coetus,

Signum delectabile.
12. Ave nostri mediator,
Iesu, mundi reparator,

Qui salvas et perimis,
Dele mentis pravitatem,
Daemonibus potestatem

Qui confers et adimis.

13. Ave, Iesu, nos respice
Servos tuos et refice

Caelesti dulcedine,
Stultus stulta meditatur,
Ei lectus superatur

Phantasmatum turbine.

14. Ave, Iesu, puritatis
Auctor, pacis, veritatis,

Custos innocentiae,
Ex hoc mundo triumphare
Fac me, precor, et calcare

Principem superbiae.

15. Ave, Iesu, Deus meus,
Ad te clamat omnis reus
Clementem, propitium,
Tu es vitae via, strata
Paenitenti usque grata
Tendenti ad praemium.

16. Ave, Iesu, summus amor,
Te moveat meus clamor

Ad misericordiam,
Dono tuae pietatis
Igne dele caritatis
Peccaminum copiam.

17. Ave, Iesu, robur meum,
Qui confringens calcaneum

Adversantis zabuli,
In hac vita me conforta
Et ad gregem me comporta
Tui tabernaculi.

18. Ave, Iesu, dies clara,

Quem non capit mens amara

Nec nutantis oculi,
Tuum nomen veneratur
Ab omnibus et laudatur

In saeculum saeculi.

19. Ave, Iesu, rex caelorum,
Pia prece supernorum

Emunda nos vitio,
Dum recordor tuam necem,
Pone, precor, nostram precem

In caeli sacrario.

20. Ave, Iesu, rex suavis,
Qui ad instar laetus avis

Repetisti supera,
Tibi preces offerimus,
Exaltatum te credimus

Supra caeli sidera.

21. Ave, Iesu, spes sanctorum,
Te vesana Iudaeorum

Turba morti tradidit,
Te flagellis ceciderunt,
Cruci demum adfixerunt,

Ut scriptura prodidit.

22. Ave, Iesa, cuius mensa
Fidelibus est extensa

Longe, late populis,
Hac in mensa immolatur
Agnus ille, quo mundatur

Mundus plenus maculis.

23. Ave, Iesu, qui creasti
Caelum terramque fundasti

Et fecisti maria,
Qui creator es omnium,
Cordi meo da gaudium,

Quod expellat vitium.

24. Ave, Iesu, mundi salus,
Cuius dono homo lapsus

Rediit in patriam,
Tu veritas, vita, via,
Via, inquam, mitis, pia

Et monstrans iustitiam.

25. Ave, Iesu, in supernis

Sedens preces qui non spernis

Tuorum fidelium,
In directum siste pedem
Meum deduc et ad sedem

Supernorum civium.

26. Ave, Iesu, salus mea,
Roboretur tuo mea
Virtus adiutorio,
Te Iudaei reliquerunt,
Sed angeli susceperunt
Cum ingenti gaudio.

27. Ave, Iesu, cuius caro
Poenam ferens ab amaro

Nos purgat contagio,
Meam mentem castam serva,
Ne daemonum hoc proterva

Corrumpat incursio.

28. Ave, Iesu noster, ave,
Mundi reparator a vae

Crucis ferens pondera,
A Chaldaeis veneraris
Et a magis adoraris,
Dantque tibi munera.

29. Ave, Iesu, qui sanasti
Luctum Adae protoplasti

Eiusque propaginis,
Es angelis minoratus,
Cum es nostri recordatus

Corpus sumens virginis.

30. Ave, Iesu, beatorum
Vita, panis angelorum

Caeli dans delicias,
Esto mihi fulcimentum,
Contra hostes munimentum,

Ut salvum me facias.

31. Ave, Iesu, laetitia

Summi patris et gloria,

Sanctorum praesidium,
Fere meum inimicum
Et cor mihi da pudicum,

Iesu, factor omnium.

32. Ave. Iesu, quo beatus
Grex est ille dealbatus

Supernarum virginum,
Verbo tuo spiritales
Recreantur et carnales

Te cognoscunt Dominum.

33. Ave, Iesu, cuius dono
Reficitur omnis homo

Puraque sententia,
Nos amare, quod praecipis,
Fac, ne daemonum principis

Fallamur astutia.

34. Ave, Iesu, cuius minis
Cedunt hostes, venit finis,

Ut iudices homines ;
Arma, scutum apprehende,
Deus pie, me defende

Cum sanctis et ordines.

35. Ave, Iesu, fons amoenus,
De quo rivus manat plenus

Caelesti dulcedine,
Fac, ut tecum gloriemur
Et aeternae sociemur

Vultus tui lumine.

36. Ave, Iesu, qui diligis
Veritatem et eligis

Pauperes in saeculum,
A gladio peccatoris
Et a lingua detractoris

Serva tuum famulum.

37. Ave, Iesu, cuius verba
Semper virent velut herba

In sanctorum cordibus,
Lumbis meis castitatem
Dona, menti puritatem,

Cor reple virtutibus.

38. Ave, Iesu Christe, vias
Illas mihi monstra pias

Ducendo ad patriam,
Finem meum respicito,
Dono tuo gratuito

Dona mihi veniam.

39. Ave, verbum speciale,
Genus regens hoc mortale

Tua sapientia,
Immitte ori canticum,
Ut supremum te medicum

Laudem in ecclesia.

40. Ave, Iesu, quem proditum
Confitemur et venditum

A viro perfidiae,
Intellectum da serenum,
Quo vitemus hostem plenum

Spiritu fallaciae.

41. Ave, Iesu, vox fidelis,
Quem despicit infidelis

Sepultus in vitiis,
Te sitio fontem vivam,
Repara me fugitivum

Sanctorum deliciis.

42. Ave, Iesu, verus homo,
Qui deceptum Adam pomo

Reducis ad superos,
Paradisi voluptate,
Vultus tui claritate

Refice nos miseros.

43. Ave, Iesu, rector meus,
Caeli, terrae verax Deus,

Qui custodis Israel,
Contra meos hostes pugnet
A te missus Michael
Archangelusque Gabriel.

44. Ave, Iesu gloriosus,
Homo forma speciosus

Prae filiis hominum,
Per te mihi remittatur
Ac de corde propellatur

Multitudo criminum.

45. Ave, qui nos laetificas
Et exaltans glorificas

In superna patria,
Donum benigni spiritus
Transmitte nobis caelitus

Tua, Iesu, gratia.

46. Ave, sub cuius manibus
Subicitur et pedibus

Gens amica proelii,
Fac nos tuos amatores,
Ut caelestes possessores
Efficias gaudii.

47. Ave, Iesu, qui laudandus
Es a nobis, quo salvandus

Mundus erat perditus,
Tu, rex regum dominator
Veritatis et amator,

Es a nobis cognitus.

48. Ave, qui nos redemisti
Et in cunis iacuisti

Parvoque praesaepio,
Frater noster effectus es
Per carnem, quando natus es

Divino consilio.

49. Ave, Iesu, qui congregas
Bonos et malos segregas

A tuo consortio,
Ne me velis deputare
Cum impiis et damnare
Tremendo iudicio.
50. Ave, Iesu, fili Dei,
Miserere, precor, mei
Per misericordiam,
Munda mundum hunc im-
mundum
Et cor in me crea mundum
Visitans per gratiam.