173. De Passione Domini.

1. Iesus humani generis,
Ex membris natus teneris

Virgineis,
Factus est salvatio ;
Psallat fidelis contio.

2. Ovis gaudet deperdita
Et sanitati reddita,

Vitae data,
Spreta vi pythonica
Exsulta, plebs catholica.

3. Hamum appendit caelicum,
Qui fructum tulit deicum,

Magnificum,
Vincens inferni principem,
Pendens ad crucis stipitem.

4. Aspexit nos sophia,
Exclusos ierarchia,

Mundi via,
Emisit nobis filium,
Laudemus caeli lilium.

5. Nomen Iesu gloriosum,
Verbum Dei generosum

In saeculum,
Cuius amara passio
Est mitis consolatio.

6. Nostris da, pater luminum,
Culpis fore propitium

Atque pium,
Ne terreat supplicium,
Dele peccantis vitium.

7. Emisti tuo sanguine
A Stygis nos voragine

Et scelere;
Matris piae hortamine
Flentem naturam respice.

8. Sancto sit laus paraclito,
Cum patre simul filio

Prae gaudio;
Septem dona spiritus
Nobis redde divinitus.