Prima Quinquagena.

1. Ave, matris almae fructus semper dulcis,
Concilium malorum suis cum tricis,
Cathedram pestilentiae semper fugis,
Sed in lege meditari bonum ducis.

2. Ave, Iesu terens gentes
Et populos meditantes
Vana, sed et reges regis
Audire mandato legis.

3. Hostes nostros tua fuga prece,
Ne multiplicati nos in pace
Felicem atque tranquillam vitam
Non sinant agere, sed turbatam.

4. Ave, Iesu iustitiae Deus,

Adiutor atque redemptor meus,
In tribulatione cor meum
Tu dilata ferens auxilium.

5. Astans tibi mane, Iesu,
Te deprecor toto nisu,
Preces meas ne contemas
Ut serviles atque vanas.

6. Ave, Iesu, ave iudex.
Peccatorum ne sis vindex,
Sed meorum miseratus
Sana me, quia turbatus.

7. Ave, Iesu patris decus,
Tu nostrum tolle dedecus,
Tuo namque nos munere,
Optamus solvi onere.

8. Ave, Iesu omnipotens,
Omnes salvari adpetens,
Adonai tibi nomen,
Tu pauperum es solamen.

9. Toto corde tibi, Iesu, confitebor,
Tua narrando mira in te laetabor,
Tibi laudes semper psallam, altissime,
Meque tibi subiciam humillime.

10. In te, o bone Iesu, confido
Et in tuis plagis me abscondo,
Rivis quarum a maculis lavor,
Sic salus est mihi tuus livor.

11. Iesus dulcis, cuius latus in cruce
Est apertum, ut nos ab omni faece
Purgaret criminum, suo sanguine
Hic nos defendat a fraude Satanae.

12. Iesu dulcis, si mei obliviscaris,
Si tu faciem a me elongaveris,
Dolor erit in corde meo per diem,
Nocte neque nullam sperabo requiem.

13. Ave, Iesu, qui positus in ruinam
Multorumque es et resurrectionem,
Ne nos disperdas uti insipientes,
Qui te denegant in corde blasphemantes.

14. Ave, Iesu, cuius habitabit

Tabernaculum, qui non habebit
Alicuius peccati maculam
In anima atque rugam ullam.

15. Ave, Iesu, spes omnium miserorum,
Conserva atque numero electorum
Ascribe et mirifica paenitentes,
Nostras quoque tu dele iniquitates.

16. Ave, Iesu, fons aeternae vitae,

Cuius venae nunquam sunt exstinctae,
De tuo iudicium prodeat
Vultu, oculus aequum videat.

17. Ave, Iesu bone, mea fortitudo,
Diligam te, cui semper me dedo,
Sis refugium meum et liberator,
In tribulatione verus protector.

18. Ave, Iesu, terrae rex et caeli,
Cuius laudes decantant angeli,
Quem tamdiu patres nostri videre
Terris natum votis cupiere.

19. Ave, Iacob sanctam Dei nomen,
Per quod solum speramus iuvamen,
Exaudi in tribulatione
Non equis fisos sed hoc nomine.

20. Ave, Iesu, in virtute cuius
Laetabuntur reges mundi huius,
Et in salutari vehementer
Exsultabunt omnes veraciter.

21. Ave, Iesu, respice in me pauperem,
Ne derelinquas me quamvis peccatorem,
Longe sum, fateor, a salute tua,
Quam non merui propter peccata mea.

22. Ave, Iesu, qui me regis,
Nil ut mihi desit, agis,
Tu me in pascuae loco
Colloca et non opaco.

23. Ave, Iesu, ad quem quis ascendet,
Nisi mundo corde qui recedet
Ab omni gravi iniquitate
Animam servans a vanitate?

24. Ave, in quem confidens non erubescam,
Ad quem animam levans non pertimescam,
Neque invidebunt mei inimici,
Quando fruar tuo eloquio dulci.

25. Ave, Iesu, decus innocentiae,
Ne iudices opera nequitiae,
Sed proba nos et nostros ure renes
Atque memento nos esse homines.

26. Ave, Iesu, tui salus populi,
Orphani protector atque pupilli,
Illumina nos sancti spiritus igne,
Ut hostias immolemus condigne.

27. Ave, Iesu, qui sanctum eripuisti
Per prophetam in lacu dum pavisti,
Leonibus ne tradas confitentes,
Sed eruens nos eorum tere dentes.

28. Ave, aries, qui pro nobis immolatus,
In cruce lancea dire es perforatus,
Et post multa tormenta spinis coronatus
Atque crucifigendus Iudaeis traditus.

29. Iesu dulcis, qui me regis, ave,
Tuum mihi iugum fac suave,
Et peccatum primae matris Evae
Dele meque salva omnia vae.

30. Ave, in quem sperans dum cantabo,
Pro peccatis nunquam confundebor,
Sed tua iustitia ereptus
Ad te nunc curro gaudens et laetus.

31. Ave, Iesu, qui tecta peccata
Conspicis non dimittens inulta,
Remitte, quaeso, iniquitates
Nec mihi imputes vanitates.

32. Ave, Iesu, nostra vera exsultatio,

Quem iustorum omnis decet collaudatio,
Verbo tuo caelos firmatos nos fatemur
Et spiritu oris tui regi laetemur.

33. Ave, cuius laus nisi semper est in ore,
Quem ego benedicam in omni tempore,
Spiritu cuius opto illuminari
Et a tribulatione liberari.

34. Ave, Iesu, qui quondam subsannatus
Et a Satana tertio tentatus
Fuisti post peractum ieiunium,
Exstingue in nobis flammas ignium.

35. Ave, Iesu, ante oculos cuius
Semper est misericordia eius,
Cuius et veritas nubes penetret,
Nobis a patre veniam imploret.

36. Ave, Iesu, cuius aemulor dona,
Mea mihi scelera tu condona
Et cum iniquis me perdere noli,
Sed fac, ne quid mihi inferant mali.

37. Ave, Iesu, nostris pro peccatis
Ne nos transfigas tuis sagittis,
Sed nostras expurgans cicatrices
Da effugere flammas ultrices.

38. Ave, qui coram iudice obmutuisti,
A Iudaeis accusatus non respondisti,
Da rogamus, ut possimus obmutescere
Cum peccantes viderimus contra nos stare.

39. Ave, quem iamdudum exspectans exspectavi
Et quem fundens preces cordis desideravi,
Intende te tandem, quaeso, mihi et audi
Gemitus plangentis populi et exaudi.

40. Ave, Iesu, qui liberas inopem,
Pauperi et egeno ferens opem,
Libera nos, quaeso, in die mala,
Cum cuncti subicient tibi colla.

41. Ave, Iesu, qui fons es desiderandus,
Ad quem cervus fugit omnis sitibundus,
Nostrarum, quaesumus, sitim animarum
Exstingue tribuens veniam culparum.

42. Ave, lucis verae mater,
Quam emisit Deus pater,
Ipsa super te deduxit
Et ad montem sanctum duxit.

43. Ave, Iesu, cuius opus mirabile
Atque auribus nostris delectabile,
Nostris a patribus nobis nuntiatum,
Omnibus salutare atque gratum.

44. Ave, Iesu pie, Dei patris verbum,

Quem vidit Moyses non urentem rubum,
Tibi nunc dico opera mea regi,
Qui solus, fateor, hic debes diligi.

45. Ave, Iesu, refugium nostrum et virtus,
Ignitos carnis nostrae exstingue impetus,
Cordis sordes tuo sacro lava flumine,
Ut in tuo tandem exsultemus nomine.

46. Ave, in quem omnes exsultant gentes,
Eius laudes in corde iubilantes,
Quem magnum fatentur et terribilem,
Suis in operibus mirabilem.

47. Ave, qui magnus es et laudabilis,
In sanctis tuis valde affabilis,
Quem Simeon suscepit in templo,
Tuo, fac, proficiamus exemplo.

48. Ave, Iesu, cuius gentes sapientiam
Audiunt, pauperes et inops prudentiae,
Te laudantem, Iesu, hanc respice plebem,
Qui tuo nutu amplum hunc regis orbem.

40.Ave, Iesu, qui es Deus deorum,
Solis, lunae creator et stellarum,
Fac, quaesumus, ut nostra holocausta
Tibi grata sint semper et accepta.

50. Ave, Iesu, cui soli peccavi
Et quem meis peccatis irritavi,
Meam, quaeso, dele iniquitatem
Tuam per infinitam bonitatem.