265. (2. ) De beata Maria Virgine.

1. Fecunda verbo tu virginum virgo,

2 a. Maria,

Dei mater inclita, omni laude tu sola digna.

2 b. Dignare

nos indignos famulos te laudare, regina caeli,

3 a. Mediatrix mediatoris tu genetrix,

3 b. In qua Deo

iunctus est homo Deus homini.

4 a. Unius tria sunt facta trinitatis opera in carne de te sumpta:

4 b. Angelus ne cadat, homo lapsus hinc ut redeat temptator nec resurgat.

5 a. Se similans altissimo iam nec par est infimo, redemptus quia vivit homo.

5 b. Immortaliter mortuus sed est mendax spiritus, quem strangulat ventris tui fructus.

6 a. At nos vitae reparat, angelum firmat, in se quos unus sociat.

6 b. Ergo, omnium domina, filium placa, supplices tuos adiuva,

7. Per quam solam solus omnibus vitam dat salvandis.