164. De Nativitate Domini.

1. Laetetur Ierusalem,

Sion plaudat filia,
Nam Christus in Bethlehem

Natus est a filia;
Pax in terra comminus,

Lux in nocte claruit,
Rex et regum Dominus

Mundo dum apparuit.

2. In caelorum sedibus

Regnat et hic cernitur,
Irrigatur fletibus,

Heu, a multis spernitur;
Ibi felicissimus

In supernis colitur,
Hic vero mitissimus

In praesaepe ponitur.

3. Exsultarunt angeli

Nato Dei filio,
Exsultemus singuli

In isto exsilio,
Nam humano generi

Salus et redemptio
Ortus salutiferi

Venit ab initio.

4. Ipse fecit hominem

Et eum paenituit
Atque fudit sanguinem

Et peccata abluit;
Pneumati paraclito

Detur laus et gloria,
Cum patri et filio

Per aeterna saecula.

R In Mariae filio

Nostra gaudet contio,
In hoc ipso parvulo
Salvatore Domino.