5. In Nativitate Domini.

1. Mira lege, miro modo
Deus format hominem,
Mire magis hunc reformat,
vide mirum ordinem.

R Reformandi mirus ordo
In hoc sonat decachordo.

2. Primus homo fit ex humo,
mulier de homine,
Nos ex illis ; novus homo
fit ex sola virgine.

R Reformandi mirus ordo
In hoc sonat decachordo.

3. Sic se nobis coaptavit,
homo fit pro homine,
Caecus alta ne desperet,
filius fit feminae.

4. Primus homo non peccare
potuit, sed noluit ;
Nostrum tamen est peccare,
novus haec non potuit.

5. Mori potest et non mori,
primus homo conditur,
Sumus tamen nos mortales,
novus sponte moritur.

6. Acquisivit morte sua
nobis benignissimus
Vitam, in qua nec peccare
nec mori poterimus.

7. Pater Deus, mater homo,
Deus-homo filius,
Deus sursum, homo citra,
Deus-homo medius.

8. Matrem petat reus homo
hominem securius,
Fit per matrem natus, pater
per natum propitius.

9. Patrem intus portat mater,
ostium est filius,
Intrant rei per Mariam
prius atque latius.

10. Sol est pater, mater stella,
natus solis radius,
Pater sanctis, mater reis
lux, inferni filius.

11. Sic novatur vetus homo,
sic novari poteris,
Si per matrem tibi natura
advocatum feceris.

12. A praedicto decachordo
Discordanti non concordo,
Nonsunt Christi, quibus cordi
Non est ordo decachordi.