XXXV. P SALTERIA RHYTHMICA. SERIES PRIOR.
II. Psalterium de Passione Domini, dictum Granum passionis.
IV. Psalterium de D. N. Iesu Christo.
V. Psalterium de D. N. Iesu Christo
VI. Psalterium de D. N. Iesu Christo
VII. Psalterium D. N. Iesu Christi.
VIII. Psalterium D. N. Iesu Christi.
IX. Psalterium beatae Mariae V.
X. Psalterium beatae Mariae V.
1. Circuibo, Domine,
aureum altare
Tuae crucis, appetens
laudis immolare,
Tura, thymiamata
Precum, tu dignare
His me sacrificiis,
Iesu, tu placare.
2. Adoro vestigia
pedum, quae formasti,
Cum in sacris umeris
crucem baiulasti,
Lambo stillicidia,
quibus dedicasti
Terram, quando sanguine
hanc inebriasti.
3. Amplector, deosculor
pedes, Magdalena
Ubi planxit lacrimis
et dolore plena,
Ubi paenitentiae
peracta carena,
In pace dimissa est,
rediit serena.
4. O pedes dulcissimi
Iesu, me quaesistis,
Ovem, quae perieram,
post me cucurristis,
Malleos carnificum
clavos suscepistis,
Viae lassitudinem,
crucem pertulistis.
5. Sanguis pedum, Domine,
quos clavi foderunt,
Deleat vestigia
pedum, quae fecerunt,
Quando carnis, daemonis
cursum peregerunt,
Vanitatis literas
in terra scripserunt.
6. Rogo, pedum rivuli,
ut omissionis
Boni culpas diluant,
perpetrationis
Mali nefas auferant,
virtus passionis
Tuae verbum proferat
absolutionis.
7. Flecto tibi genua,
qui tua flexisti,
Cum tuis discipulis
pedes abluisti,
Magister et Domine,
linteo tersisti,
Hoc exemplum nobile
tuis relequisti.
8. Sanguis tuus, Domine,
quem fudit beata
Tua circumcisio,
deleat errata
Carnis, sit cinctorium
renum, quo servata
Caro sit, in motibus
castis ordinata.
9. Sudoris sanguinei
balsamum per totum
Corpus tuum diffluens
me reddat devotum
In orationibus,
me sanet aegrotum,
Me caelesti curiae
repraesentet lotum.
10. Sanguis tuus, Domine,
nodis flagellorum
Eductus e corpore
meorum membrorum
Sit regalis purpura,
faciat laborum
Patientem, socium
martyrum tuorum.
11. Tui cordis flumina
sanguinis et undae
Meum cor circumfluant,
influant et munde
Abluant, inebrient,
penetrent profunde,
Ut te plene diligat,
serviat iucunde.
12. Sanguis Iesu floride,
sanguis delicate,
Profluens de latere,
pannum menstruatae
Commuta in purpuram,
fac, in pietate
Ambulem, et obtine
vivere beate.
13. Tu resina Galaad
ungis, ut portetur
Iugum Christi suaviter,
facis, ut ametur,
Facis, ut quaerentium
Iesum cor laetetur,
Facis momentaneum,
quidquid sustinetur.
14. Tu Raab funiculus,
tua me extraxit
Virtus de miseriae
lacu, me attraxit,
Prope, longe positum
ad bonum pertraxit,
Ne malum repeterem,
a malo retraxit.
15. Tu misericordiae
mihi pluis rorem,
Tu, vitta coccinea,
Iesu ad amorem
Cor stringis affectibus,
mellicum saporem
Infundis, ut dulce sit
sequi redemptorem.
16. O aqua rosacea,
quam fervor amoris
Eduxit de latere
rosae pulchrioris,
Inter rosas hominum
perversi ardoris
Incentivum prohibe
a claustro pudoris.
17. Tui cordis scissio,
Iesu, scissionem
Cordi meo ingerat,
vulnerationem
Ex amore sentiat
cor et passionem
Tuam suam faciat
per compassionem.
18. Paratum cor, Domine,
meum cor paratum
Sit, ut tibi serviat,
fac, habere ratum,
Quidquid tu decreveris,
fac, ut cogitatum
Suum ad te dirigat
pro me vulneratum.
19. Sanguis tuae dexterae
me dignum beatis
Faciat amplexibus,
cum praedestinatis
Ad dextram me collocet,
ubi dono gratis
Paratum percipiam
regnum claritatis.
20. In virtute sanguinis
tui, Iesu Christe,
Quem sinistra protulit,
rogo, mundus iste
Mihi crucifixus sit,
pauperi assiste,
Ne cum hoedis audiam
Ite, verbum triste.
21. O manus tornatiles,
aureae et plenae
Iacynthis, divitiae
vestrae non terrenae
Sed caelestes, animae
pauperi, egenae
De vestro tribuite,
ut sit ei bene.
22. O manus tornatiles
Iesu, me tornari
A vobis expostulo,
vas hoc transformari
Irae in vas gratiae,
mensae praesentari
Caelesti, et ex eo
laudes propinari.
23. Manus Iesu aureae,
rogo, inauretur
Hoc vas de Arabiae
auro, meditetur
Mens de vitae vespera,
quod morte claudetur,
Quod pulvis in pulverem
cito revertetur.
24. Hoc aurum Arabiae
peccatum excludit,
Hoc est sapientiam,
quae carnis illudit
Commodis, superbiae
motibus concludit,
Bonum mansuetudinis
cordibus includit.
25. Manus Iesu aureae,
vasi apponatis
Aurum terrae Eiulat,
hoc est, conferatis,
Pro meis et proximi
lugeam peccatis,
Ad decorem vasculi
gemmas includatis.
26. De gemmis iacyntinis
peto decorari,
Hoc est, in caelestibus
mente conversari,
Plateas Ierusalem,
vicos pervagari,
Alleluia canere,
sanctos contemplari.
27. In aeternum, Domine,
tuas venerabor
Manus laudum oculis
et regratiabor
Pro donis exhibitis,
cum dolor et labor
Cessabunt, haec tribuant,
unde satiabor.
28. Pastor, tuis umeris,
gratias rependo,
Quibus reportasti me
ad gregem, ponendo
Me in loco pascuae,
foeno me pascendo
Tuae carnis floridae,
pie protegendo.
29. Collum tuum, pontifex,
stolam colaphorum
Suscepit, quod totiens
ulnis brachiorum
Mariae astrictum est,
hoc suppliciorum
Graminis fasciculos
tollis peccatorum.
30. Iesu, tui colaphi
a iugo peccati
Collum meum liberent,
tuae potestati
Me subdant, oboediant
tuae voluntati,
Qui per sacrificium
tuum sunt purgati.
31. Tuae vocis organum
dulce et canorum
Pro me raucum factum est,
quod mihi caelorum
Reseravit gaudium,
praemia iustorum,
Regula iustitiae,
disciplina morum.
32. Mel et lac de labiis
tuis propinasti
Tuis auditoribus,
quibus praedicasti,
Rudes in parabolis
lacte in formasti,
In monte discipulos
melle satiasti.
33. Doctor amantissime,
aurea doctrina
Tua sit vulneribus
meis medicina,
Fundat mihi oleum,
fundat mihi vina,
Det in his proficere
unctio divina.
34. Iesu, tuum Sitio
in cruce prolatum
Sitim mihi provocet,
potum delicatum
Ex te fonte tribuat,
quo me renovatum
Sentiam, a veteri
fermento purgatum.
35. Ut cervus desiderat
ad fontes aquarum,
Sic ad te desiderem,
tuum fel amarum
Et acetum mihi det
ad deliciarum
Paradisum transvehi
pennis aquilarum.
36. Vultum tuum, Domine,
requiro, splendore
Divinum, dignissimum
laude et honore,
Et sputa recipio
pro suavi odore,
Quae illata tibi sunt
a persecutore.
37. O vultus amabilis
Nazareni floris,
Qui Mariae totiens
delicati oris
Suscepisti oscula,
plenus es maeroris,
Qui per sputa contrahis
maculas horroris.
38. Te velant, te lacerant
manus impiorum,
Gravis ad videndum es
oculis eorum,
Quibus lumen veneras
praebere sanctorum,
Margarita, claritas,
splendor angelorum.
39. Anima, considera
hunc vultum et gere
Morem benignissimo
Iesu, exhibere
Vultum stude lugubrem,
cum Maria fiere,
Et Iohannem videas,
debes condolere.
40. Gladius, qui animam
transivit Mariae,
Anima, te vulneret,
quodsi modo pie
Cum Maria fleveris,
hoc peracto viae
Cursu in novissimo
tu ridebis die.
41. Dicat mater filio:
fili, consolare
Sicut mater animam,
Quae flevit amare
Tuam mortem, lacrimas
abstergas, regnare
Fac tecum in gloria,
tecum exsultare.
42. Quae tibi compassa est,
nihil patiatur,
Fiat impassibilis,
nunquam moriatur,
Immortalis maneat,
haec introducatur
In tuum cubiculum
teque perfruatur.
43. Sic misericordiae
mater pro te stabit,
Labores et lacrimas
tuas retractabit,
Auribus dulcissimi
Iesu inculcabit,
Tibi patrocinium
Iohannes praestabit.
44. Stude ergo, anima,
ut promovearis
Ad tantas delicias,
sic intuearis
Iesum, ut pro nomine
Iesu patiaris
Et suis communices
poculis amaris.
45. Vultum tuum, Domine,
mihi contemplari
Dulce sit, iniurias
tuas amplexari,
Tuas contumelias
hic philosophari,
Tribue proficere
in hoc exemplari.
46. Quot maxillae alapis
pro me feriuntur,
Quot verba blasphemiae
tuis ingeruntur
Auribus, sic instruor
cum ista leguntur,
Anna patientiae
mihi proponuntur.
47. Horum recordatio,
Iesu, armaturam
Mihi tolerantiae
praestet profuturam,
In adversitatibus,
age meam curam,
Ne factus impatiens
excedam mensuram.
48. Molestavit foetidum
sputum sanctitatis
Tuae nares, Domine,
ut nos trinitatis
Pasceres aromate,
nobis collocatis
Per te in florentibus
paradisi pratis.
49. O summae fraglantiac
et caelestis chori
Aureum turibulum,
tibi, meo flori,
Rosae meae supplico,
mihi sis odori,
Sursum trahe spiritum,
cum contingat mori.
50. Iesu, rosa candida,
rubicunda, oro,
Animam reficias
meam, cum laboro,
In morte hanc eripe
a causis et foro
Daemonum, hanc insere
angelorum choro.