Secunda Quinquagena.

1. Ave, Iesu flagellate,
Quam miranda caritate

Pro salvandis fratribus
Vi discissus flagellorum
In conspectu superborum

Sordes tot vulneribus.

2. Ave, Iesu, cuius genae
Rosascentes et amoenae,

Pulchriores floribus,
Sic tunduntur a malignis,
Sputo sordent et indignis

Alaparum ictibus.

3. Ave, Iesu, blande bonis,
Memor tuae passionis

Corde toto langueo,
Dum recordor vitae ducem
Baiulantem sibi crucem,

Cum dolente doleo.

4. Ave, Iesu, flos exorte,
Proterendus saeva morte

Crucis in patibulo,
Quam stupendus ordo fori
Oportere vitam mori
Pro mortali saeculo.

5. Ave, Iesu, botrus vini,
Quem portant vectores bini,

Moyses quos miserat,
Botrus Cypri, o dilecte,
Heu, portaris crucis vecte,
Vectis quem signaverat.

6. Ave, Iesu, auctor vitae,
Cruentatur caput mite

Spinarum aculeis,
Quod Maria osculando
Excomebat tactu blando
Manibus virgineis.

7. Ave, Iesu, memor esto,
Quam spinarum inhonesto

Sordes diademate,
Dulce caput et decorum,
En, languescit inhonorum

Tam cruento schemate.

8. Ave, Iesu, tuas manus
Tortor saevus et vesanus

Cruci clavis adligat,
Pedes sacros ferro clavi
Frangit, fodit, fluxu gravi

Sanguis terram irrigat.

9. Ave, Iesu, puer suavis,
En, confixus cruci clavis

Alto pendes stipite,
Sceleratis iunctus binis
Serto duris plexo spinis

Coronatus capite.

10. Ave, Iesu, puer mitis,
Plena vino vera vitis,

Vino dives vinea,
Potum fudit vini suavis
Corpus tuum fixum clavis,
Latus fossum lancea.

11. Ave, Iesu, vir dolorum,
Orbes marcent oculorum

Clariores sidere,
Speciosi, non vulgares,
Matutinae stellae pares
Mortis languent pondere.

12. Ave, Iesu, germen clarum,
En, pallescit flos genarum,

Blanda sordet facies,
Exspiravit flos decoris,
Livet rosa clari oris,

Labra fregit macies.

13. Ave, Iesu, quam exilis,
Quam despectus, pauper, vilis

Factus es pro homine,
Sed hoc vile pretiosum
Regem nobis gratiosum

Te ostendit, Domine.

14. Ave, Iesu, sine veste

Quam tunc pendes inhoneste,

Flos, qui vestis lilia,
Qui decoras campi flores
Admirandos per colores,

Sordescis penuria.

15. Ave, Iesu, rosa veris,
Cum in cruce morereris,

Vultus tuus palluit,
Eras tamen veris rosa,
Caritate speciosa,

Quae in morte floruit.

16. Ave, Iesu, in dolore

Totus rubens prae cruore,
Ut prophetae dixerant,
Duae cuius parvae stillae
Ad salvandos mundos mille
Suffecisse poterant.

17. Ave, Iesu, amor fortis,
Toleranti poenas mortis

Crucis in opprobrio,
En, assistit illa una, .
Quam mirantur sol et luna,

O dolenda visio !

18. Ave, Iesu Nazarene,
Flos decore, flos amoene,

Flos, quem virga protulit,
Cuius, cum te morientem
Inspectaret, piam mentem

Vis doloris perculit.

19. Ave, Iesu, dulcis amor,
Dolor planctus, fletus, clamor,

Qui Mariam tenuit
Assistentem prope tibi,
Per me mutum nec describi

Ne defleri potuit.

20. Ave, Iesu vulnerate,
Quam miranda caritate

Tua plangit vulnera,
Olim tibi quae lactenti,
Lactis potum sitienti,

Sacra dabant ubera.

21. Ave, Iesu, matrem vide,
Quanto luctu, quanta fide

Dulcem plangit filium,
Frangebatur vi doloris,
Cum videret sui floris

Mortem et exitium,

22. Ave, Iesu, rosa crucis,
Cum per membra clari ducis

Cruor tantus rubuit,
Hunc Maria cum videret,
Defluentem cum defleret,
Prae dolore riguit.

23. Ave, Iesu, recordare
Sunamitis huius clarae,

Sic foedantis faciem,
Florem vide, cerne rosam,
Obstupesce speciosam

Non habentem speciem.

24. Ave, Iesu, reor vere,
Te benignum plus dolere

Matris in doloribus
Quam de tua morte dura,
Illi tua haesit cura,

Non tuis vulneribus.

25. Ave, Iesu, vide stantem
Et cruorem distillantem

Tuis ex vulneribus
Praestolantem cum pavore,
Rapientem cum dolore

Vultu, sinu, manibus.

26. Ave, Iesu, stupe flentem,
Stupe tecum morientem,

Quam pertransit gladius,
Rubra tuo stat cruore,
Nihil unquam hoc dolore

Fuit dolorosius.

27. Ave, Iesu, et intende,
Tanti vim doloris pende

Adurentis viscera,
Amens clamat, pectus tundit,
Lacrimarum fontes fundit
Tua cernens vulnera.

28. Ave, Iesu amorose,

Totus rubens instar rosae

Largitate sanguinis,
Qui profusus ut fluebat,
Defluentem rapiebat

Vestis matris virginis.

29. Ave, Iesu, mea vita,

Consummandus tandem ita

Tactu mortis rigido,
Patri caput inclinasti,
Inclinando exspirasti

Cum clamore valido.

30. Ave, Iesu, hoc in puncto
Sacrum tibi iam defuncto

Latus ferro foditur,
Quo aperto rubicundus,
Quo salvari credit mundus,

Sanguis large funditur.

81. Ave, Iesu, omnes iure
Te deplorant creaturae,

Terra tremens quatitur,
Solis iubar obscuratur,
Mundus nocte fatigatur,
Velum templi scinditur.

32. Ave, Iesu, tua morte
Patuerunt mortis portae,

Petras frangit scissio,
Deum passum sic a malis
Protestatur mundi alis

Machinae commotio.

33. Ave, Iesu, ibi fixa

Virgo stabat cruce nixa,

Moritura pariter,
Tandem ad se disclavatum
Corpus rapit cruentatum

Osculando dulciter.

34. Ave, Iesu, flos exstincte,
Genae, manus, vestes tinctae

Madescunt in virgine,
Quae dum natum amplexatur,
Dum cruentum osculatur
Tuo rubet sanguine.

35. Ave, Iesu, dolor talis,
Eiulatus virginalis

Nullo aevo cognitus
Resolvebat in lamentum
Dura licet intuentum
Pectora medullitus.

36. Ave, Iesu, flos dilecte,

Quam prudenter, quam per-
fecte
Mortem nostram superas,
Tu non habens causam mortis
Nos a morte, vita fortis,
Moriendo liberas.

37. Ave, Iesu, flos praeclare,

Passionis tam amarae

Degustasti poculum,

Fortem illum ut ligares,

Mortem morte superares

Salvaturus saeculum.

38. Ave, Iesu, Dei agne,
Leo potens, fortis, magne

Magni victor inferi,
Quem se tandem redemturum,
Ut spes erat, in futurum

Expectabant miseri.

39. Ave, Iesu, victor fortis,
Qui auctorem nostrae mortis

Elisisti penitus ;
Gaude, virgo, mater Christi,
Quae hunc fortem genuisti,

Missum mundo caelitus.

40. Ave, Iesu, cum te duce
Emigraret nova luce

Tenebrarum populus,
Tunc dolenter, o inferne,
Claritatis ius supernae
Mirabaris querulus.

41. Ave, Iesu, quam formosus,
Luce nova luminosus

Surgis victor inferi,
Samson verus, gigas fortis,
Abstulisti portas mortis,

Ut exirent miseri.

42. Ave, Iesu, fortis leo,
Qui consurgens hypogaeo,

Liber inter mortuos;
Patris noxa protoplasti
Quos sentimus, exstirpasti
Corruptelae carduos.

43. Ave, Iesu, flos vernalis,
Algor fugit hiemalis,

Aestas fulsit caelitus,
Kedivivo cum te flore
Tantas surgit in decore

Sanctorum exercitus.

44. Ave, Iesu, victor mortis,
Quam praeclarae tuae sortis

Splenduit hereditas,
Mortem crucis quam ferendo,
Morte victa quam surgendo

Tua emit caritas.

45. Ave, Iesu, te surgente
Flore novo quam repente

Creatura germinat,
Hac nimirum in figura,
Nostra mori quod natura

Resurgendo desinat.

46. Ave, Iesu, lux caelorum,
Choro teste angelorum

Vivus surgis tumulo,
Ut caelestes et terreni
Foederentur nexu leni

Caritatis vinculo.

47. Ave, Iesu, quam decora
Illa fulsit tunc in hora

Resurgentis species,
Qua fulgente renovatur,
Novo flore purpuratur

Maesta mundi facies.

48. Ave, Iesu, dum fulgeres
Resurgendo novus heres

Caeli, terrae pariter,
Fratres tuos expetisti,
Dubitanti praebuisti

Te tangendum dulciter.

49. Ave, Iesu, blande, lenis,
Qui diebus quater denis

Demum exspirantibus
Ad caelorum summa scandis,
Paradisi claustra pandis

Tuis amatoribus.

50. Ave, Iesu, factor lucis,
Sputa, flagra, probra crucis

Gloriosus superas,
Dum ascendis iubilando,
Patri Deo conregnando
Ades, unde veneras.