140. De beata Maria V.

1. Salve, mitis virguncula,
Tu trinitatis cellula,

Maria beatissima,
Virtuosa Annae nata,
In mysticis typicata

Figuris, aenigmatibus,

E. Nascentis Christi clementia
Illa, quam prodit Sibylla
Sollemni vaticinio.

2. Ierusalem filia,
Tu optima consilia

Dans veniam quaerenti,
Tu clavis es Davidica,
Tu es serpentis pertica,

Percussus qua revixit;

R. Realis est arca illa,

Ne Charybdis nos vel Scylla
Obruat in diluvio.

3. Amicta sole, luce plena,
Quam cum prole duodena

Te circumtendunt sidera,
Medicinalis camphora,
Tu es farinae amphora,

Tu olei lechytus.

R. Mystica tu metaphora,
Tu repetens anaphora,
Qua sermo fit politus.

4. Lux omnium pulcherrima,
Tu fama celeberrima,

Gens praerogat modesta,
Urna tu quoque aurea,
Tu tabula lapidea

Dans decem iussa genti.

R. Dotata mille sortibus
Et grata prae consortibus,
Te spiritus ignivit.

5. Memento nostri oneris,
Nos Abrahae ut generis

Fiamus coheredes,
Implora tuum filium,
Ut det nobis auxilium,

Tu honor trinitatis,

R. Laetemur ut in aetheris,
Sanctorum quae prae ceteris
Nostra es advocatrix.

6. Legalis es coniugii,
Vitalis es refugii

Fidelis advocata,
Arca tu es aetherea,
Tu, virgo, virga fumea

Aromate pigmenti

R. Et humilis [ancillula],
Tu es in nostra terrula
Vox turturis audita.

7. Sponsa tu praebens oscula,
Tu deitatis cartula

Sigillo communita,
Amica fidei tutrix,
Peccatorum es adiutrix
Et salus in periculis,

R. Regalis es virga Iesse,
Laborantum falx in messe
Mortis in articulo.

8. Armatura tu fortium,
Insultibus cohortium

Resistens alienis,
Vatum tu es oraculum,
Tu fidei signaculum,

Quo Deus subarrhavit,

R. Nos gratia rorifluos
Et famulos rege tuos,
Virguncula Maria.