273. (10. ) In Octava Epiphaniae.

1. Laus tibi, Christe, sponso sponsae, laus in te trinitati sanctae.

2 a. Quia mundi sator, salus es et reparator,

2 b. Rebus dans singulis tuae umbras imaginis,

3 a. Vi rationis cor signans angeli et hominis,

3 b. Eius crystallum indurans, huius testam solidans.

4 a. Tu fons benigne, finis aeterne, origo rerum, clausula operum,

4 b. Corde parentis unicus natus, es fratres habere nos dignatus,

5 a. Ut consors naturae humanae des homini divina sapere,

5 b. Et lucis particeps divinae cor hominis non laedant tenebrae.

6 a. Quem pater tunc per te in pneumate voluit, fecit, fovit machinam, creatae, formatae

distinguis, pingis speciem variam.

6 b. Tibi corpus aptans ecclesiae, palmites viti, membra capiti, sordentem, marcentem tu fide mundas, spiritu vegetas.

7 a. Hanc, flos stirpis lesse, unctus oleo ungis laetitiae,

7 b. Septeno chrismate, quod in Iordane columba intulit Noe.

8 a. Cuius timoris vox super aquas, ut mentes terreat fluctivagas,

8 b. Vox in virtute est pietatis, moralis regula gravitatis.

9 a. Scientiae

sacrae dogma

vox est

in magnificentia.

9 b. Vox Domini fortitudo, cedros confringit in Libano.

10 a. Vox scindit consilii flammas incendii, voce intellectus movet Cades desertum Dominus.

10 b. Vox de sapientia cervis dat pascua, his, quibus descendit Deus, homo ascendit gradibus.

11 a. Pax mundi cordis, Christe, miserator noster, egens, lugens, mitis, pauper,

11b. Tu mali temptantis dimitte debita, tu panis, da regnum patris.

12 a. Te solem de stella ortum in ture, auro, murra, monstrat stella gentium, dominum, regem, mortalem.

12 b. In vinum converte aquam et legem in gratiam, pro figura veritas, pro iugo tu hereditas.