100. Pro Vacatione in Natali Domini.

1. Gratuletur omnis mundus
Et festinet, ut sit mundus

Ab immundo crimine;
Ecce, mundi reparator,
Iesus Christus, rex, salvator,

Natus est de virgine.

2. Corpus sumit passionis
Deus trinus in personis,

Unus in substantia ;
Virgo, vellus Gedeonis,
Templum veri Salomonis,
Mater est et filia.

3. Novus dator novae legis,
Princeps pacis, fortis aegis,

Fit Mariae filius,
Fons et auctor pietatis
Mundum salvat a peccatis,
Peccatorum nescius.

4. Virgo felix salutatur,
Salutata contemplatur

Hunc salutis nuntium ;
Audit, stupet et miratur,
Et ad partum praeparatur
Ventris domicilium.

5. Sol de stella nascitur,
Dum Deus egreditur

De Maria virgine,
Nec virgo currumpitur,
Nec maiestas laeditur

Iuncto carni numine.

6. Rubus ardens per ardorem
Incorruptum signat florem

Incorruptae virginis,
Ardet rubus nec crematur,
Sic nec virgo violatur

Per ingressum numinis.

7. Pridem erat mundus caecus,
Sed nunc venit mundi decus,

Rex incomparabilis,
Deus, iudex iustus, fortis,
Ut sit comes nostrae sortis,

Homo fit passibilis.

8. O quantum mysterium,
Quantum beneficium

Dedit haec nativitas!
Salus datur homini,
Caro nubit numini,

[Nascitur divinitas].

9. Quidquid fuit in scripturis
Signis dictum et figuris,
Patens est ad oculum ;
Erubescat nunc Iudaeus,
Qui non credit, quod sit Deus,
Nunc qui salvet populum.

10. O Bethlehem felix, gaude,
Lauda Deum digna laude,

Sonet iubilatio!
In te natus rex caelorum,
Medicina peccatorum,

Iacet in praesaepio.

11. Hic est ille, qui nos lavit,
Hic est, de quo prophetavit

Iohannis augurium ;
Hic est, per quem sumus mundi,
Qui peccata tollit mundi,

Redemptor fidelium.

12. O magister, dux scholarum,
Cuius nomen est praeclarum

Titulo scientiae,
Vultu cerne nos clementi,
Audi preces et consenti
Voci pueritiae.

13. Aures tuas aperi,

Da, quod petunt pueri,

Ludendi licentiam,
Nostra quod infantia
[Pro tali licentia]
Tuam laudet gratiam.

14. Haec est illa sancta dies,
In qua debet esse quies

Et summa laetitia;
Christo nato concinamus,
Ut cum Christo gaudeamus

In aeterna gloria.