180. De beata Maria V.

1 a. Psallat fidelis contio
Cum gaudio
Iubilando Mariae,

lb. Et praesentemus cantica
Organica

Sollennis melodiae.

2 a. Quam sine labe criminis
Et salvo flore virginis
Matrem pater elegit,

2 b. Per quam gustus exitii
Et perpetis exsilii
Ius pristinum infregit.

3 a. Tu es pincerna veniae,
Dives in caritate,
Et fons misericordiae
Manans suavitate.

3 b. Tu stella pudicitiae,
Tu vitae medicina,
Peccati telo sauciae
Munditiae cortina.

4 a. O nobilis puerpera,
Mundi tu lavas scelera,
Hoc orbi perfecisti,

4 b. Et mortalium generi
Clausisti portas inferi
Vertesque confregisti.

5 a. Flos virginum,
Dux agminum
Caelestium,

Prae ceteris hominibus
Beata.

5 b. Tu servulis
Periculis
Refugium,

Caelestibus agminibus
Praelata.

6 a. O regina,
Sine spina

Tu rosa vernalis,
Dans odorem
Dulciorem

Paradisi malis,

Tu gemma principalis,
Signum dumi,
Virga fumi

Vigor aestivalis.

6 b. Stella maris
Appellaris

Lapsis in sentinam,
Peccatorum
Naufragorum

Dirige carinam

Ad patriam divinam,
In qua domo
Nullus homo

Patitur ruinam.

7 a. Maria, salus hominum,
Medicina criminum,
Te decet post Dominum
Laus, honor et potestas,

7 b. Nam ex te manat gratia,
Pax, misericordia,
Fides, temperantia,
Lux, bonitas, maiestas.

8 a. Tu nati tui filia,

Supremi genitoris,
Continentis omnia
Nostrique creatoris,
Tu manna es saporis.

8 b........

9 a. Area arida,
Quam supernus

humor irrigavit,
Vinea regia,
Rosa spinae nescia,

Quam Deus plantavit.

9 b. Tu sine semine
Nati Dei

mater exstitisti,
Caelicos aditus,
Vetitos introitus
Orbi reclusisti.

10 a. Tu adulescentulis
Oleum effusum,
Salus in periculis,
Spes in offendiculis,
Ostium praeclusum.

10 b. Tu nautae flnctivago

Sidus salutare,

Ancora tu naufrago,

Submersis in pelago

Nobis auxiliare.

11a. Tu principium

Nostrae salvationis,
Reduc devium

Ad thronum Salomonis.

11b. Plecte rigidum

Mundanis inhaerentem,
Fove frigidum

A crimine torpentem.

12 a. Impetra divinitus

Laude te laudantibus

Et in te sperantibus

Vitam cum beatis,

12 b. Ut sublatis penitus

Poenis infernalibus
Iungamur agminibus
Deo sociatis.

13. O mater pietatis.