CAPUT II.

Et est digressio qualiter in impressionibus diversis non est nisi generans commune.

Attende hoc, quod licet in tota natura ubi sunt generata particularia vel specialia quae perfectum esse habent in natura, et quorum forma est finis intentus a natura particulari, eo quod in ipsis salvatur esse divinum quantum fieri potest per successionem generatorum, sit generans proprium sub communi sicut patet : quia licet sol sit generans in omnibus illis, tamen inferius etiam homo et asinus et hujusmodi sunt generantia : quoniam si generans commune quod est unus coelestis circulus sufficeret, tunc non oporteret conferre virtutem generativam proprio generanti, quod est generans univocum et proprium et particulare : sic generationes omnes particulares et particularium sunt. Licet ergo sic sit in omnibus completis, tamen in vaporum et impressionum generatione non est nisi generans commune, quod est calor solis, et calor coelestium, sive ex splendore sl.ell.arum , sive per motus or- bis excitatus : et hoc ideo est, quod forma impressionum non est permanens in natura : et ideo sunt potius dispositiones elementorum quibus moventur ad mixturam, quae ad generationes mineralium et animalium et plantarum ordinantur, et non indigent generante nisi disponente, quod est generans commune, cujus est actus calefacere : calor autem movet disponens ad generationem. Hujus autem signum est, quod formae impressionum non sunt permanentes, nec figurae alicujus earum etiam in tempus modicum manent : et ideo dixit Aristoteles quod glacies et aqua non differunt nisi per accidens. Haec ergo est causa, quod licet sint diversae impressiones, non tamen determinatur in eis diversitas generantium, sed in omnibus generatis iterum unus actus diversimode suscipitur a materia impressionum generatarum, etc.