286. (23. ) In Natale Evangelistarum.

1. Regnum tuum

regnum omnium saeculorum, Domine, rex regum.

2 a. Cuius regni gloriam et potentiam tuam loquuntur

2 b. Plena oculis quattuor animalia ante et retro.

3 a. Leo, vitulus, homo, aquila profunda rimans mysteria:

3 b. Marcus, Lucas, Matthaeus, Iohannes occulta verbi eructuans.

4 a. Quorum forma et doctrina, Christe cum regina, sponsa tua, significaris ecclesia.

4b. Homo factus, bos in cruce, leo, cum resurgis, aquila super astra Deus volitans.

5 a. Et ecclesiae nati homines ut membra novi sunt hominis,

5 b. Crucifigentes se cum vitiis in crucis ara sunt vituli.

6 a. Vultu sunt leonino ad resistendum fortiter diabolo;

6 b. Aquilam tunc exprimunt, in verum solem figunt ut intuitum.

7 a. Sic sunt enim, Christe, quadrigae tuae salvatio,

7 b. Quadrifida cruce quam rotae dant evangelicae.

8 a Auriga tui currus super hos equos scandens, Domine,

8 b. Viam fac equis tuis in luto multo nostri pectoris.

9 a. Ut subvecti hoc in curru maris de tumultu portum perpetuae contingamus patriae.

9 b. Ubi sanctus, sanctus, sanctus nato maris stellae tibi clamemus his cum animalibus.

10. Quorum sit nobis oculorum multitudo bonae vitae circumspectio.