163. In Nativitate Domini.

la. Florens iuventus virginis
Fructum salutis germinat,

1b. Qui labentis originis

Vetustatem exterminat.

2 a. Dum verbum patris nascitur
Ex matre simul filia,

2 b. Factumque caro pascitur
Inter pudoris lilia.

3 a. In fine virgo temporis

Membris tumescit teneris

3 b. Viro perfecti corporis

In forma nostri generis.

4 a. O patris

Mira benignitas!

4 b. O matris

Praecelsa dignitas !

5 a. Quae pro salute hominum
Caeli regem et dominum
Sacrato fovet gremio,

5 b. Quem ordines angelici
Laudant, adorant caelici
Cives in regni praemio.

6 a. O Maria,
Virgo pia,
Orta dia
Ex regia
Progenie.

6 b. Expers maris,
Deum paris,
Portus maris
Salutaris,
Spes veniae.

7 a. In cuius laude deficit

Mens, lingua, sensus, ratio,

7 b. Sed laus haec eius reficit
Caelesti nos solacio.

8 a. Quae sola

Praebens solacia

8 b. Est schola

Docens veracia.

9 a. Scientia cum artibus,
Orationis partibus

Hanc cuncta laudant gram-
mata,

9 b. Rhethorica cum floribus
Venustisque coloribus
Ac logicae sophismata.

10 a. Dignare me
Laudare te,

O sanctissima domina,

10 b. Libro scribi
Vitae tibi

Fac dovotorum nomina.

11a. Tu trinitatis templum,
Exemplum iustitiae,
Tu renatis
Sanctitatis
Speculum.

11b. Tu rosa sine spina
Et via munditiae,
Tu sol lustrans
Et illustrans
Saeculum.

12 a. Ductrix gregis,
Doctrix legis

Gratiae,

Patris honor,

Carmen conor

Condere.

12 b. Sis indulgens,
Clara fulgens

Facie,
Mei memor,
Culpas premor

Pondere.

13 a. Sed vitia,
Flagitia

Tu relaxare propera,

13 b. Ut Domino,
Quem nomino,
Mea grata sint opera.

14 a. Ambitio,
Traditio,
Seditio,

Dire ne vulnus sauciat,

14 b. Ora Deum
Placans eum,
Ne me reum

Inferni Styx deglutiat.

15 a. Ergo, columna
Misericordiae,

15 b. Pacis alumna,

Basis concordiae,

16 a. Me non ob reatum
Despice,
Respice

Pietatis oculo,

16 b. Virtute beatum
Effice,
Refice

Vivi fontis poculo.

17 a. Mater misericordiae,

17 b. Spes et salus veniae,

18 a. Bonitas immensa,

Plena Dei gratia,
Me patris in mensa
Pane vitae satia.

18 b. Dat pauper amicus .

Carmen tibi mellicum,
Postulat mendicus
A te donum caelicum.

19 a. Salva multis annis,
Sis nobis perennis
Vita, veritas, via,

19 b. Ut post finem vitae
Sortiamur rite
Sempiterna bravia.

20 a. Sit laus Deo patri
Natoque victoria,

20 b. Per quem suae matri
Magna datur gloria.

21 a. Nos amborum pneuma
Erigat,
Dirigat,

Cura regat sedula,

21 b. Ut melodum neuma
Intonet,
Personet

Per aeterna saecula.