185. De s. Henrico Upsalensi.

1. Ramus virens olivarum
Per columbam panditur,
Binum genus animarum
Arca Noe clauditur.

2. Apex montis abscondatur,
Aquae vis dum tollitur,
Nubis sordes expurgatur,
Signum rei ponitur.

3. Grande mirum pietatis,
Arca dum salvatur,
At tunc cunctis animatis
Ira Dei datur,

4. Velut nostro demonstratur
Doctori Finlandiae,
Fides Christi dum fundatur,
Linquenti terram Angliae.

5. Vpsalensem praesulatum
Regno rexit Sueciae,
Per Ericum sublimatum
Pro cultu fiduciae.

6. Ardor strinxit caritatis
Corda patronorum,
Via ducti veritatis
Sorte supernorum.

7. Laeti petunt Finnorum
Terram pervenire,
Cultum pellunt daemonum
Palmam reperire.

8. Doctor mirae sanctitatis,
Ponens se periculis,
Formam verae pietatis
Turbis dans incredulis.

9. Uersus partes rex Erieus
Tendens domicilii,
Sanctus praesul hic Henricus
Comes fit exsilii.

10. Subit poenas patienter
Palmas per martyrii,

Adest lictor vehementer
Potum dans exitii.

11. Christus nobis patrem oret,
Pacem servans patriae,
Laudis turba quem decoret
Firma fide varie.

R Ergo, plebs Finnonica,
Gaude de hoc dono,
Quod facta es catholica
Verbi Dei sono.