Tertia Quinquagena.

1. Salve, crux, pelicanus

per quam cruentatur,
Moritur nycticorax,

passer elevatur,
Qui per aves singulas

recte figuratur,
Christus nos exaudiat,

cum mens tribulatur.
2. Salve, crux, qua spinea
lusus est corona
Mortem morte redimens

Christus hora nona,
Qui coronae contulit

digne nobis dona,
Deum semper anima

benedicat prona.

3. Salve, crux, qua luminis

vestiens decorem
Suum sol subtraxerat

occidens splendorem,
Per occasum vestiens

lucem clariorem
Verum sol iustitiae

nobis det fulgorem.

4. Salve, crux, qua filii

Iacob liberantur,
Cum decem Aegyptii

plagis cruciantur,
Qui per crucem spoliis

Aegypti dotantur,
Per eandem gloriae

terram sortiantur.
5. Salve, crux, quae liberat

nos in rubro mari,
Qui rubente sanguine

facit nos salvari,
Qui baptismum rubricat

cruce salutari,
In te nostris vitiis

donet naufragari.
6. Salve, crux, in quattuor

partibus elata,
Qua sunt mundi climata

quattuor salvata,
Per te sit necessitas

quadruplex sanata,
Anima virtutibus

quattuor quadrata.

7. Salve, crux, qua Dominus

nostri miseratus
Probra pati vilia

mortis est paratus,
Resurgens diluculo,

caelis exaltatus,
In mortis articulo

nobis sit placatus.

8. Salve, crux, qua calicem

bibit passionis
Detractorum odium

sustinens pro bonis
Linguas, quas coinquinat

fel detractionis,
Per te sanet puritas

fidelis sermonis.

9. Salve, crux, qua meruit

caput exaltare,
Qui torrentem voluit

mortis praegustare,
Quem in patris dextera

credimus regnare,
Membra velit capiti

suo sociare.

10. Salve, crux, timentibus

escam dans sacratam,
Carnem Christi cornibus

crucis immolatam,
Qui donat credentibus

escam tam beatam,
Illam det edentibus

mentem timoratam.

11. Salve, crux, qua timuit

calicem poenalem
Christus, docens hominem

fore se mortalem,
Qui timori spiritus

subdidit carnalem,
Timorem timentibus

donet spiritalem.

12. Salve, crux, qua pueri
calvum irrisere,
Iudaei Calvaria
Christum occidere,

Per te laudent Dominum

pueri, qui vere
Puritatis gratiam

puram meruere.

13. Salve, crux, quae laticem

de petra deduxit,
Quando Deus Israel

ab Aegypto duxit,
Nos ducat, quo mysticum

Israel perduxit,
Qui de suo latere

veniam produxit.

14. Salve, crux, qua vinculis

mortis et dolorum
Christus in periculis

fuit inferorum,
Conversus ad requiem

in fine laborum
Det quietem placidam

in regno caelorum.

15. Salve, crux, quae mystico

prelo torcularis
Imples Christi sanguine

calicem altaris,
Calix quos inebriat

vini singularis,
Salvi sint in calice

summi salutaris.

16. Salve crux, quam populi

gentesque laudare,
Iudaei cum gentibus

gaudent adorare,
Quos in cruce veritas

voluit vocare,
Per misericordiam

velit confirmare.

17. Salve, crux, quae lapide

Christo angulari
Diversos parietes

fide iungis pari,
Lapis se spontanee

passus reprobari
Nos caelesti inserat

lapides altari.

18. Salve, crux, qua sabbati

ritus sunt deleti,
Legis septenarii

veteris impleti,
Quotquot octonarios

psallunt alphabeti,
Octavam surgentium

cernant per te laeti.

19. Salve, crux, ascensio

gloriosa caeli,
Scala, quam monstraverat

Deus Israeli,
Tuos gradus scandere

passu det fideli,
Per quem cantum graduum

dulcis cantant meli.

20. Salve, crux, protectio

mundi singularis,
Diem nube protegens,

noctem signis claris,
Per diem prosperitas

non urat solaris,
Nocte nec adversitas

nos laedat lunaris.

21. Salve, crux in atriis

Summae civitatis,
Ima summis foederans

pace caritatis,
Per te servent pectore

pacem unitatis,
Quibus tandem dabitur

pax aeternitatis.

22. Salve, crux, qua veniens

miseris mederi
Caligavit oculis

luminis lux veri,
Sese puros oculos

donet intueri,
Donec Christus miseris

velit misereri.

23. Salve, crux, qua voluit
passer immolari,
Passer, in quo creditur
Christus figurari,

Animam, quam passeri
scimus comparari,

Laqueos venantium
non sinat praedari.

24. Salve, crux, prodigia

faciens signorum,
Virga virgam noxiam

devorans magorum,
A iustis amoveat

virgam peccatorum
Virga crucis moriens

Christus, rex caelorum.

25. Salve, crux, qua militans

Sion liberatur,
Triumphans ecclesia

plene gloriatur,
Semen, quod cum lacrimis

via seminatur,
Per crucem in gaudio

patriae metatur.

26. Salve, crux viaticum

veri dans dulcoris,
Pane frui caelico

pro pane doloris,
Panis nos perpetui

satiet dulcoris,
Cum dilectis dabitur

requies soporis.

27. Salve, crux, qua mystica

vitis sic abundat,
Q.uod olivam mysticis

fructibus fecundat,
Per te Christus saucios

vino vitis pungat,
Ut olivae postmodum

oleo nos ungat.

28. Salve, crux, ecclesiae

scutum singulare,
Quam in Abel coeperat

Cain expugnare,
Quos in suo quaeritur

dorso fabricare,
Mali malum nequeat

magis prolongare.

29. Salve, crux, qua veniam

Ionas dedit mundo,
Ut mundum redimeret

Mersus maris fundo,
Qui clamant ad Dominum

in mali profundo,
A malorum gurgite

mundentur immundo.

30. Salve, crux, remedium

oculis elatis,
Exemplum humilibus

dans humilitatis,
In te pendens humilis

Deus maiestatis
Mentem donet humilem

magis et inflatis.

81. Salve, crux, in foederis

arca figurata
Et arca diluvii

Noe praesignata,
Arca sit ecclesiae

per te liberata,
Arca pauset animae

requie beata.

32. Salve, crux, qua capitis

unguento linita
Unitatis vinculo

membra sunt unita,
Quibus una regula,

una lex est sita,
Mente sint unanimes

et concordes vita.

33. Salve, crux, sententiam

poenalis edicti
Et antiqui relevans

poenam maledicti,
Benedicant Dominum

per te benedicti,
Ad quem manus noctibus

attollunt adflicti.

34. Salve, crux, quam sanguinis
signo praesignavit,
Qui cum primogenitis
Aegyptum damnavit,

Nos salvet in sanguine
Quo suos salvavit,

Qui postes et limina
sanguine signavit.

35. Salve, crux, exercitum

perdens Pharaonis
Signis, ditans Israel

in deserto donis,
Hunc laudet laudabilis

laus confessionis,
Qui nos crucis munere

tantis ditat bonis.

36. Salve, crux, qua parvuli

petrae alliduntur,
Fide Christi noxii

motus reprimuntur,
Super Babyloniae

fluctus qui queruntur,
Per te canant cantica,

quae caelis canuntur.

37. Salve, crux, qua tribuit

pro nobis tributum,
Suum sanctum sanguinem

Dominus virtutum,
Qui formavit manibus

nostrae carnis lutum,
Opus non despiciat

suum destitutum.

38. Salve, crux, qua sessio

Domini mortalis
Et post resurrectio

datur triumphalis,
Quos involvit sessio

mortis generalis,
Per te resurrectio

salvet aeternalis.

39. Salve, crux, qua Domino

lingua venenosa
Superbe detraxerat

plebs perniciosa,
A peste superbiae

linguaque linguosa
Nos defendat passio

Christi gloriosa.

40. Salve, crux ad Dominum
dirigens incensum,
Patri Christum offerens

manibus extensum,
Qui clamorem moriens

emisit immensum,
In crucis memoria
nostram, figat sensum.

41. Salve, crux, e carcere

ducens confitentes,
Donans patientiam

inter persequentes,
Neve mercenarii

simus fugientes,
Vera patientia

nostras firmet mentes.

42. Salve, crux, qua spiritu

Christus anxiatus
In obscuris corpore

fuit collocatus,
Iustus iudex omnium

in te iudicatus
Non intret iudicium

cum servis iratus.

43. Salve, crux, superbiam

Goliae frenare,
Maxillam Leviathan

potens perforare,
Mundum, carnem, daemonem

per te superare,
Suos hostes animam

Christus det domare.
44. Salve, crux, qua veniae

datur plenitudo,
Divinae potentiae

patet magnitudo,
Te dierum omnium

laudet longitudo,
Tuas laudes resonet

orbis latitudo.
45. Salve, crux, ab omnibus

digna salutari,
Digna dignis laudibus

a cunctis laudari,

Qui sperare prohibet

in re saeculari,
Nos in tuis laudibus

donet delectari.

46. Salve, crux, qua sanguini

mixta fluit unda,
Quae corvorum pabula

pullis dat fecunda,
Ut Deo laudatio

nostra sit iucunda,
Per te vocis organo

mens concordet munda.

47. Salve, crux, Ierusalem

porta sempiternae,
Porta pandens aditum

patriae supernae,
Qui portant miseriam

sarcinae modernae,
Per te laudem gloriae

modulent aeternae.

48. Salve, crux, qua media

factura factorem,
Creatura quaelibet

laudat creatorem ;
Quem mundi laudabilem

laudamus auctorem,
Ad laudes perpetuae

nos ducat dulcorem.
49. Salve, crux, restituens

primae dignitati,
Quos primi deiecerat

sarcina peccati,
Per te novum canticum

cantent renovati,
Deum laetis laudibus

laudent liberati.
50. Salve, crux, materia

summae melodiae,
Finis et impletio

nostrae psalmodiae;
Qui cuncta definiet

in postremo die,
Nos in suae laudibus

salvet harmoniae.