201. De Vita Scholarium.

1. O scholares, discite,
Auribus percipite,

Oculis videte,
Quam beatam ducitis
Vitam, quam diligitis

Studium quietis.
Mane scholas petite,
Vespere recedite

Domum repetentes ;
Quis status felicior,
Quae vita securior

Inter nunc viventes.

2. Reges, duces, comites,
Principes et milites

Nunquam sunt securi,
Vivunt enim misere.
Arma debent gerere

Semper pugnaturi.
Appellantur domini,
Omini non homini

Talis laus debetur;
Bona transitoria
Sunt eorum gloria,

Sicuti videtur.

8. Mercatores avidi,
Nocte, die timidi

Flumina marina
Propter lucrum transeunt
Et quandoque pereunt

Morte repentina.

Quorum mercimonia
Sorte pendent dubia

Pariter et vita,
Visu miserabili
Pereunt de facili

Diu acquisita.

4. Rustici sunt asini,
Quibus terrae domini

Dominantur mire,
Quidquid habent, rapiunt,
Si non habent, adigunt

Pauperes abire.
De thesauro paupere
Magnis solent addere

Magnam portionem,
Sed eo flebilius,
Quod his Deus citius

Mittat ultionem.

5. Regula scholarium
Est excellens omnium

Vitae sanctitate,
Licet nulla similis,
Tamen est difficilis

In asperitate.
Soli Deo serviunt,
Sitiunt, esuriunt,

Quorum paupertatem
Enarrare nequeo,
Consequuntur ideo

Christi pietatem.

11. Ex istis colligite
Vitam, quam diligite

Semper, clericalem,
Singula pertranseo
Ita, quod nunc nescio

Similem vel talem.
Vos estis in medio
Libero arbitrio

Rite considentes,
Postquam senueritis,
Sacerdotes eritis

Deo servientes.

12. Qui in terris proprium
Linquunt, patrimonium

Habent spiritale;
Quapropter sollicite
Date preces debite

Propter donum tale.
Ipse vos ad gaudia
Transferat caelestia

Precibus placatus,
Ubi sine termino
Hymnum canit Domino

Populus beatus.