CAPUT I

De divisione habitorum et habendarum in tota scientia naturali, et de nomine libri.

In scientia naturali corpus mobile est subjectum, ut dictum est multoties. In natura autem duplex est mobile corpus, scilicet simplex et mixtum. Et ideo scientia naturalis tres habet partes in genere. Quia quaedam ejus pars est de corpore mobili simplici. Quaedam autem de simplici, quod est acceptum secundum viam et motum ad commixtionem. Quaedam autem de mobili commixto, sicut minerali, vel vegetabili, vel aliter. Illa autem pars quae est de mobili simplici, est duplex secundum duplicem modum simplicis corporis mobilis. Simplex enim, ut dixit Aristoteles in primo de Generatione et Corruptione, et nos diximus idem in primo de Generatione et Corruptione, capitulo 19, dicitur dupliciter. Est enim idem quod universale, et etiam idem quod substantia simpliciter. Unde una pars scientiae naturalis est de mobili corpore simplici, hoc est, universali, prout abstrahit ab omni corpore signato in natura, quae est scientia libri Physicorum. Et alia pars ejus est de mobili quod est corpus simplex, sive moveatur secundum

situm tantum, sive moveatur ad formam. Quae autem est de mobili simplici corpore, duplex est. Quia est motus secundum situm, nihil varians in eo quod movetur. Et est motus ad formam, qui variat aliud in mobili. Mobile ergo simplex quoad potentiam ad situm et locum, qui nihil variat in eo quod movetur, determinatur in libro de Coelo et Mundo. Mobile autem simplex quoad potentiam et formam, quae variat essentiam in substantia vel esse in accidentibus, determinatum est in libro de Generatione et Corruptione, quae est prima pars naturalis philosophiae. Mobile autem simplex prout est in via ad commixtionem, determinatur in isto libro quem habemus prae manibus, qui dicitur liber Meteororum, qui continet secundam partem naturalis philosophiae. Mobile autem hujusmodi consideratur dupliciter, scilicet ex parte viae commixtionis, quae est secundum quod unum elementum movetur in regione alterius per hoc quod alteratur ad ipsum per vaporem vel inspissationem : vel consideratur ex parte ipsius commixtionis, quae fit per activam qualitatem unam vel plures, vel per passivas. Et mobile quidem simplex primo modo consideratum, determinatur in primis tribus libris Meteororum. Mobile autem simplex secundum modum commixtionis factae per activas vel passivas qualitates, determinatur in libro quarto hujus scientiae. Deinceps autem in aliis libris determinatur de mobili mixto contracto ad speciem mineralem vel vegetabilem vel animalem, sicut patebit in sequentibus, quando tertia pars naturalis philosophiae determinabitur.

Postquam ergo praecessit nostra consideratio in libro Physicorum de rebus naturalibus, quae sunt primae et principia corporis mobilis in quantum est mobile in universali, abstrahens ab omni corpore signato et secundum speciem accepto. Et postquam etiam considerationem fecimus in secundo de Coelo et Mundo, et de stellis, et de motu suo, et causalitate ordinante mundum inferiorem, eo quod.

movent elementa ad generationem et corruptionem, sicut diximus in secundo de Generatione et Corruptione, Et postquam in primo de Coelo et Mundo ostendimus cujus dispositionis sit corpus ultimum supra nos, eo quod ipsum claudit et continet omnia, et diximus ibidem dispositionem elementi nobilis, quod est coelum: quod licet in compositionem non veniat corporis hujus vel illius, tamen est praecipuum complens universum. Et postquam nos in tertio Coeli et Mundi et quarto, et in secundo de Generatione et Corruptione enuntiaverimus quantitatem discretam elementorum corporeorum et alterationes elementorum ad invicem secundum causam materialem et efficientem. Postquam etiam diximus in universali mutationes quae sunt generatio et corruptio in primo de Generatione et Corruptione, visum est nobis quod secundum consequentia scientiae naturalis de corpore mobili simplici, ut habitum est, remansit nobis tractatus de rebus accidentibus in alto quae sunt propinquae locis stellarum : et demonstrare debemus eas per causam,quae sunt sicut galaxia, et stellae quae dicuntur cometes, eo quod comam habent, et assub, et anareli Arabice, quod est ignis expulsus sive descendens : et hoc, quidem faciemus in primo libro hujus scientiae. In secundo autem determinabimus ea quae videntur fieri in aere, quae sunt res generatae ex mutatione ejus, ex eo scilicet quod ipse est alicubi calidus et alicubi frigidus : et fiunt impressiones ex vapore ascendente in aerem ex vapore aquae et terrae. In tertio quidem libro hujus scientiae determinabimus ea quae fiunt ex vaporibus contentis in aqua et terra, quae sunt sicut terrae motus et venti, et quae illis sunt similia. Quando autem narraverimus de illis assignando causam istorum, tunc dicemus modum commixtionis corporum : et tunc in aliis libris particularibus de natura dicemus mineralium, et de naturis animalium et plantarum in universali et particulari, et sermonem faciemus communem: quia, de

Individuo particulari, id est, de hoc et illo, scientia de eis haberi non potest. Cum enim haec fecerimus, tunc perveniemus ad hoc quod intendimus in scientia naturali, et perveniemus ad ultimum narrationis nostrae in rebus physicis. Dicitur autem hic liber Meteororum quod est Graecum nomen, et compositum a AdminBookmark quod est trans, et AdminBookmark quod est contemplatio , quasi contemplatio eorum quae sunt trans, id est, in alto generata : quia de illis principaliter hic intenditur. Vel a AdminBookmark quod est de, et AdminBookmark quod est

videre : quia est de his quae visu accipiuntur in aere generata, sicut galaxia, et iris, et hujusmodi. Et hoc est probabilius, quod AdminBookmark Graeca propositio, idem est frequenter quod de, sicut metamorphoseos quod est idem quod defectus. Dicunt autem quidam., quod meteora idem sit quod de impressionibus : quod nullo modo est verum, quia hoc nomen nimis esset commune : quia impressiones superiorum corporum in omnibus sunt corporibus et simplicibus et compositis.