Prima Quinquagena.

1. Ave, rosa, flos aestive,
O Maria, lucis vivae
Suave habitaculum,
Lumen vivum ex te luxit,
Lumen vitae quod reduxit
In hoc mortis saeculum.

2. Ave, rosa aestivalis,
Nulla unquam rosa talis

In hoc mundo splenduit,
Ut est notum Gabrieli,
De te sola lumen caeli

Homo nasci voluit.

3. Ave, rosa, flos vitalis,
Creatura aestivalis,

Felix o prodigium,
Quod cum Deus fabricaret,
Hoc intendit, ut monstraret

Grande artificium.

4. Ave, rosa, decor cuius

Omne pulchrum mundi huius

Premit et exsuperat,
Lege carnis nihil tale
Conferendum vel aequale

Mundus germinaverat.

5. Ave, rosa non vulgaris,
Disciplinae puellaris

Exemplum et regula,

Cedrus cedri vincis iura,

Quam plantavit Dei cura,

Fragans fumi virgula.

6. Ave, rosa, cui scripturae
Alluserunt adfuturae

Praedicentes inclitam,
Arca Noe quam signavit,
Quam abyssus exaltavit

In sublimi positam.

7. Ave, rosa, intus, extra
Creatoris forti dextra

Illita bitumine,
Nam bitumen hoc amoris
Nunquam solvi vi terroris
Potuit ab homine.

8. Ave, rosa, quam benigne
Firmae pacis ad insigne

Deus arcum posuit,
Quo inspecto clemens Deus,
Ne periret homo reus,

Parcere disposuit.

9. Ave, rosa verni roris,
Te divini ros amoris

Totam sic roraverat,
Ut hunc esses genitura
Carne sine carnis cura,

Deus quem genuerat.

10. Ave, rosa, rosa veris,

Dum in mundum nascereris,

Totus mundus floruit,
Te nascente velut sole
Tenebrarum pulsa mole
Nova lux emicuit.

11. Ave, rosa tactu lenis,
Cuius vultu, cuius genis

Rubet verecundia,
Vultu cuius instar floris
Relucebat lux pudoris

Virginalis gratia.

12. Ave, rosa, mater Dei,
Admirandae speciei,

Flore fulgentissima,
Rosa, inquam, clari floris,
Longe spargens vim odoris.

Gratiis plenissima.

13. Ave, rosa, germen clarum,
Nil spineti, nil spinarum,

Nil rigoris retinens,
Virgo vitae singularis,
Disciplinae puellaris

Principatum obtinens.

14. Ave, rosa paradisi,

Per quam morbi sunt elisi.

Serpens, quos induxerat,
Morbi mortis, primus homo
Quos gustato uno pomo

In nepotes fuderat.

15. Ave, rosa rubens verno,
Te creator ab aeterno

Sic praedestinaverat.
Ut ex tua carne pura
Verbum esses genitura,

Corde quod ructaverat.

16. Ave, rosa suavis tota,
Tu columba lacte lota,

Affluens deliciis,
Pulchra, decens, verecunda,
Prudens, casta, mitis, munda,

Cunctis plena gratiis.

17. Ave, rosa, prae puellis
Solis iubar ut prae stellis,

Ut aurora rutilans,
Nascebaris ut aurora,
Luna fuit vitae mora,

Sol es sursum iubilans.

18. Ave, rosa, vitae vitis,
Vero David Sunamitis

Es quaesita longius,
Qua reperta inter mille
Esse vidit fortis ille

Nihil amabilius.

19. Ave, rosa nata mundo,
Volvebamur in profundo

Umbrosae caliginis,
Lux est orta te nascente,
Tua fulsit lux repente

In salutem hominis.

20. Ave, rosa, sponsa Christi,
Hesther nova appendisti

Aman in patibulo,
Dum amata loco Vasthi
Gentem tuam liberasti

Mortis a periculo.

21. Ave, rosa sola potis,
Ferre vim rhinocerotis

Et invictum capere,
Dum signatum fera tali
Sinu claudis virginali

Moriturum propere.

22. Ave, rosa, recordare,

Dum iam tempus propinquare

Cerneret altissimus,
Quo necandus ligno crucis
Dextra foret magni ducis

Aman superbissimus.

23. Ave, rosa, orbe toto
Quaerebaris Dei voto,

Virginalis castitas,
De qua posset digne nasci,
Lacte cuius vellet pasci

Incarnanda veritas.

24. Ave, rosa sic quaesita,
Pretiosa margarita

Longe pretiosior,
Inveniri meruisti,
Sic inventa placuisti,

Cunctis amabilior.

25. Ave, rosa, novo more
Gabrielis cum ab oro

Sonat salutatio,
Salutantis in sermone
Novitatis ratione
Tua nutat ratio.

26. Ave, rosa singularis,
Novitatem admiraris,

Mens pavore rapitur,
Fatu donec blandi oris
Nascituri ex te floris

Tibi ortus panditur.

27. Ave, rosa, quaeris modum,
Quaestionis factae nodum
Mox dissolvit nuntius,
Ex te, inquit, quod nascetur
Sanctum erit et vocetur
Summi Dei filius.

28. Ave, rosa sic intacta,
Veritatis templum facta,

Thronus sapientiae,
Verbum verbo concepisti,
Dum per fidem paruisti
Inspiranti gratiae.

29. Ave, rosa sic fecunda,
In conceptu verbi munda

Castis in visceribus
Sine mole pignus carum,
Deitatis solem clarum,

Novem portas mensibus.

30. Ave, rosa, modo tali
Cum in horto virginali

Hoc floreret lilium,
Pectus tuum astringcbat,
Quod te totam possidebat

Immortale gaudium.

31. Ave, rosa, nec exponi
Nostrae potest rationi

Tanta gratulatio,
Virtus Dei si non ibi
Obumbrasset, virgo, tibi,

Perisses exitio.

32. Ave, rosa, dum amoris,

Admirandi dum fervoris

Ignes tot non toleras,

Vi amoris mente mota,

Prae amore languens tota

In montana properas.

33. Ave, rosa, in montanis
Supra mundum ab his vanis

Quam sublimis habitas,
De profundis cuius mentem
Super caelos ascendentem
Elevavit caritas.

34. Ave, rosa, dum astares,
Dum cognatam salutares

Salutantis vocibus,
Gestit infans ventre clausus
Exhibetur Deo plausus

Voce non, sed motibus.

35. Ave, rosa vultus clari,
Ibi tuo salutari

Carmen laetum concinis,
Mundo lumen effulsurum
Praestolaris nasciturum
Praecursorem luminis.

36. Ave, rosa, trino mense
Ibi perstas innoffense,

Mox Iohannes nascitur,
Qui dum vagit, infans natus
Per te primam elevatus

Fasciis involvitur.

37. Ave, rosa post, non ante
Partu tibi properante

Bethlehem ingrederis,
Verbum ibi caro factum
Non per vetus Evae pactum

Genuisse crederis.

38. Ave, rosa, noto more,
Nullo tamen in dolore

Parturisti filium,
Clausa semper persistente
Via sacra, qua repente

Profudisti lilium.

39. Ave, rosa, quam mirandam,
Quam devote venerandum

Lux inacessibilis,
Nube carnis quod induta
Vili sacco involuta

Facta est visibilis.

40. Ave, rosa, quantae curae
Erat tibi pariturae,

Cum tractares dulciter,
Quam ferventer, quam benigne
Nato velles et quam digne

Deservire iugiter.

41. Ave, rosa, quanti aestus,
Cum instaret dies festus,

Te angebant virginem,
Quae ignara generandi,
Quae infantes fasciendi

Necdum noras ordinem.

42. Ave, rosa, reor ratum,

Quod iam totos necdum natum

Tu affectus traxeras,
Quod in vultus necdum orti
Caritate prorsus forti

Totam te transfunderas.

43. Ave, rosa, pia mente

IIaec ardenter, haec intente

Cogitabas omnia,
Necdum natus erat ille,
Tu complexus dabas mille,

Mille dabas basia.

44. Ave, rosa, sine mora
Sacri partus adest hora,

Verbum caro nascitur,
Et, qui pascit omne vivum,
Mundum omnem defectivum,

Tuo lacte pascitur.

45. Ave, rosa, dum videres
Florem Iesum et stuperes

Clariorem sidere
Fasciatum et obtectum,
Eiulantem ad dilectum

Applicans ubere.

46. Ave, rosa, mater dulcis,
In praesepe foeno fulcis

Flentem sapientiam,
Fletus ille dulcis voti
Merebatur mundo toti

Creatoris gratiam.

47. Ave, rosa, mater spei,
Quam stupendus fletus Dei

Sub pannis infantiae,
Admirandus plane fletus,
Angelorum pavet coetus

Fletum sapientiae.

48. Ave, rosa, verbum mutum
Pannis vagit involutum,

Pannis inquam vilibus,
Vagit infans, nescit fari,
Sursum qui scit fabulari

Angelorum milibus.

49. Ave, rosa, quam decenter
Quam benigne, quam fre-
quenter
Nato figis oscula,
Eiulantem quam abunde,
Arridentem quam iucunde
Reficis mamillula.
50. Ave, rosa vultus clari,
Iam te quaeso recordari

Pastorum laetitiae,
Ortum quibus campi florem
Nuntiarunt, salvatorem
Caelestes militiae.